«Gadamly» gury ýük gämisiniň ýüzüşe goýberilmegi mynasybetli «Alkyş Size, şöhrat Size, Arkadagly Gahryman Serdarymyz!» diýen at bilen hoşallyk maslahaty geçirildi. Welaýat häkimliginiň mejlisler jaýynda geçirilen dabaraly maslahatda çykyş edenler Arkadagly Gahryman Serdarymyzyň ak patasy bilen «Gadamly» atly gury ýük gämisiniň ýüzüşe goýberilmegi bilen hemmeleri gutladylar. Ýerli hünärmenler tarapyndan gurlan ilkinji gäminiň Beýik Ýüpek ýoluny döwrebap görnüşde dikeltmek, ýurdumyzyň ulag-logistika ulgamyny ösdürmek, suw ýollary arkaly daşalýan ýükleriň möçberlerini artdyrmak, halkara hyzmatdaşlygyny ösdürmek babatda alnyp barylýan işlere düýpli itergi berjekdigini nygtadylar. Munuň özi ykdysadyýetiň has-da berkemegine, halkymyzyň ýaşaýyş-durmuş derejesiniň ýokarlanmagyna oňyn täsir eder. Maslahatda berkarar Watanymyzy il-ýurt bähbitli, dünýä ähmiýetli beýik işleriň durmuşa geçirilýän ajaýyp mekanyna öwren Gahryman Arkadagymyza hem-de Arkadagly Gahryman Serdarymyza alkyş sözleri aýdyldy. Ýürekleriň töründen çykýan şeýle hoşallyk sözleri medeniýet we sungat ussatlarynyň joşgunly aýdym-sazlaryna, milli tanslaryna utgaşdy. Şirin aýdym-sazlarda ajaýyp zamanamyzyň taryhy üstünlikleri, bagtyýar durmuşymyz, beýik Garaşsyzlygymyz wasp edildi.

Maslahatyň ahyrynda hormatly Prezidentimiziň adyna Ýüzlenme kabul edildi.

Balkan atçylyk sport toplumynda ýekşenbe güni geçirilen ýazky at çapyşygy möwsüminiň nobatdaky at çapyşyklary bedew janköýerlerinde uly täsirleri galdyrdy.

         Üçýaşar atlaryň arasynda 1200 mert aralyga geçirilen ilkinji çapyşykda T. Tülegenowyň Şahymerdan atly gara aty birinji, M. Hajyýewiň Bagyrgözeli atly al bedewi ikinji, G. Nurmuhammedowyň Tumar atly al aty üçünji bolup pellehanadan geçdiler.

         1200 metr aralyga guralan ikinji çapyşyga hem üçýaşar atlar gatnaşyp, Ý. Garaýewiň Isgender atly al aty birinji orny eýelemegi başardy. Ikinji orna «Kuwwatly tagt» hususy kärhanasynyň Mähriban diýen dor aty, üçünji orna Ý. Ýaryýewiň Üçgözel diýen dor bedewi mynasyp boldular.

         Dört we ulyýaşar atlaryň arasynda 1800 mert aralyga geçirilen üçünji çapyşykda T.Tülegenowyň Dagly atly dor atyna taý tapylmady. R. Akmämmedowyň hojalygyna degişli Dagarman diýen gara at ikinji, A.Durdygylyjowyň Şasenem diýen gara bedewi üçünji bolup pellehanadan geçdiler.

         Dördünji çapyşygam 1800 mert aralyga guralyp, onda hem dört we ulyýaşar atlar güýç synanyşdylar. «Kuwwatly tagt» hususy kärhanasynyň Mähriban atly gara bedewiniň birinji orny eýelän bu ýaryşynda ikinji orna M.Allaberdiýewiň Uçurym diýen dor aty, üçünji orna N.Halapowyň Isgender atly dor aty mynasyp boldular.

         Dört we ulyýaşar atlaryň gatnaşmaklarynda 1800 mert aralyga geçirilen jemleýji bäşinji çapyşykda pellehana birinji bolup T.Tülegenowyň Gözguwanjym diýen al aty geldi. Ikinji orny «Kuwwatly tagt» hususy kärhanasynyň Yhlasym atly dor aty, üçünji orny A.Orazowyň Sylap diýen al bedewi eýelediler.

         Öňdäki orunlary eýelän bedewlere serpaýlar ýapylyp, olaryň çapyksuwarlaryna baýraklar gowşuryldy.

1941 — 1945-nji ýyllaryň Beýik Watançylyk urşunda Ýeňiş güni mynasybetli Balkan welaýat, Balkanabat şäher häkimlikleriniň hem-de jemgyýetçilik guramalarynyň bilelikde guramaklarynda «Türkmennebit» döwlet konserniniň Balkanabat nebitçilik orta hünär okuw mekdebinde aýdym-sazly çäre geçirildi.

Baýramçylyk çäresinde çykyş edenler aldym-berdimli söweşlerde, merdana gerçekleriň görkezen gahrymançylygy, tylda zähmet çekenleriň edermenligi hakynda gürrüň etdiler, olaryň sarpasynyň hemişe belentdigini buýsanç bilen bellediler. Ýaşlara watansöýüjilik ýörelgesini öz ömürleriniň manysyna öwürmelidiklerini ündediler.

Dabarada welaýat medeniýet müdirliginiň sungat ussatlarynyň aýdym-sazly çykyşlaryna giň orun berildi. «Garaşsyz, baky Bitarap Türkmenistan bedew batly at-myradyň mekany» ýylynda durmuşa geçirilýän beýik işleriň, asuda hem-de parahat ýurdumyzyň waspyny ýetiren şirinden-şirin aýdym-sazlar el çarpyşmalar bilen garşylandy.

Baýramçylyk çäresiniň ahyrynda uruş döwrüniň ýowuz günlerini gören adamlara gymmatbahaly sowgatlar dabaraly ýagdaýda gowşuryldy.

Soňra harby gullukçylaryň muzeýe gezelenji guraldy. Olar şöhratly taryhymyzy, pederlerimiziň gahrymançylykly ýoluny, hormatly Prezidentimiziň parasatly baştutanlygynda durmuşa geçirilýän beýik işleri şöhlelendirýän muzeý gymmatlyklaryna syn etdiler.

Ýurdumyzyň ähli ýerinde bolşy ýaly, welaýatymyzda hem 1941 — 1945-nji ýyllaryň Beýik Watançylyk urşunda Ýeňiş gününiň dabaralary ýokary ruhubelentlige beslendi. Ýeňiş gününde söweş meýdanlarynda baky uka giden gerçekleriň, duşmandan üstün çykyp, döwletli ojaklaryna dolanyp gelen gahrymanlaryň görkezen edermenligi, batyrlygy, tylda galanlaryň tutanýerli zähmeti  barada ýene bir gezek ýatlanyldy.  

Beýik Ýeňşiň gazanylan güni — 9-njy maýda bolsa welaýat merkezi Balkanabat şäherindäki «Baky ot» ýadygärligine baharyň ter güllerini goýmak dabarasy geçirildi. Nesilleriň abadan we nurana geljegi, dünýäniň parahatçylygy ugrunda uruş meýdanlarynda wepat bolanlary hatyralamak çäresine welaýat we Balkanabat şäher häkimlikleriniň, jemgyýetçilik guramalarynyň wekilleri, edara-kärhanalarda zähmet çekýän işgärler, hormatly ýaşulular, ýaşlar gatnaşdylar. Olar ýadygärligiň etegine ter gül çemenlerini goýmak bilen, edermenligiň, mertligiň we gaýduwsyzlygyň beýik nusgasyny görkezen, taryha şöhratly atlaryny ýazdyran gerçekleri hatyraladylar. 

Hepdäniň ýekşenbe güni Balkan atçylyk sport toplumynyň ýene-de mähellesi ýetik boldy. Bu ýerde «Garaşsyz, baky Bitarap Türkmenistan — bedew batly at-myradyň mekany» ýylynyň ýazky at çapyşygy möwsüminiň nobatdaky çapyşyklary geçirildi. Dürli kärdäki, dürli ýaşdaky adamlar münberleri dolduryp, gyzykly at çapyşyklaryna tomaşa etdiler.

Ilki bilen, bedew janköýerleriniň şatlyk-şowhuny astynda üçýaşar atlar çapuw ýodasyna çykdylar. Olar 1200 metr aralykda  güýç synanyşdylar. M.Tulegenowyň Dorja atly dor aty turuwbaşdan öz ýyndamlygyny görkezip, ilkinji bolup pellehanada geçmegi başardy.

Ikinji çapyşykda üçýaşar atlar 1200 metr aralyga bäsleşdiler. Onda Gyşyksakar atly dor bedew beýlekilerden öňe saýlandy hem-de pellehana birinji bolup gelmegiň hötdesinden geldi. Ol P. Ýegşemowyň hojalygyna degişlidir.

Dört we ulyýaşar atlaryň arasynda 1800 metr aralyga geçirilen üçünji çapyşykda A. Ýazmyradowyň Garaýel atly gara dor aty birinji orna mynasyp boldy.

«Sümmülli toprak» daýhan hojalygynyň Iner atly al bedewi dört we ulyýaşar atlaryň arasynda 1800 metr aralyga geçirilen dördünji at çapyşygynyň ýeňijisi boldy.

Jemleýji bäşinji çapyşykda hem dört we ulyýaşar atlar güýç synanyşdylar. 1800 metr aralyga geçirilen çapyşykda Balkan atçylyk sport toplumynyň Garabezirgen atly gara aty öňdeligi bermedi.

Şowhunly hem çekeleşikli geçen at çapyşyklarynda ýeňiji bolan bedewlere serpaýlar ýapylyp, bedewleri çapan ezber çapyksuwarlar baýraklary maňlaýlaryna syldylar.