Balkanabat şäherindäki welaýat döwlet drama teatrynda Gahryman
Arkadagymyzyň «Mertler Watany beýgeldýär» atly kitaby esasynda režissýor
Öwezmämmet Galandarowyň sahnalaşdyran «Mukaddesdir bu Watan» atly
spektaklynyň ilkinji görkezilişiniň mysalynda hem muňa aýdyň göz ýetirmek
boldy. Gymmatly eseri esasynda goýlan bu sahna oýnunda Watany söýmekligiň,
onuň her bir daban topragy üçin janyny goýan şahsyýetleriň nusgalyk ýollary,
sabyr-kanagatlylyk, ýokary adamkärçilik açylyp görkezilýär. Onda Bekel begiň
(keşbi ýerine ýetiren Ýakup Öwezow), Ymran begiň (keşbi ýerine ýetiren Parahat
Elýasow), Baýandyr hanyň (keşbi ýerine ýetiren Hydyr Hydyrow), Salyr Gazanyň
(keşbi ýerine ýetiren Arslan Mämmetgulyýew), Gorkut atanyň (keşbi ýerine
ýetiren Arslan Hojagurbanow), Nurhatynyň (keşbi ýerine ýetiren Ogulbeg
Annagylyjowa), Seçek gyzyň (keşbi ýerine ýetiren Gülsoltan Arazgeldiýewa)
Watana, il-güne bolan söýgüsi, gahrymançylykdan doly durmuş ýoly diýseň
gyzykly beýan edilýär.
Halkymyzyň watanperwerlik, dost-doganlyk, agzybirlik, jebislik ýaly asylly
ýol-ýörelgeleri täze sahna oýnunyň içinden eriş-argaç bolup geçýär. Oňa tomaşa
edeniňde oýnuň režissýorynyň, dürli häsiýetli gahrymanlaryň keşplerini
janlandyran artistleriň, egin-eşikleri taýýarlanlaryň, sahna, yşyk hem saz
bezeglerini ýerine ýetirenleriň yhlasly zähmetiniň ýerine düşendigine göz
ýetirýärsiň. Keşpleriň ynandyryjy bolmagy, tomaşaçylaryň ýadynda galmagy üçin
köp zähmet siňdirilendigini, sahna bezeginiň beýan edilýän wakalar bilen
özboluşly sazlaşygy döredendigini hem aýratyn bellemek gerek.
Welaýat medeniýet müdirliginiň we Türkmenistanyň Magtymguly adyndaky
Ýaşlar guramasynyň welaýat geňeşiniň bilelikde guramaklarynda Balkanabat
şäherindäki «Miras» toý dabaralary merkezinde «Mirasa sarpamyz has beýgelder
bizi, Arkadag Serdarly bagtyýar ýaşlar ýyly» atly bäsleşik geçirildi. Oňa
welaýatymyzyň etrap-şäher medeniýet merkezleriniň döredijilik toparlary
gatnaşdylar.
Gyzykly geçen bäsleşikde onuň birinji şerti, ýagny tanslary we folklor
çykyşlaryny ýerine ýetirmek boýunça Magtymguly etrabynyň «Elwan» tans topary
baş baýragy, Gyzylarbat etrabynyň «Şelpeler» tans topary birinji, Türkmenbaşy
etrabynyň «Kenar» tans topary ikinji, Bereket etrabynyň «Güljan» tans topary
üçünji orunlary eýelediler. Ümeçilik däplerini açyp görkezýän ikinji şert boýunça
Gyzylarbat etrabynyň «Köpetdag» halk folklor topary baş baýraga, Türkmenbaşy
etrabynyň «Kenar» tans topary birinji, Magtymguly etrabynyň «Sumbar» halk
folklor topary ikinji, Esenguly etrabynyň «Küştdepdi» folklor topary üçünji
orunlara mynasyp boldular.
Jemgyýetçilik guramalarynyň, edara-kärhanalaryň işgärleriniň, mährem
eneleriň, il sylagly ýaşulularyň, ýaşlaryň gatnaşmaklarynda Türkmenistanyň
Kärdeşler arkalaşyklarynyň welaýat birleşmesiniň, Türkmenistanyň Zenanlar
birleşiginiň welaýat bölüminiň, Türkmenistanyň Parahatçylyk gaznasynyň
Balkanabat şäher bölüminiň hem-de welaýat kitaphanasynyň bilelikde
guramaklarynda «Arkadagyň ýörelgesi — nusgalyk görelde» atly maslahat
geçirildi.
Türkmenistanyň Halk maslahatynyň döredilmegine bagyşlanyp geçirilen bu
maslahatyň dowamynda Türkmenistanyň Milli Geňeşiniň, ýurdumyzyň
jemgyýetçilik wekilleriniň bilelikdäki mejlisinde Türkmenistanyň Halk
Maslahatynyň döredilmegi, Gahryman Arkadagymyzyň Türkmenistanyň Halk
Maslahatynyň Başlygy wezipesine bellenilmegi we türkmen halkynyň Milli Lideri
hökmünde kanuny taýdan ykrar edilmegi barada giňişleýin gürrüň edildi. Bu
taryhy çözgütleriň ýurdumyzyň her bir raýatynyň kalbynda çäksiz buýsanç
döredendigi barada bellenilip, Diýarymyzyň has-da gülläp ösmegi, halkymyzyň
bagtyýar durmuşy üçin taýsyz tagallalary edýän hormatly Prezidentimize tüýs
ýürekden alkyş aýdyldy.
«Arkadag Serdarly bagtyýar ýaşlar ýylynyň» 28-nji ýanwarynda
paýtagtymyz Aşgabat şäherinde Türkmenistanyň Magtymguly adyndaky Ýaşlar
guramasynyň VIII gurultaýynyň üstünlikli geçirilmegi mynasybetli
Türkmenistanyň Magtymguly adyndaky Ýaşlar guramasynyň Balkan welaýat
geňeşi tarapyndan guramanyň işgärleriniň, işjeň agzalarynyň, mekdep
okuwçylarynyň, Balkanabat şäherindäki ýokary we orta hünär okuw
mekdeplerinde bilim alýan talyp ýaşlaryň arasynda hoşallyk maslahaty geçirildi.
Onda çykyş edenler Berkarar döwletiň täze eýýamynyň Galkynyşy döwründe
gujurgaýrat bilen döredijilikli zähmet çekmek ýaşlaryň Watan öňündäki
mukaddes borjudyr. Eziz Watanymyza hyzmat etmekden belent borjuň ýokdugyny
hemişe ündeýän hormatly Prezidentimiziň, türkmen halkynyň Milli Lideri
Gahryman Arkadagymyzyň bu ugurda görkezýän şahsy göreldesi ählimiz üçin
ajaýyp nusgadyr, durmuş uniwersitetidir diýip belläp geçdiler.
Hoşallyk maslahatynyň dowamynda şeýle ajaýyp döwletli-döwrany peşgeş
beren Gahryman Arkadygymyza, Arkadagly Serdarymyza tüýs ýürekden alkyş
sözleri aýdyldy.
Üstümizdäki ýylyň 21-nji ýanwarynda geçirilen Türkmenistanyň Milli
Geňeşiniň, ýurdumyzyň jemgyýetçilik wekilleriniň bilelikdäki mejlisinde halk
häkimiýetiniň ýokary wekilçilikli edarasynyň — Türkmenistanyň Halk
Maslahatynyň döredilmegi, Gahryman Arkadagymyzyň türkmen halkynyň Milli
Lideri diýlip kanun esasynda ykrar edilmegi jemgyýetiň demokratik ösüşini hil
taýdan täze derejä çykarmakda möhüm ädim boldy. Bu möhüm taryhy wakany we
onda kabul edilen çözgütleri ilat arasynda wagyz etmek maksady bilen welaýat
häkimliginiň, Türkmenistanyň Zenanlar birleşiginiň welaýat bölüminiň, welaýatyň
jemgyýetçilik guramalarynyň bilelikde guramaklarynda «Türkmeniň döwletlilik
ýoly ak geljege dowam bolsun!» diýen at bilen dabaraly maslahat geçirildi.
Welaýat häkimliginiň mejlisler zalynda geçen maslahatda ýurdumyzyň
ykdysadyýetiniň ähli pudaklarynda we medeni-durmuş ulgamynda hormatly
Prezidentimiziň baştutanlygynda gazanylýan ägirt uly ösüşler, ýokary üstünlikler
dogrusynda giňişleýin gürrüň edildi. Çykyş edenleriň aýratyn nygtaýyşlary ýaly,
Gahryman Arkadagymyzyň Türkmenistanyň Halk Maslahatynyň Başlygy
wezipesine bellenilmegi, halkymyzyň öz Milli Liderine bildirýän uly ynamynyň,
beýik söýgüsiniň hem hormatynyň beýanydyr. Taryhy maslahatda kabul edilen il-
ýurt bähbitli çözgütler eşretli durmuşymyzy, bagtyýar ýaşaýşymyzy üpjün
etmekde, döwletimiziň berkararlygyny has-da berkitmekde, milli
gymmatlyklarymyzy dünýä ýaýmakda asyrlara barabar işleri bitiren Milli
Liderimize halkymyzyň alkyşy bolup, köňüllere doldy.
Dabaraly maslahatda welaýatymyzyň medeniýet, sungat ussatlarynyň, talyp
ýaşlaryň döwrebap aýdym-sazly çykyşlaryna giň orun berildi. Köňüllere joşgun,
ylham eçilen aýdymdyr tanslar maslahata gatnaşyjylara ruhy lezzet paýlap, olaryň
Gahryman Arkadagymyza, Arkadagly Serdarymyza bolan hoşallyklaryny,
buýsançlaryny has-da artdyrdy.
Maslahatyň ahyrynda türkmen halkynyň Milli Lideri — Gahryman
Arkadagymyza we Arkadagly Serdarymyza Ýüzlenme kabul edildi.