Welaýat döwlet drama teatrynda Türkmenistanyň Magtymguly adyndaky Ýaşlar guramasynyň Merkezi geňeşiniň we Türkmenistanyň Bilim ministrliginiň Milli bahar baýramy mynasybetli ýurdumyzyň orta mekdepleriniň 2 — 4-nji synplarynda okaýan okuwçy gyzlarynyň arasynda yglan eden «Iň eýjejik gyzjagaz» atly bäsleşiginiň welaýat tapgyry geçirilip, ol şatlyk-şowhuna beslendi.

Berkarar döwletiň täze eýýamynyň Galkynyşy döwrüniň bagtyýar nesilleriniň sagdyn ösüp-ulalmaklaryny, döwrebap bilim almaklaryny we olarda sungata bolan söýgi-buýsanjyň artmagyny, ýaş nesilleriň hemmetaraplaýyn kämil adamlar bolup ýetişmeklerini gazanmagy, bu ugurda alnyp barylýan işleri wagyz etmegi maksat edinen bäsleşige onuň etrap-şäher tapgyrlarynda tapawutlanan gyzjagazlar gatnaşdylar. Üç şertden ybarat bolan bäsleşikde oňa gatnaşyjylar şirin owazly aýdym-sazlarda ata Watanymyzyň, hormatly Prezidentimiziň durmuşa geçirýän beýik işleriniň, bagtyýar çagalygyň, sportuň, dost-doganlygyň, ajaýyp bahar paslynyň waspyny ýetirdiler. Şahyrana sözlerde öz geýen milli egin-eşikleriniň, dakynan şaý-sepleriniň gözelligini, nepisligini taryp etdiler, ene-mamalarymyzdan dowam edip gelýän el işlerini ýerine ýetirmekde ukyp-başarnyklaryny görkezdiler.

Şatlyk-şowhunly geçen bäsleşigiň netijesi boýunça Balkanabat şäherindäki 5-nji orta mekdebiň okuwçysy Zübeýda Hajyýewa birinji, Gyzylarbat etrabyndaky 27-nji orta mekdebiň okuwçysy Melek Garmämmedowa ikinji orunlara mynasyp boldular we bäsleşigiň döwlet tapgyryna gatnaşmaga hukuk gazandylar.

Halkara zenanlar gününiň dabaraly çäreleri bir-birine ulaşdy. Hormatly Prezidentimiziň Permany bilen sekiz we şondan köp çagany dünýä inderen hem-de terbiýeläp ýetişdiren enelere Türkmenistanyň «Ene mähri» diýen hormatly adynyň dakylmagy hem-de onuň nyşanynyň dabaraly ýagdaýda gowşurylmagy çuň mazmunly baýramçylyk çäreleriniň möhüm bölegine öwrüldi. Welaýat häkimliginiň mejlisler zalynda geçirilen dabara egsilmez şatlyk-şowhuna beslendi. Onda giň gerim berlen gutlag çykyşlarynda nygtalyşy ýaly, maddy we ruhy gymmatlyklarymyzy nesilden-nesle geçirip gelýän zenanlarymyza goýulýan hormat-sarpa täze taryhy eýýamyň demokratik ýörelgeleri bilen berk baglanyşyklydyr.

Dabarada mährem zenanlara goýulýan çäksiz hormat-sarpa, olar barada döwlet derejesinde edilýän aladalar üçin türkmen halkynyň Milli Lideri Gahryman Arkadagymyzyň hem-de Arkadagly Serdarymyzyň adyna tüýs ýürekden çykýan alkyş sözleri aýdyldy. Şeýle-de dabaranyň barşynda «Ene mähri» diýen ada eýe bolan köp çagaly enelere hormatly Prezidentimiziň adyndan gymmatbahaly sowgatlar şowhunly el çarpyşmalar astynda gowşuryldy. Welaýatymyzyň belli halk we estrada aýdymçylarynyň, tans we folklor toparlarynyň joşgunly çykyşlarynda eneleriň mähremligi, gelin-gyzlaryň gözelligi, wepadarlygy, bahar paslynyň owadanlygy wasp edildi.

Baýramçylyk şowhuny soňra köp çagaly enelere ähli amatlyklary bolan täze öýleriň açarlaryny gowşurmak dabarasy bilen dowam etdi. Welaýat merkeziniň gözel künjeginde ýerleşýän döwrebap ýaşaýyş jaýynyň öňünde tutulan dabara aýdym-saza beslenip, gutlag çykyşlaryna uly orun berildi. Şowhunly baýramçylyk dabarasynyň dowamynda Arkadagly Serdarymyzyň tabşyrygyna laýyklykda, köp çagaly maşgalalara öýleriň açarlary gowşuryldy. Döwrebap öýleriň açarlaryny ýüzlerine sylan öý eýeleri Şa serpaýy üçin hormatly Prezidentimize alkyş aýtdylar.

Türkmenistanyň Prezidentiniň Karary bilen döredilen «Türkmen kaolin» açyk görnüşli paýdarlar jemgyýetiniň welaýat merkezi Balkanabat şäheriniň golaýynda täze önümhanasy işläp başlady. Kaolin önümhanasynda düýpli abatlaýyş-bejeriş işleri geçirilip, onuň durky doly täzelendi. Ýyllyk taslama kuwwatlylygy ýokary hilli, dünýä ölçeglerine laýyk gelýän önümleriň 20 müň tonnasyny öndürmäge barabar bolan kaolin önümhanasy döwrebap enjamlar hem-de tehnologiýalar bilen üpjün edildi.   

Mälim bolşy ýaly, kaolin magdany dag jynslarynyň dargamagy netijesinde emele gelýär. Onuň düzüminde kwarsyň, demriň we titanyň oksidleriniň dänejikleri saklanýar. Täze kaolin önümhanasy üçin çig mal serişdesi Türkmenbaşy etrabynyň Gyzylgaýa şäherçesiniň golaýyndan gazylyp alynýar. Önümhanada öndürilýän önüm eýýäm içerki bazaryň sarp edijilerine ugradylyp başlandy we ony geljekde daşary ýurtlara ibermek hem göz öňünde tutulýar.

Kaolin ak sementi, elektrotehniki izolýatorlary, kosmetika we parfýumeriýa önümlerini öndürmekde, farfor gap-gaçlaryň, kagyz, karton, rezin, boýag, şeýle hem arassaçylyk serişdeleriniň (sabynyň, diş pastasynyň, şampunlaryň) önümçiliginde, plastmassadan ýasalýan önümlere dolduryjy maddalar hökmünde giňden peýdalanylýar.

Welaýat döwlet drama teatrynyň topary ýakynda çagalar üçin täze döreden sahna oýnuny görkezdi. Ýaýlym Garaýewiň «Kejir kürre» atly eseri esasynda teatryň ýokary derejeli artisti Arslan Hojagurbanowyň sahnalaşdyran oýnunyň dowamynda döwrebap sazlaryň ýaňlanmagy beýan edilýän wakalary doly göz öňüne getirmäge mümkinçilik berdi. Çagalary ata Watany, ene topragy, zähmeti söýmeklige çagyrýan sahna eseri hormatly Prezidentimiziň tagallasy bilen ýurdumyzda amala aşyrylýan döwrebap işleriň, bagtyýar durmuşymyzyň waspy bolup, ýaş tomaşaçylara joşgun paýlady.

Artistler Jennet Şadurdyýewanyň, Juma Abaýewiň, Berdi Berdiýewiň, Ogulşirin Nowruzowanyň, Arzygül Arazmuhammedowanyň, Bäşim Ataýewiň ýerine ýetiren keşpleri çagalarda ýakymly täsirleri galdyrdy.

2022-nji ýylyň jemleri boýunça ýurdumyzyň iň gowy etraby bolan

welaýatymyzyň Magtymguly etrabyna hormatly Prezidentimiziň Buýrugyna

laýyklykda, degişli baýragy — 1 million amerikan dollaryny gowşurmak dabarasy

sözüň doly manysynda baýramçylyk ruhuna beslendi. Esasy dabaralaryň geçýän

ýeri bolan Magtymguly Pyragy muzeýiniň öňündäki meýdançanyň baýramçylyk

bezegi özüne çekiji boldy. Ak öýleriň owadan hatary, ajaýyp halylar bilen bezelen

telärler, giň gerimde ýaýbaňlandyrylan sergi dabara millilik öwüşginini çaýdy. Bu

ýerde buýsanjy wakanyň şanyna guralan toý dabarasynyň hormatly myhmanlary

bolan Türkmenistanyň Kärdeşler arkalaşyklarynyň Milli merkeziniň, welaýat, etrap

häkimlikleriniň jogapkär ýolbaşçylaryny, Mejlisiň deputatlaryny, jemgyýetçilik

guramalarynyň, ýaşuly nesliň wekillerini hem-de etrabyň köp sanly ýaşaýjylaryny

joşgunly aýdym-sazlaryň hoş owazy garşylady.

Dabara gatnaşyjylar giňden ýaýbaňlandyrylan sergilerde ýerleşdirilen muzeý

gymmatlyklaryny, halydyr keçe önümlerini, senetçilik, zergärçilik işlerini, surat

eserlerini, sport enjamlaryny uly gyzyklanma bilen synladylar. Şeýle-de olar

sergileriň üsti bilen sebitiň oba hojalygynyň, dokma pudagynyň ýeten sepgitlerine,

hususyýetçileriň gazanýan üstünliklerine aýdyň göz ýetirdiler. Türkmen milli

göreşi, ýaglyga towusmak boýunça geçirilen ýaryşlar dabaranyň şowhunyny

artdyrdy. Hatara düzülen toý gazanlarynda taýýarlanan milli tagamlar myhmanlara

hödür-kerem edildi.

Magtymguly Pyragy muzeýiniň girelgesinde guralan kitaplaryň we surat

eserleriniň sergisi hem aýratyn özüne çekiji boldy. Onda Gahryman

Arkadagymyzyň jöwher paýhasyndan döräp, giň okyjylar köpçüliginiň gyzgyn

söýgüsini gazanan kitaplar, beýik söz ussady Magtymguly Pyragynyň eserleri,

şahyra we etrabyň gözel künjeklerine, Watanymyzyň ösüşlerine bagyşlanan

suratlar ýerleşdirildi.

Şunuň ýaly täsirli pursatlardan ruhy lezzet alan dabara gatnaşyjylar soňra

muzeýiň mejlisler jaýynda «Alkyş Size, şöhrat Size, Arkadagly Serdarymyz!»

diýen at bilen geçirilen dabaraly maslahata gatnaşdylar. Onda, ilki bilen, hormatly

Prezidentimiziň 2022-nji ýylda ýurdumyzda iň gowy diýlip yglan edilen

Magtymguly etrabynyň ähli ilatyna iberen Gutlagy okaldy. Arkadagly

Serdarymyzyň Gutlagy dowamly ýaňlanan şowhunly el çarpyşmalar hem-de

dilleriň senasyna öwrülen alkyşly sözler bilen garşylandy.

Dabarada etrabyň ýaşaýjylaryny iň gowy etrap diýen belent ada mynasyp

bolandyklary mynasybetli aýdylan gutlaglar biri-birine utgaşdy. Arkadagly

Serdarymyzyň Şa serpaýynyň olary täze zähmet üstünliklerine ruhlandyrjakdygy

buýsanç bilen bellenilip geçildi. Çykyş edenleriň nygtaýyşlary ýaly, bu şanly waka

diňe bir Magtymguly etrabynyň däl, eýsem, tutuş welaýatymyzyň ilatyny

şatlandyrdy, begendirdi. «Arkadag Serdarly bagtyýar ýaşlar ýylynyň» bu taryhy

wakasy gündogaryň beýik akyldary hem-de nusgawy şahyry Magtymguly

Pyragynyň doglan gününiň 300 ýyllygyna uly taýýarlyklary görýän sebitiň

ilatynyň toý şatlygyny artdyrdy.

Dabaraly maslahatda öz halkynyň bagtyýarlygy üçin nusgalyk tagallalary

edýän Gahryman Arkadagymyza hem-de Arkadagly Serdarymyza tüýs ýürekden

çykýan alkyş sözleri aýdyldy. Türkmen halkynyň Milli Lideriniň hem-de hormatly

Prezidentimiziň janlarynyň sag, ömürleriniň uzak, belent başlarynyň aman

bolmagy, beýik işleriniň hemişe rowaçlyklara beslenmegi dileg edildi.

Dabaraly maslahatda hormatly Prezidentimiziň adyna Ýüzlenme kabul

edildi.

Dabara gatnaşyjylar Magtymguly Pyragy muzeýine gezelenç edip, bu ýerdäki

taryhy gymmatlyklar bilen hem ýakyndan tanyşdylar.