«Garaşsyz, baky Bitarap Türkmenistan — bedew batly at-myradyň mekany» ýylynyň güýzlük bugdaý ekişine welaýatymyzyň oba hojalyk toplumynyň işgärleridir zähmetsöýer gallaçy babadaýhanlary ýokary taýýarlykly geldiler. Şu möwsümde welaýat boýunça bugdaý ekiljek ýerleri sürmek, tekizlemek işleri guramaçylykly ýerine ýetirilip, bugdaý ekiji tehnikalaryň ählisi öz wagtynda doly taýýarlanyp goýuldy.

Bugdaý ekişi mynasybetli welaýat häkimliginiň mejlisler jaýynda geçirilen maslahatda bugdaý ekişini agrotehnikanyň talaplaryna laýyklykda ýokary guramaçylykda hem-de öz wagtynda geçirmekde, kuwwatly tehnikalary gije-gündiziň dowamynda bökdençsiz işletmek bilen, olaryň mümkinçiliklerini netijeli peýdalanmakda öňde durýan möhüm wezipeleriň üstünde durlup geçildi.

Bugdaý ekişiniň başlanmagy mynasybetli gallaçy kärendeçiler bilen welaýat Taryhy we ülkäni öwreniş muzeýine guralan gezelenç aýratyn many-mazmuna eýe boldy. Soňra Gyzylarbat etrabynyň D.Azady adyndaky daýhan birleşiginiň çäginde ýerleşýän «Ezber eller» hojalyk jemgyýetiniň bereketli ekin meýdanynda bugdaý ekişine badalga berilmegi mynasybetli ýaýbaňlandyrylan dabara gatnaşdylar. Hormatly Prezidentimiziň bugdaý ekişine başlamaga beren ak patasyndan ruhlanyp, asylly däbe görä, il içinde uly sylag-sarpanyň eýesi bolan ýaşulularyň «Bismillasy» bilen bugdaý ekişine girişildi.

Dabaranyň geçýän ýerinde guralan maslahata gatnaşyjylar welaýatymyzyň ekin meýdanlarynda ekiljek bugdaý tohumlarynyň görnüşleri bilen tanyşdyryldy. Şu möwsümde ekin dolanyşygyna girizilen ýerlerde bugdaýyň ozal synagdan geçen «Serdar», «Arkadag», «Pyragy», «Alekseýiç» we «Bezostaýa 100» ýaly görnüşleri ekiler.

Şanly ýylda welaýatymyzda 50 müň gektara azyklyk bugdaý tohumy ekilip, ondan geljek ýylyň orak möwsüminde 80 müň tonna guşgursak däne hasyly ýygnalar. Ekiş möwsüminde «Balkanobahyzmat» önümçilik birleşiginiň garamagyndaky kuwwatly traktorlaryň 137-siniň hyzmatyndan peýdalanylar. Gyzylarbat we Bereket etraplarynyň «Obahyzmat» önümçilik kärhanalarynda ýörite döredilen tehniki taýdan hyzmat ediş toparlary möwsümiň tutuş dowamynda iş üstünde bolup, bökdençligiň ýüze çykmazlygyny gazanarlar. 

Bu ýerde bugdaý ekişiniň başlanmagy mynasybetli guralan dabara oňa gatnaşanlarda ýatdan çykmajak ýakymly täsirleri galdyrdy. Belent joşgun bilen ýerine ýetirilen şirin aýdym-sazlar, milli tanslar dabara ýygnananlaryň göwünlerini galkyndyrdy. Sahna ussatlarynyň babadaýhanlarymyzyň gündelik iş-aladalaryndan taýýarlan çykyşlary, aýdymçylaryň parahat Watanymyzy, «Garaşsyz, baky Bitarap Türkmenistan — bedew batly at-myradyň mekany» ýylyny wasp edýän aýdymlary täsirliligi bilen tapawutlandy. Bagşylaryň belent owazly aýdym-sazlary bolsa toý meýdançasyndaky dabara özboluşly öwüşgin çaýdy.

Çäräniň geçýän ýerinde ak öýler dikilip, bu ýerde ýaýbaňlandyrylan el işleriniň sergisi, amaly-haşam we şekillendiriş sungatynyň eserleri, hünärli ussalaryň elinden çykan, oba adamlarynyň zähmet gurallary we öý-hojalyk esbaplary köpleriň uly gyzyklanmasyna eýe boldy. Galla önümleriniň sergisi bereketli topragymyzdan önýän gallany gaýtadan işleýän senagatyň okgunly ösüşi başdan geçirýändigini we onuň geljeginiň uludygyny ähli aýdyňlygy bilen görkezdi. Pälwanlaryň arasynda milli göreş boýunça guralan bäsleşik çekeleşikli boldy.

Ýurdumyzyň oba hojalygyny depginli ösdürmekde döwlet derejesinde edilýän ägirt uly aladalardan ruhlanyp, bugdaý ekişine guramaçylykly girişen welaýatymyzyň babadaýhanlary özlerine döredilip berilýän ajaýyp şertlerdir mümkinçilikler üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza  tükeniksiz alkyş sözlerini aýtdylar.

Mukaddes Garaşsyzlygymyzyň şanly 35 ýyllygy mynasybetli Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň hem-de ÝUNESKO-nyň işleri barada Türkmenistanyň Milli toparynyň sekretariatynyň bilelikde yglan eden «Müdimi senadyr ene hüwdüsi» atly bäsleşiginiň Balkanabat şäher tapgyry geçirildi.

Welaýat merkezindäki «Türkmeniň ak öýi» binasynda geçirilen bäsleşige gatnaşan zenanlar hüwdüleriň üsti bilen perzentleriniň sagdyn, ruhubelent, maksadaokgunly, bilimli nesiller bolup ýetişmegi üçin taýsyz tagallalary edýän Gahryman Arkadagymyza, hormatly Prezidentimize ene ýüreginden alkyş aýtdylar.

Bäsleşikde welaýat ýörite sungat mekdebiniň mugallymy Anna Haýdarowa ýeňiji bolmagy başardy we onuň welaýat tapgyryna gatnaşmaga hukuk gazandy. 7-nji orta mekdebiň mugallymy Ogulnur Güýçgeldiýewa ikinji, 25-nji çagalar bagynyň terbiýeçisi Bahargül Goýunlyýewa hem-de Oglanly şäherçesiniň medeniýet öýüniň tans goýujysy Bibiäşe Geldimämmedowa üçünji orunlara mynasyp boldular.

Aýdym-sazlar ynsan kalbyna ruhy lezzet paýlaýar, göwünleri ganatlandyrýar. Ýurdumyzda aýdym-saz dünýäsinde täze zehinleri ýüze çykarmak maksady bilen geçirilýän bäsleşikleriň many-mazmuny ýylsaýyn artýar. Munuň şeýledigini Balkanabat şäherindäki «Türkmeniň ak öýi» binasynyň öňündäki ajaýyp meýdançada Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde geçirilen «Ýaňlan, Diýarym! — 2026» telebäsleşiginiň welaýat tapgyry hem aýdyň subut etdi. Welaýat häkimliginiň hem-de welaýat medeniýet müdirliginiň guramagynda geçirilen bäsleşige onuň etrap-şäher tapgyrlarynda ýeňiji bolan ýaşlaryň 10-sy  gatnaşdy.

Mukaddes Garaşsyzlygymyzyň şanly 35 ýyllygyna bagyşlanyp geçirilen bäsleşikde aýdymçy ýaşlaryň eziz Watanymyzy, täze taryhy eýýamyň beýik tutumlaryny, Arkadagly Gahryman Serdarymyzyň  parasatly döwlet syýasatyny, türkmen tebigatynyň taýsyz gözelliklerini, bagtyýar durmuşymyzy taryplap ýerine ýetiren häzirki zaman estrada aýdymlary tomaşaçylara ruhy lezzet paýlady. Aýdym-sazyň muşdaklary yzly-yzyna çykyş eden aýdymçylaryň ussat halypa bagşylarymyzdan miras galan halk aýdymlaryny hem şowhunly el çarpyşmalar bilen garşyladylar. Ýurdumyzda amala aşyrylýan taryhy özgerişlikleriň, güneşli Diýarymyzyň abadançylygynyň, ata Watanymyzyň barha arşa göterilen şan-şöhratynyň, päk söýginiň waspy bolup ýaňlanan aýdym-sazlar alyslara ýaň saldy. Ýaş estrada aýdymçylaryň «Garaşsyz, baky Bitarap Türkmenistan — bedew batly at-myradyň mekany» ýylyny,  dost-doganlygy, asuda durmuşy wasp eden aýdymlary joşgunly ýaňlandy. Bir söz bilen aýdylanda, Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde geçirilýän «Ýaňlan, Diýarym! — 2026» telebäsleşiginiň welaýatymyz boýunça jemleýji tapgyry ýaş zehinli aýdymçylaryň kemala gelýändigini görkezdi.

         Bäsleşikde emin agzalary ýaş aýdymçylaryň çykyşlarynyň aýratynlyklaryna,  ýerine ýetirijilik ussatlyklaryna we sahnada özlerini alyp baryşlaryna aýratyn üns berdiler. Şeýlelik-de, «Ýaňlan, Diýarym! — 2026» telebäsleşiginiň welaýat tapgyrynda Etrek etrabynyň medeniýet merkeziniň çeper höwesjeňi Baýrammyrat Ýakubow hem-de Türkmenbaşy etrabynyň Guwlymaýak şäherçesiniň ýaşaýjysy, höwesjeň aýdymçy Amanmyrat Maýdyýew ýeňiji diýlip yglan edilip, bäsleşigiň döwlet tapgyryna gatnaşmaga hukuk gazandylar.

                Bäsleşigiň ýeňijilerine hem-de tapawutlanan zehinli aýdymçylara gymmatbahaly sowgatlar dabaraly ýagdaýda gowşuryldy. 

Her ýyl geçirilmegi däbe öwrülen «Gülüň owadan!» atly bäsleşik Türkmenistanyň Zenanlar birleşiginiň Merkezi geňeşi, Kärdeşler arkalaşyklarynyň Milli merkezi hem-de ÝUNESKO-nyň işleri barada Türkmenistanyň milli toparynyň sekretariaty tarapyndan guralýar.

Keçe sungatyna bagyşlanan bu bäsleşigiň ýakynda paýtagtymyzdaky Jemgyýetçilik guramalarynyň merkezinde geçirilen döwlet tapgyrynyň birinji şertinde oňa gatnaşan zenanlar ýüň saýlap almak, boýamak, daramak, pişge ýasamak, keçäniň gamşyny dokamak ýaly işleri ýerine ýetirdiler. Keçe taýýarlamak üçin gerekli gurallaryň atlary hem-de olaryň ulanylyşy hakda gürrüň berdiler.

Ikinji şertde keçe sungatynyň ussatlary öz welaýat aýratynlyklaryna görä, dürli gadymy nagyşlary salyp, keçe güllediler. Olaryň güllän keçeleriniň boýy 1,5 metr, ini 1 metr bolup, «ak tüýnük», «gyzyl tüýnük», «gözenek», «saýlan», «gelinbarmak» ýaly ene-mamalarymyzdan miras galan nagyşlar bilen bezeldi.

Üçünji şertde keçe bilen bagly rowaýatlar, onuň nagyşlarynyň aňladýan manysy, bu gadymy senet bilen bagly yrymlar hakda gürrüň berdiler. Şeýle-de bäsleşige gatnaşyjylar öz aralarynda keçe sungaty bilen bagly saýlap alan ugurlary barada giňişleýin durup geçdiler.

Bäsleşige gatnaşan zenanlaryň arasynda dürli kärde zähmet çekýänleri bar. Balkan welaýatyndan Amantäç Bagyýewa Balkanabat şäheriniň Çagalar we ýetginjekler döredijilik öýüniň çeper bezegçisidir. Ol hem keçe sungatynyň ezber ussatlarynyň biri. Aýsoltan Allagulyýewa bolsa Balkanabat şäherindäki Nebitçileriň medeniýet köşgüniň bagşysy.

«Garaşsyz, baky Bitarap Türkmenistan — bedew batly at-myradyň mekany» ýyly diýlip atlandyrylan, mukaddes Garaşsyzlygymyzyň şanly 35 ýyllygynyň uludan baýram ediljek ýylynda geçirilýän bu bäsleşigiň ähmiýeti örän uludyr. Milli gymmatlyklarymyza söýgi döretmek, ony ýaş nesliň arasynda wagyz etmek bilen gadymy keçe sungatymyzy geljek nesillere ýetirmek bäsleşigiň baş maksadydyr.

Emin agzalarynyň biragyzdan gelen netijesine görä, bäsleşigiň baş baýragyna Balkan welaýatynyň, birinji orna Daşoguz welaýatynyň, ikinji orna Arkadag şäheriniň hem-de Lebap welaýatynyň, üçünji orna bolsa Aşgabat şäheriniň, Ahal hem-de Mary welaýatlarynyň çeper elli zenanlary mynasyp boldular. Ýeňijilere bäsleşigi guraýjylar tarapyndan Hormat hatlary hem-de gymmatbahaly sowgatlar gowşuryldy. Olar öz ukyp-başarnyklaryny, zehinlerini ýüze çykarmakda döredilip berilýän giň mümkinçilikler üçin Gahryman Arkadagymyza, hormatly Prezidentimize tüýs ýürekden çykýan hoşallyklaryny beýan etdiler.

Gozgalaňly dowam edýän tomusky dynç alyş möwsüminiň häzirki sapaly günlerinde Balkan welaýat häkimliginiň «Awaza» milli syýahatçylyk zolagyndaky «Balkan» dynç alyş we sagaldyş merkezinde uly adamlar bilen birlikde, bagtyýar çagalar hem döwrebap dynç alýarlar. Merkez 300 orundan ybarat bolup, onuň 200-si uly adamlara, 100-si bolsa çagalara niýetlenilendir. Bu ýere dynç almaga gelýän raýatlar, şol sanda çagalar mähir bilen garşylanylýar we uly alada bilen gurşalyp alynýar. Olaryň ýokary derejede dynç almaklary, saglyklaryny berkitmekleri, sport we bedenterbiýe bilen meşgullanyp, sagdyn durmuş ýörelgelerine eýermekleri üçin ähli şertler döredilendir. Döredijilik bäsleşikleri, sport ýaryşlary, deňziň üstünden öwüsýän jana şypaly howa, baglaryň, gülleriň anbar ysy, tebigatyň gözelligi dynç alýanlarda bu ýere ýene-de gelmäge höwesi döredýär.

«Balkan» dynç alyş we sagaldyş merkezinde tomusky dynç alyş möwsüminiň her tapgyrynda 100 çaga kabul edilýär. Merkeziň agzybir işgärleri  ýaş nesilleriň ýokary derejede dynç almaklary, wagtlaryny peýdaly, şadyýan geçirmekleri üçin yhlaslaryny, tagallalaryny gaýgyrmaýarlar. Bu ýerde çagalar kitap okaýarlar, dürli oýunlary oýnaýarlar, sport ýaryşlaryna gatnaşýarlar, wagtly-wagtyna naharlanyp, kadaly ukularyny alýarlar. Bagtyýar çagalaryň ýüz-gözlerindäki şatlyk alamatlaryny göreniňde, sagaldyş we dynç alyş merkeziniň işgärleriniň tagallalarynyň ýerine düşýändigine göz ýetirýärsiň.

Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» ýylynyň tomusky dynç alyş möwsüminde özleriniň dynç almaklary, saglyklaryny berkitmekleri babatda döredilen ajaýyp şert-mümkinçilikler üçin raýatlarymyzyň, şol sanda bagtyýar çagalaryň Gahryman Arkadagymyza hem-de Arkadagly Gahryman Serdarymyza alkyşlary egsilmeýär.