Tomusky dynç alyş möwsüminiň başlanmagy mynasybetli welaýat häkimliginiň, welaýat Baş bilim we medeniýet müdirlikleriniň welaýat kitaphanasynyň öňündäki giň meýdançada geçiren dabarasy uly ruhubelentlige we şatlyk-şowhuna beslendi. Oňa «Awaza» milli syýahatçylyk zolagynda ýerleşýän «Arzuw», «Daýanç», «Balkan», Gyzylarbat şäherindäki «Dürdäne», Balkanabat şäheriniň Hazar şäherçesindäki «Gara altyn» çagalar sagaldyş we dynç alyş merkezlerine dynç almaga barýan çagalar gatnaşdylar. Şol ýerde zehinli körpeleriň ýerine ýetiren aýdym-sazlarynda ýaş nesliň sagdyn ösüp-ulalmaklaryny gazanmakda, nurana geljegini üpjün etmekde döwlet derejesinde edilýän aladalar üçin Gahryman Arkadagymyza we Arkadagly Gahryman Serdarymyza alkyşlar belentden-belent ýaňlandy. Soňra çagalar welaýat Taryhy we ülkäni öwreniş muzeýine gezelenç edip, ol ýerdäki taryhy gymmatlyklar bilen tanyşdylar.

Bezelen awtobuslar bilen çagalar sagaldyş we dynç alyş merkezlerine tarap ýola düşen bagtyýar nesiller ýolugra welaýatymyzyň gözel binalaryny we ajaýyp tebigatyny ruhy lezzet almak bilen synladylar.

Çagalar sagaldyş we dynç alyş merkezleri ýaş nesillere gapylaryny giňden açdylar. Ol ýerlerde hem çagalar aýdym-saz, uly şowhun bilen garşylandylar. Esasan hem çagalar aýdym-saz, tans toparlarynyň çykyşlaryna giň orun berlip, şirin owazly aýdym-sazlarda, okalan goşgularda döwrümiziň, döwletimiziň bedew batly ösüşleriniň, Gahryman Arkadagymyzyň we Arkadagly Gahryman Serdarymyzyň beýik işleriniň, bagtyýar çagalygyň waspy öz beýanyny tapdy.

Çagalary goramagyň halkara gününiň dabaraly çäreleri welaýatymyzda hem ýatdan çykmajak pursatlara beslendi. Şeýle dabaralar Türkmenbaşy şäheriniň «Salkyn kenar» medeni-dynç alyş merkezinde, «Awaza» milli syýahatçylyk zolagynda hem geçirildi. Ýokary guramaçylyga, şatlyk-şowhuna beslenen çärelere bagtyýar nesiller höwes bilen gatnaşdylar. Olarda röwşen geljegimiziň eýesi bolan ýaş nesliň uly aladalar bilen gurşalýandygy, Türkmenistan Diýarymyzyň çagalaryň arzuw-islegleriniň hasyl bolýan ýurdudygy, çagalaryň ylym-bilimli bolup ýetişmekleri üçin ähli şert-mümkinçilikleriň döredilýändigi barada buýsanç bilen nygtaldy.

Mekdebe çenli çagalar edaralarynda terbiýelenýän körpeleriň, mekdep okuwçylarynyň, çagalar döredijilik toparlarynyň ýerine ýetiren joşgunly aýdym-sazlary ol ýerlere ýygnananlaryň göwünlerini galkyndyrdy. Çagalaryň arasynda milli oýunlar, surat çekmek, çägeden hem-de balykgulaklardan dürli şekilleri ýasamak boýunça geçirilen bäsleşikler çekeleşikli häsiýete eýe boldy. Dürli reňkli howa şarlary bilen bezelen «Çarlak» gämisinde guralan gezelenç çagalarda ýakymly ýatlamalary galdyrdy.

 Çagalary goramagyň halkara güni mynasybetli welaýat saglygy dikeldiş-okuw terbiýeçilik toplumynda geçirilen çäre-de şatlyk-şowhuna beslendi. Çagalara hormatly Prezidentimiziň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýörite sowgatlar gowşuryldy. Ýüzleri şatlykdan, kalplary buýsançdan dolup duran bagtyýar çagalar özleri barada atalyk alada edýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.

Welaýatymyzda hem Türkmen halysynyň baýramy ýokary ruhubelentlige beslendi. Halkymyzyň asyrlar aşyp biziň günlerimize gelip ýeten milli gymmatlyklarynyň biri bolan bu sungatyň baýramy mynasybetli welaýat häkimliginiň, Türkmenistanyň Zenanlar birleşmesiniň welaýat bölüminiň, welaýat medeniýet müdirliginiň Balkanabat şäherindäki «Türkmeniň ak öýi» binasynyň öňünde guran aýdym-sazly dabarasy täsirli pursatlary bilen ýatda galdy.

Dabarada edilen çykyşlarda türkmen halysynda tebigatymyzyň gözellikleriniň öz beýanyny tapandygy, onuň ene-mamalarymyzyň mähir-yhlasyndan, zehin-başarnygyndan dörän ajaýyp sungatdygy, her ýyl döwlet derejesinde Türkmen halysynyň baýramynyň giňden bellenilip geçilmeginiň ussat halyçy gelin-gyzlarymyza, milli gymmatlygymyza goýulýan sarpanyň nyşanydygy barada aýratyn nygtaldy. Berkarar döwletiň täze eýýamynyň Galkynyşy döwründe halyçy gelin-gyzlarymyzyň döwrebap şertlerde zähmet çekmegi üçin ähli mümkinçilikleri döredýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza alkyş sözleri  aýdyldy.

Baýramçylyk keşbinde bezelen meýdançada türkmen halkynyň asylly däp-dessurlaryna giň orun berlip, dürli mazmundaky sergiler guraldy. Belentden ýaňlanan aýdym-sazlar baýramçylyk dabarasyna baý öwüşgin çaýdy. Welaýatyň sungat ussatlary hormatly Prezidentimiziň parasatly baştutanlygynda halkymyzyň abadan, bagtyýar durmuşda ýaşamagy ugrunda alnyp barylýan tutumly işleriň, täze taryhy döwürde daraklarynyň sesi batly ýaňlanýan halyçylarymyzyň, türkmen zenanlarynyň çeper elleri, uz barmaklarynyň gudraty bilen döreýän nesip halylarymyzyň  waspyny buýsanç bilen beýan etdiler. 

Berkarar döwletiň täze eýýamynyň Galkynyşy döwründe behişdi bedewlerimiz toý-baýramlarymyzyň bezegi bolup, olaryň dabarasyny has-da artdyrýar. Ýurdumyzyň döwrebap atçylyk sport toplumlarynda geçirilýän at çapyşyklary bolsa bedew janköýerleriniň şatlyk-şowhunyna beslenýär. Geçen ýekşenbe güni Balkan atçylyk sport toplumynda geçirilen ýazky at çapyşyk möwsüminiň jemleýji at çapyşyklary hem gyzykly pursatlary peşgeş berdi.

Ilkinji çapyşyk 1200 metr aralyga boldy. Onda üçýaşar atlar öz aralarynda güýç synanyşyp, B. Allanazarowyň Ýürekdeş atly dor bedewi pellehana ilkinji bolup gelmegi başardy. Ikinji çapyşykda hem üçýaşar atlar güýç synanyşyp, bu gezegem aralyk 1200 metrden ybarat boldy. Bu çapyşykda T. Tülegenowyň Şahymerdan atly gara aty beýleki atlardan ozup, pellehanadan birinji bolup geçdi. 1800 metr aralyga dört we ulyýaşar atlaryň arasynda geçirilen üçünji çapyşyk hem çekeleşikli we gyzykly häsiýete eýe boldy. Onda M. Allaberdiýewiň Uçurym atly dor atyna taý tapylmady. Dördünji çapyşykda hem 1800 metr aralyga dört we ulyýaşar atlar bäsleşip, onda Ý. Esenowyň Garador atly dor bedewi öňdeligi hiç kime bermedi.

Jemleýji bäşinji çapyşykda dört we ulyýaşar atlar ýene-de 1800 metr aralyga güýç synanyşdylar. Şatlyk-şowhuna beslenen bu çapyşykda A. Mämmetnurowyň Gözguwanjym atly al aty ýeňiji bolmagy başardy.

At çapyşyklarynda öňe saýlanan bedewlere serpaýlar ýapylyp, çapyksuwarlara dabaraly ýagdaýda baýraklar gowşuryldy.

Tutuş ýurdumyzda bolşy ýaly, welaýatymyzyň merdana, agzybir hem zähmetsöýer halky ruhy päkligiň we hoşniýetliligiň baýramy bolan Gurban baýramyna ýokary taýýarlykly geldi. Gurban baýramynyň ilkinji güni welaýatyň Baş metjidi hasam köp adamly boldy. Bu ýerde ir säher bilen Baýram namazy okaldy. Adamlar birek-biregi mukaddes Gurban baýramy bilen mähirli gutladylar, Gahryman Arkadagymyza hem-de hormatly Prezidentimize alkyş sözlerini aýtdylar.

Welaýat, Balkanabat şäher  häkimlikleriniň, Türkmenistanyň Zenanlar birleşiginiň welaýat bölüminiň, welaýat medeniýet müdirliginiň Gurban baýramynyň şanyna «Türkmeniň ak öýi» binasynyň öňündäki meýdançada geçiren aýdym-sazly dabarasy ýokary ruhubelentlige beslendi. Hiňňildikleriň töwereklerinde jemlenen adamlaryň ýüzlerindäki şatlyk alamatlary olaryň Gahryman Arkadagymyza hem-de Arkadagly Gahryman Serdarymyza baky hoşallyklarynyň, ata Watanymyza çäksiz  buýsançlarynyň aýdyň beýanyna öwrüldi.

Baýramçylyk dabarasynyň geçýän ýerinde welaýatyň medeniýet we sungat ussatlarynyň aýdym-sazly çykyşlaryna uly orun berildi. Zehinli bagşylaryň, estrada aýdymçylarynyň, tans hem-de döredijilik toparlarynyň çykyşlary asyrlaryň dowamynda arzylanyp bellenilýän Gurban baýramynyň ruhy joşgunyny özünde jemledi. Toý gazanlarynda taýýarlanan datly milli tagamlar bu günki dabarany sözüň doly manysynda rysgal-berekediň, mukaddes ojaga tagzymyň, agzybirligiň baýramyna öwürdi. Mähir-muhabbete, aýdym-saza beslenen dabaralaryň dowamynda oňa gatnaşyjylar dürli önümleriň we amaly-haşam sungatynyň, welaýat Taryhy we ülkäni öwreniş muzeýiniň gymmatlyklarynyň sergileri bilen hem içgin tanyşdylar. Türgenleriň  sportuň dürli görnüşleri boýunça guran gyzykly ýaryşlarydyr görkezme çykyşlarynyň  janköýerleri-de ýetik boldy.