«Garaşsyzlyk ganatym — galkynan medeniýetim» diýen at bilen welaýat medeniýet müdirliginiň, Türkmenistanyň Kärdeşler arkalaşyklarynyň welaýat birleşmesiniň bilelikde guramaklarynda geçirilen bäsleşige welaýatymyzyň etrapdyr şäherlerinden gelen folklor toparlary gatnaşdylar. Berkarar döwletiň täze eýýamynyň Galkynyşy döwründe hormatly Prezidentimiziň milli medeniýetimizi ösdürmek baradaky tabşyryklaryny durmuşa geçirmek hem-de ösüp gelýän ýaş nesli milli ruhda terbiýelemek, türkmen halkynyň baý döredijiligini, milli folklor mirasynyň hazynasyny has-da baýlaşdyrmak maksady bilen geçirilen bäsleşik iki şertden ybarat boldy. Folklor toparlary şahyrana halk döredijilik eserlerini ýerine ýetirmekde, folklor çykyşlarynyň üsti bilen milli toý däp-dessurlaryny sahnalaşdyrmakda ukyp-başarnyklaryny görkezdiler.

Bäsleşikde Balkanabat şäher medeniýet bölüminiň «Şapak» folklor topary baş baýraga mynasyp boldy. Gyzylarbat etrabynyň medeniýet bölüminiň «Köpetdag» folklor topary birinji, Magtymguly etrabynyň medeniýet bölüminiň «Sumbar» folklor topary ikinji, Etrek etrabynyň medeniýet bölüminiň «Etrek nagmalary» folklor topary üçünji orunlary eýelediler.

Türkmenistanyň Halk Maslahatynyň mejlisi we onda kabul edilen çözgütler ýurdumyzyň taryhyna altyn harplar bilen ýazylyp, unudylmajak wakalary peşgeş berdi. Welaýat häkimliginiň mejlisler zalynda «Türkmen halkynyň Milli Lideriniň nusgalyk döwlet taglymaty we Arkadagly Gahryman Serdarymyzyň baştutanlygynda ösüşiň demokratik ýoly bilen beýik geljege tarap» ady bilen geçirilen dabaraly maslahat bu taryhy mejlise bagyşlandy. Oňa  jemgyýetçilik guramalarynyň wekilleri, dürli ulgamlarda zähmet çekýän adamlar, hormatly ýaşulular, mährem eneler, bagtyýar ýaşlar gatnaşdylar.

Maslahatda çykyş edenler türkmen halkynyň Milli Lideri Gahryman Arkadagymyz Gurbanguly Berdimuhamedowyň başlyklyk etmeginde geçirilen Türkmenistanyň Halk Maslahatynyň mejlisiniň taryhy ähmiýetiniň uludygyny aýratyn nygtap geçdiler. Ýokary buýsanja beslenen çykyşlarda bellenişi ýaly, halk bilen geňeşmek we maslahat salmak baradaky asylly däplerimize, milli demokratik ýörelgelerimize esaslanyp geçirilen taryhy mejlisde Gahryman Arkadagymyzyň we Arkadagly Gahryman Serdarymyzyň eden maksatnamalaýyn çykyşlarynda Berkarar döwletiň täze eýýamynyň Galkynyşy döwründe ýurdumyzy mundan beýläk-de ähli taraplaýyn ösdürmekde, badalga berlen özgertmeleri durmuşa geçirmekde, halkymyzyň ýaşaýyş-durmuş derejesini ýokarlandyrmakda öňde durýan wezipeler öz beýanyny tapdy. Gahryman Arkadagymyzyň nusgalyk döwlet taglymatynyň Garaşsyzlygymyzyň we Bitaraplygymyzyň gazananlaryny berkitmekde, jemgyýeti demokratiýalaşdyrmakda, döwlet dolandyryş ulgamyny kämilleşdirmekde, halk häkimiýetliligini pugtalandyrmakda, demokratik, hukuk we dünýewi döwletimizi ösdürmekde esas bolup durýandygyny aýratyn bellemek gerek. Hormatly Prezidentimize Türkmenistanyň iň ýokary tapawutlandyryş derejesiniň — «Altyn Aý» altyn nyşanynyň gowşurylmagy we   Türkmenistanyň Gahrymany diýen belent adyň dakylmagy halkymyzda ýokary ruhubelentlik duýgusyny döretdi. Munuň özi Arkadagly Serdarymyzyň «Watan diňe halky bilen Watandyr! Döwlet diňe halky bilen döwletdir!» diýen baş ýörelgesine esaslanyp durmuşa geçirýän beýik işlerine, jemgyýetiň we döwletiň öňünde bitiren aýratyn görnükli hyzmatlaryna berlen ýokary bahadyr.  Maslahatda şular barada durlup geçilmek bilen,  halkymyzyň röwşen geljegi, abadan we bagtyýar durmuşy  ugrunda taýsyz tagallalary edýän Gahryman Arkadagymyzyň we hormatly Prezidentimiziň janlarynyň sag, ömürleriniň uzak, adam hakyndaky alada ýugrulan tutumly işleriniň rowaç bolmagy arzuw edildi.

Dabaraly maslahatda welaýatymyzyň sungat ussatlary çykyş etdiler. Bu ýere ýygnananlara ruhy lezzet beren aýdym-sazly çykyşlarda Gahryman Arkadagymyzyň, Arkadagly Gahryman Serdarymyzyň alyp barýan nusgalyk işleriniň, ajaýyp döwrümizde ýurdumyzyň gazanýan beýik ösüşleriniň, mukaddes Garaşsyzlygymyzyň, il agzybirliginiň waspy ýetirildi.

Ýaşulularyň halkara güni welaýatymyzda ýokary ruhubelentlikde bellenilip geçildi. Baýramçylyk mynasybetli welaýat häkimliginiň, Türkmenistanyň Zenanlar birleşiginiň welaýat bölüminiň,  jemgyýetçilik guramalarynyň bilelikde geçiren dabarasynda çykyş edenler Gahryman Arkadagymyzyň, Arkadagly Gahryman Serdarymyzyň çäksiz aladalary netijesinde ýaşuly nesle sylag-sarpanyň egsilmezdigi, olaryň her biriniň ählitaraplaýyn alada bilen gurşalýandygy, eziz Diýarymyzda il-ýurt bähbitli amala aşyrylýan ägirt uly işleriň her biriniň pähim-paýhasyň mekdebi bolan ýaşulular bilen maslahatlaşyp çözülýändigi barada buýsanç bilen aýtdylar. 

Welaýatyň  medeniýet we sungat  ussatlarynyň çykyşlaryna hem baýramçylyk çäresinde giň orun berildi. Olaryň Berkarar  döwletiň täze eýýamynyň Galkynyşy  döwrüniň  eşretlerini, Arkadagly Gahryman  Serdarymyzyň il-ýurt bähbitli işlerini, pähimdar gojalarymyzy, mährem  enelerimizi wasp edip ýerine ýetiren aýdym-sazlary belentden ýaňlandy. 

Dabaranyň dowamynda il-sylagly ýaşululara, mährem enelere welaýatyň jemgyýetçilik guramalary tarapyndan baýramçylyk sowgatlary dabaraly ýagdaýda  gowşuryldy.

Welaýatyň il sylagly ýaşulularynyň gatnaşmagynda Balkanabatdaky «Türkmeniň ak öýi» binasyna, welaýat Taryhy we ülkäni öwreniş muzeýine, welaýat kitaphanasyna guralan gezelençler aýratyn täsirli boldy. 

Ýaşulularyň halkara gününiň baýramçylyk dabaralary soňra welaýat merkezindäki  akyldar  şahyrymyz  Magtymguly Pyragynyň nurana heýkeliniň öňündäki gözel meýdançada dowam etdi. Welaýat ýörite sungat mekdebiniň talyp ýaşlarynyň hem-de  welaýatyň adygan aýdym-saz toparlarynyň ýerine ýetiren döwrebap aýdym-sazlarynda Arkadag  Serdarly bagtyýar ýaşlar ýylynyň rowaçlyklary, ýaşululara goýulýan sylag-sarpa, bolelin ýaşaýşymyz, bagtly durmuşymyz öz mynasyp beýanyny tapdy.

Welaýat döwlet drama teatrynda Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň bilelikde yglan eden «Türkmen keşdeçilik sungaty — milli mirasymyz» atly bäsleşiginiň welaýat tapgyry geçirilip, ol türkmen keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilmegi mynasybetli guraldy.

Bäsleşige gatnaşan gelin-gyzlar onuň şertlerine laýyklykda, keşde çekmäge taýýarlyk görüşleri barada gürrüň berdiler. Bellenen wagtyň dowamynda keşde çekip, saýlap alan nagyşlarynyň waspyny çeper beýan etdiler. Özleriniň dürli nagyşlar bilen sünnälän milli lybaslaryny geýnip, keşdeleriň taryhyny açyp görkezýän rowaýatlary gürrüň berdiler, keşdeleri goşgularyň we gazallaryň üsti bilen tarypladylar.

Emin agzalarynyň gelen netijesi boýunça Balkanabat şäherindäki 16-njy orta mekdebiň mugallymy Gurbangül Esenowa, Türkmenistanyň «Senagat» paýdarlar täjirçilik bankynyň Balkanabat şäher şahamçasynyň baş hünärmeni Gülmira Mämmedowa, Türkmenistanyň Telewideniýe, radiogepleşikler we kinematografiýa baradaky döwlet komitetiniň welaýat teleradio studiýasynyň gepleşikleri gurnaýjy we taýýarlaýjysy Näzgül Annagulyýewa bäsleşigiň ýeňijileri diýlip yglan edildiler we onuň döwlet tapgyryna gatnaşmaga hukuk gazandylar.

Hormatly Prezidentimiz Türkmenistanyň çäginde hemişelik ýaşaýan, raýatlygy bolmadyk adamlaryň  uly toparyny Türkmenistanyň raýatlygyna kabul etmek  hem-de  daşary ýurt raýatlaryna Türkmenistanda ýaşamak üçin ygtyýarnamalary bermek barada resminamalara gol çekdi. Ýurdumyzyň ähli ýerlerinde bolşy ýaly,  welaýatymyzda  hem Türkmenistanyň raýatlygyna kabul edilen adamlara Türkmenistanyň pasportlaryny we daşary ýurt raýatlaryna Türkmenistanda ýaşamak üçin ygtyýarnamalary gowşurmak dabarasy uly ruhubelentlige beslendi.

Welaýat häkimliginiň mejlisler zalynda geçen dabarada welaýatymyzda ýaşaýan adamlaryň 64-sine Türkmenistanyň raýatlyk pasportlary, şeýle hem daşary ýurtlylaryň 19-syna Türkmenistanda ýaşamak üçin ygtyýarnamalar gowşuryldy. Pasportlara we ygtyýarnamalara  mynasyp bolan adamlar özleriniň ýürek buýsançlaryny beýan etdiler.

          Soňra dabara aýdym-sazly çykyşlar bilen dowam etdi. Medeniýet we sungat ussatlarynyň ýerine ýetiren buýsançly çykyşlarynda ata Watanymyzyň ajaýyp zamanadaky ösüşleriniň waspy ýetirildi.