Welaýat merkezinde Bütindünýä saglyk güni mynasybetli  guralan dabaraly çäreler ýokary ruhubelentlige beslendi. Welaýat häkimliginiň meýilnamasyna laýyklykda bedenterbiýe-sagaldyş toplumlarynda, iri edara-kärhanalarda sportuň dürli görnüşleri boýunça görkezme çykyşlaryna, bedenterbiýe maşklaryna giň orun berildi. Bahar paslynyň ir säherinde edara-kärhanalarda sport maşklarynyň ýerine ýetirilmegi köpçülikleýin häsiýete eýe boldy

         Balkanabat şäherindäki  «Türkmeniň ak öýi» binasynyň ýanyndan badalga alan köpçülikleýin welosipedli ýörişe  welaýatyň jemgyýetçilik guramalarynyň wekilleri, bilim, medeniýet, saglygy goraýyş, sport we beýleki ulgamlaryň işgärleri we  talyp ýaşlar gatnaşdylar. Ýörişiň geçýän ugrunda  medeni çäreler giň gerimde ýaýbaňlanyp, belentden ýaňlanan aýdym-sazlar, joşgunly çykyşlar  ýörişe gatnaşyjylaryň ruhubelentligini has-da belende göterdi. Ýolugra ýaş türgenleriň görkezme çykyşlaryna hem tomaşa eden ýörişe gatnaşyjylar halkymyzyň  saglygyny goramakda we berkitmekde edýän taýsyz tagallalary üçin  Gahryman Arkadagymyza hem-de  Arkadagly Gahryman Serdarymyza alkyş sözlerini aýtdylar.    

         Balkanabat şäherindäki köpugurly sport toplumynyň öňünde  «Arkadagly Gahryman Serdarymyz  bilen öňe barýar sagdyn nesil» diýen at bilen geçirilen çäreler hem juda täsirliligi bilen tapawutlandy. Ol ýerde ýaňlanan döwrebap aýdym-sazlarda, ýerine ýetirilen joşgunly tanslarda Arkadagly Gahryman Serdarymyzyň durmuşa geçirýän beýik işleriniň, «Pähim-paýhas ummany Magtymguly Pyragy» ýylynyň waspy belentden ýetirildi. Bu ýerde türgenleriň sportuň birnäçe görnüşi boýunça ýerine ýetiren görkezme çykyşlary baýramçylyk çäresiniň täsirliligini artdyrdy.  

           Şanly sene mynasybetli dabaraly çäreler welaýatymyzyň ähli etrap-şäherlerinde giň gerimde ýaýbaňlandy.

Mukaddes Oraza aýynyň Gadyr gijesiniň hormatyna Balkanabat şäheriniň kenarýaka Hazar şäherçesinde täze metjit açylyp ulanmaga berildi.

         Welaýatymyzyň dürli künjeklerinden gelen il sylagly ýaşulular täze metjidiň açylyş çäresiniň dowamynda bu ajaýyp ymaratyň içine aýlanyp, onda däp-dessurlarymyzy berjaý etmek üçin döredilen ähli amatlyklar bilen içgin tanyşdylar. Olar metjidiň döwrebap mümkinçiliklerine göz ýetirip, halkymyzyň dini ynançlaryny we garaýyşlaryny erkin berjaý etmegi üçin ähli şertleri döredýän, milli medeniýetimizi we mirasymyzy täze belentliklere göterýän  Gahryman  Arkadagymyza hem-de  Arkadagly Gahryman  Serdarymyza tüýs ýürekden çykýan alkyş sözlerini aýtdylar.

          Türkmenistanyň müftüsiniň müdiriýetiniň buýurmasy esasynda gurlan Balkanabat şäheriniň Hazar şäherçesindäki täze metjidi ýurdumyzyň Senagatçylar we telekeçiler birleşmesiniň agzasy bolan «Aga gurluşyk» hususy kärhanasynyň hünärmenleri öňdebaryjy tehnologiýalary, döwrebap gurluşyk we timarlaýyş serişdelerini ulanmak bilen bina etdiler. Metjidiň merkezi gümmeziniň depesinde Aýyň altyn çaýylan şekili goýlupdyr. Täze metjidiň haşamlanyp timarlanan minaralarynyň dördüsi ymarata aýratyn görk berýär.

          Bir wagtda 500 adamyň namaz okamagy üçin ähli şertlerdir mümkinçilikler döredilen binanyň içki bezeglerinde deňiz tolkunlarynyň, balyk teňňeleriniň şekilleri juda ussatlyk bilen ýerine ýetirilipdir. Şeýle hem bu ýerde 500 orunlyk sadaka jaýy gurlup, metjitdäki we sadaka jaýyndaky çyralaryň şekilleriniň gämi we ýelken  görnüşlerinde bolmagy Hazar şäherçesiniň balykçylaryň gadymy we şöhratly mekanydygyny  aňladýar. Täze metjidiň çäginde  awtoulaglar üçin ýörite duralga hem bar. Deňiz ýakasynda bina edilen  metjit özüniň diňe bir binagärlik keşbi, içerki we daşarky bezegleri bilen däl-de, eýsem, ýanaşyk ýerleriniň bagy-bossanlyga bürelendigi bilen hem tapawutlanýar. Metjit agşamlaryna özüniň älemgoşar öwüşginli yşyklary bilen daş-töwerege nur çaýyp, şäherçäniň görküne özboluşly nuranalyk keşbini eçilýär.

          Hazar şäherçesine özboluşly bezeg berýän täze metjitde agzaçar sadakasy berildi. Onda edilen aýat-töwirlerde Gahryman hajy Arkadagymyza  hem-de  Arkadagly Gahryman hajy Serdarymyza bark jan saglyk,  uzak ömür, il-ýurt bähbitli amala aşyrýan beýik işlerinde ebedi rowaçlyk, berkarar döwletimize gülläp ösüş, halkymyza baky bagtyýarlyk dileg edildi.

Arkadagly Gahryman Serdarymyzyň jöwher zehininden syzylyp çykan «Änew — müňýyllyklardan gözbaş alýan medeniýet» atly kitabynyň tanyşdyrylyş dabarasy welaýat döwlet drama teatrynda geçirildi. Welaýat hem-de şäher häkimlikleriniň, jemgyýetçilik guramalarynyň wekilleriniň, edara-kärhanalaryň işgärleriniň, il sylagly ýaşulularyň, kümüş saçly eneleriň gatnaşmaklarynda geçirilen dabara ýokary ruhubelentlige beslendi. Dabarada çykyş edenler hormatly Prezidentimiziň kitabynyň çapdan çykmagynyň şan-şöhratly taryhymyzy, milli medeniýetimizi, sungatymyzy giň äleme ýaýýan, halkymyzyň at-abraýyny dünýä ýüzünde dabaralandyrýan şanly waka öwrülendigini nygtadylar.

Änew medeniýetiniň taryhy baradaky gyzyldan gymmatly maglumatlaryň her biri ylmy taýdan öwrenilmäge mynasypdyr. Ata-babalarymyzyň gurmak hem-de döretmek ýaly sogaply ýörelgeleri, halkymyzyň şöhratly geçmişi barada giňişleýin gürrüň edilýän ajaýyp kitaby okanyňda, keremli topragymyza, eziz Watanymyza bolan söýgiň has-da artýar. Şöhratly pederlerimiziň, senetçi ussalarymyzyň guran binalarynyň dünýäniň hiç bir ýerinde gaýtalanmaýan sungatdygyny açyp görkezýän Änew medeniýeti, ýadygärlikleri daşary ýurtly syýahatçylaryň hem ünsüni özüne çekýär.

Çykyş edenler şular dogrusynda gürrüň edip, milli däp-dessurlarymyzy, medeniýetimizi we sungatymyzy beýan edýän eserini halkymyza peşgeş beren Arkadagly Gahryman Serdarymyza alkyş sözlerini aýtdylar. Hormatly Prezidentimiziň janynyň sag, ömrüniň uzak bolmagyny arzuw etdiler.

Tanyşdyrylyş dabarasynda welaýatymyzyň medeniýet we sungat ussatlarynyň çykyşlaryna giň orun berildi. Joşgunly ýaňlanan aýdym-sazlarda gözel Watanymyzyň, Gahryman Arkadagymyzyň, Arkadagly Gahryman Serdarymyzyň alyp barýan beýik işleriniň, dost-doganlygyň waspy ýetirildi.

Ýokary guramaçylyk derejesinde geçirilen dabarada hormatly Prezidentimiziň adyna Ýüzlenme kabul edildi.

Milli bahar baýramy — Halkara Nowruz güni mynasybetli welaýatymyzda şatlyk-şowhunly çäreler biri-birine ulaşdy. Şeýle dabaralaryň biri Magtymguly etrabynyň «Akderek» ýaýlasynda geçirildi. Bu ajaýyp ýaýlany synlanyňda, tebigatyň sahawatly türkmen topragyna ajaýyp gözelligi eçilendigine magat göz ýetirýärsiň. Daş-töwerege bezeg berýän al-elwan güller, owlak-guzularyň, guşlaryň sesi ajaýyp sazlaşyk döredip, ýaýla toý ruhuna beslendi.

Dabara baýramçylyk ýörişi bilen badalga aldy. Il sylagly ýaşulular, kümüş saçly eneler, gelin-gyzlar, ruhubelent ýaşlar, bagtyýar körpeler baýramçylygyň geçýän ýerine geldiler hem-de begrese beslenen ýaýladaky türkmen obasyna aýlanyp gördüler. Ak öýleriň öňünde guralan halyçylyk, keşdeçilik, zergärçilik, amaly-haşam sungatynyň önümleriniň, gelin-gyzlarymyzyň on barmagynyň hünäri bolan beýleki el işleriniň sergisini höwes bilen synladylar.

Baýramçylyk dabarasyna gatnaşýanlar birek-biregi baharyň buşlukçysy bolan ajaýyp baýram bilen gutladylar. Halkymyzy bolelin, eşretli, bagtyýar durmuşda ýaşadýan Gahryman Arkadagymyza, Arkadagly Gahryman Serdarymyza hoşallyk hem alkyş sözlerini aýtdylar.

Halk döredijilik toparlarynyň ýerine ýetirmeginde ýaýbaňlanan ümeçilik dessury, «ogul öýermek» däbi asylly ýol-ýörelgelerimiziň dowamat-dowamdygynyň güwäsine öwrüldi. Folklor toparlarynyň çykyşlarynda Milli bahar baýramy bilen bagly halkymyzyň ýagşy umyt-arzuwlary, däp-dessurlary, yrym-ynançlary, ýaşaýyş baradaky çuňňur paýhasly garaýyşlary öz beýanyny tapdy. Bagşy-sazandalaryň ýerine ýetiren aýdym-sazlarynda, gazallarynda, tans toparlarynyň joşgunly tanslarynda berkarar döwletimiziň ösüşleriniň, ajaýyp zamanamyzyň, Milli Liderimiziň we hormatly Prezidentimiziň dünýä nusgalyk işleriniň, Nowruzyň, tebigat gözellikleriniň waspy ýetirildi. 

Soňra baýramçylyk dabarasy «Ok atan» jülgesinde dowam edip, onuň şatlyk-şowhuny has-da artdy. Bu ýerde hem medeniýet we sungat işgärleriniň sahna oýunlary, folklor çykyşlary, aýdym-sazlary, tanslary biri-birine ulaşyp, çärä gatnaşýanlaryň göwünlerini galkyndyrdy. Ýaşajyk suratkeşleriň türkmen tebigatynyň gözelliklerini, Nowruzyň däp-dessurlaryny, bu ýerde ýaýbaňlandyrylan toý çärelerini wasp edip döreden suratlary hem baýramçylyk dabarasynyň täsirliligini artdyrdy.

Milli bahar baýramy — Halkara Nowruz güni mynasybetli welaýat we Balkanabat şäher häkimlikleriniň, welaýat medeniýet müdirliginiň, Türkmenistanyň Zenanlar birleşiginiň welaýat bölüminiň bilelikde guramaklarynda «Türkmeniň ak öýi» binasynyň öňündäki meýdançada geçirilen baýramçylyk dabarasy ýokary guramaçylyk derejesine eýe boldy. Uly ruhubelentlige beslenen dabara il sylagly ýaşulularyň, kümüş saçly eneleriň, medeniýet, saglygy goraýyş we bilim ulgamlarynyň işgärleriniň, talyp ýaşlaryň, mekdep okuwçylarynyň we bagtyýar körpeleriň gatnaşmaklarynda baýramçylyk ýörişi bilen başlandy. Türkmeniň alty ganat ak öýleriniň hatary, nepis halylar düşelen telärler, olaryň daş-töwereginde guralan dürli mazmunly çäreler bu ýere gelenlere egsilmejek ruhy lezzet paýlady.

Amaly-haşam sungatynyň dürli görnüşleriniň, zergärçilik önümleriniň, şekillendiriş işleriniň sergisini synlamak has-da ýakymly boldy. Baýramçylyk öwüşginini artdyran sergi köpleriň ünsüni özüne çekdi. Gelin-gyzlaryň semeni we beýleki tagamlary taýýarlaýan, un eläp, hamyr ýugrulyşyny, pişme, unaş kesilişini görkezýän, şeýle-de ümeçilik dessuryny ýerine ýetirýän pursatlary dabaranyň möhüm bölegine öwrüldi. Baýramçylyga gatnaşýanlara milli tagamlar hödür-kerem edildi. Ýürekleri joşgunly zenanlar baýramçylyk buýsançlaryny gazallaryň, küştdepdileriň üsti bilen beýan etdiler.

Baýramçylyk dabarasynyň geçýän ýerinde aýdym-sazyň owazy uzaklara ýaň saldy. Welaýatymyzyň medeniýet we sungat ussatlary gül-gülzarlyga beslenip gelen bahar paslynyň waspyny belent joşgunda ýerine ýetirdiler. Welaýat döwlet drama teatrynyň artistleriniň sahna oýunlarynda Gahryman Arkadagymyza, Arkadagly Gahryman Serdarymyza egsilmez söýgi-buýsanç aýdyň beýanyny tapdy. Bu ýere ýygnananlar welaýat ýörite sungat mekdebiniň «Dutarçylar» toparynyň çykyşlaryny, milli sport ýaryşlarynyň dürli görnüşleriniň ýaýbaňlandyrylan pursadyny, ýaşlaryň hiňňildiklerde uçuşyny synlap, gadymy toý däpleriniň mynasyp derejede dowam etdirilýändigine ýene-de bir gezek aýdyň göz ýetirdiler.