Welaýat häkimliginiň mejlisler jaýynda welaýat häkimliginiň hem-de welaýat medeniýet müdirliginiň bilelikde guramaklarynda «Magtymguly Pyragynyň mirasy — parahatçylygyň, dostlugyň, hoşniýetli hyzmatdaşlygyň binýady» atly dabaraly maslahat geçirildi. Jemgyýetçilik guramalarynyň, edara-kärhanalaryň wekilleriniň, il sylagly ýaşulularyň, kümüş saçly eneleriň hem-de talyp ýaşlaryň gatnaşmaklarynda geçirilen maslahat ýokary ruhubelentlige beslendi.

Maslahatda çykyş edenler hormatly Prezidentimiziň başlyklyk etmeginde, daşary ýurtlaryň döwlet we hökümet ýolbaşçylarynyň gatnaşmaklarynda paýtagtymyz Aşgabatda geçirilen «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň hem-de Arkadagly Gahryman Serdarymyzyň onda eden çuň many-mazmunly çykyşynyň taryhy ähmiýete eýe bolandygyny buýsanç bilen nygtadylar. Akyldar şahyrymyz Magtymguly Pyragynyň döredijiliginiň bütin Ýer ýüzünde uly meşhurlyga eýedigi, onuň goşgularynyň dünýä dillerine terjime edilip, söýlüp okalýandygy, akyldaryň parahatçylygy, aýdyň geljegi, bagtyýar durmuşy arzuwlan şahyrdygy we şol arzuwlarynyň ajaýyp zamanamyzda hasyl bolandygy barada gürrüň etdiler. Berkarar döwletiň täze eýýamynyň Galkynyşy döwründe şahyra goýulýan sarpanyň has ýokary derejelere göterilýändigine paýtagtymyzda geçirilen halkara forum aýdyň şaýatlyk edýändigini belläp, beýik söz ussadynyň at-abraýyny arşa göteren Gahryman Arkadagymyza hem-de Arkadagly Gahryman Serdarymyza  tüýs ýürekden alkyş aýtdylar.

Dabaraly maslahatda welaýatymyzyň sungat ussatlarynyň joşgunly çykyşlary ýaýbaňlandyrylyp, olarda Watanymyzyň, ajaýyp döwrümiziň, hormatly Prezidentimiziň durmuşa geçirýän beýik işleriniň, Magtymguly  Pyragynyň waspy belentden ýetirildi.

Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň, ÝUNESKO-nyň işleri barada Türkmenistanyň Milli toparynyň sekretariatynyň hem-de Türkmenistanyň Telewideniýe, radiogepleşikler we kinematografiýa baradaky döwlet komitetiniň bilelikde yglan eden «Türkmen keşdeçilik sungaty — milli mirasymyz» atly bäsleşiginiň welaýat tapgyry Balkanabat şäherindäki Türkmeniň «Ak öýi» binasynda geçirildi.

Halkymyzyň medeni mirasynyň görnükli nusgalarynyň biri bolan türkmen keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilmegine bagyşlanyp geçirilen bäsleşik ene-mamalarymyzdan gelýän keşdeçilik sungatyny mynasyp dowam etdirmegi, ýaşlarda bu sungata bolan söýgini artdyrmagy maksat edindi.

Bäsleşige gatnaşan zenanlar onuň şertlerine laýyklykda, türkmen keşdeçilik sungatyny ösdürmäge goşýan goşantlary barada buýsanç bilen gürrüň berdiler. Olar ýaka, tahýa, kürte keşdelemekde taýýarlyk işlerini birme-bir ýerine ýetirip, özleriniň saýlap alan keşdelerini çeper sözlerde wasp etdiler. Olaryň keşdelejek işlerini dyzlarynyň üstlerinde dogry goýuşlary, iňňe tutuşlary, sanjyşlary, işilen ýüpekleri ýerligine görä ulanyşlary emin agzalary tarapyndan aýratyn gözegçilikde saklanyldy.

Zenanlaryň dürli nagyşlar bilen sünnälän milli lybaslarynyň waspyny goşgularyň, rowaýatlaryň, gazallaryň üsti bilen ýerine ýetirmekleri has-da täsirli boldy.

Milli mirasymyzy aýawly saklamaga, gadymy nusgalara täze öwüşgin çaýmaga, olary ýaş nesillerimize ýetirmäge ähli mümkinçilikleri döredýän Gahryman Arkadagymyza, hormatly Prezidentimize alkyş sözleri çäräniň dowamynda öwran-öwran dile getirildi.

Uly ruhubelentlige beslenen bäsleşigiň jemi jemlenilende, Gyzylarbat etrabyndaky 22-nji orta mekdebiň mugallymy Oguljeren Amangeldiýewa we şol etrabyň 28-nji orta mekdebiniň mugallymy Laçyn Saryýewa ýeňijiler diýlip yglan edildiler we olar bäsleşigiň döwlet tapgyryna gatnaşmaga hukuk gazandylar.  

Bäsleşige gatnaşanlara Türkmenistanyň Kärdeşler arkalaşyklarynyň welaýat birleşmesi tarapyndan sowgatlar dabaraly ýagdaýda gowşuryldy.

Häzirki günlerde welaýatymyzyň pagta meýdanlarynda zähmet joşýar. Pagta kabul ediş bölümlerinde gün-günden beýgelýän «ak altyn» harmanlary welaýatymyzyň pagtaçylarynyň «Pähim-paýhas ummany Magtymguly Pyragy» ýylynda belent sepgitleri eýelejekdiklerine güwä geçýär.

Meýdan düşelgelerinde geçirilýän aýdym-sazly dabaralar zähmet adamlaryny yhlasly işlemäge ruhlandyrýar. Şeýle çäreleriň biri ýakynda welaýat häkimliginiň, welaýatyň jemgyýetçilik guramalarynyň bilelikde guramaklarynda Gyzylarbat etrabynyň «ak altynly» meýdanlarynda geçirildi. Sungat ussatlarynyň joşgunly çykyşlarynda Berkarar döwletiň täze eýýamynyň Galkynyşy döwrüniň, hormatly Prezidentimiziň il-ýurt bähbitli, dünýä ähmiýetli beýik işleriniň, eşretli durmuşymyzyň, edermen babadaýhanlarymyzyň gazanýan zähmet üstünlikleriniň waspy ýetirildi. Günortan arakesme mahalynda ýaňlanan döwrebap aýdym-sazlar, ýerine ýetirilen joşgunly tanslar, şowhunly halk döredijilik çykyşlarydyr gülküli sahnalar pagtaçylara ruhy lezzet paýlap, olary täze zähmet ýeňişlerine ruhlandyrdy.

Meýdan düşelgesinde guralan aýdym-sazly dabaranyň dowamynda pagta ýygymynda tapawutlanyp işleýän kärendeçilere, kombaýnçylara, awtoulag sürüjilerine Türkmenistanyň Demokratik, Agrar partiýalarynyň welaýat komitetleriniň, Türkmenistanyň Kärdeşler arkalaşyklarynyň welaýat birleşmesiniň, Türkmenistanyň Magtymguly adyndaky Ýaşlar guramasynyň welaýat geňeşiniň sowgatlary dabaraly ýagdaýda gowşuryldy.

Bu ýerde amaly-haşam sungatynyň, oba hojalyk önümleriniň sergileri guralyp, ekerançylyga degişli milli däp-dessurlar, azyk önümleriniň taýýarlanylyşy janlandyryldy. Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik eseri esasynda taýýarlanylan melhemlik içgiler pagtaçy kärendeçilere hödürlendi.

«Pähim-paýhas ummany Magtymguly Pyragy» ýylyny ýokary zähmet ýeňişlerine besleýän pagtaçylar oba hojalyk pudagyny düýpli ösdürmäge berýän hemaýaty, goldawlary üçin Gahryman Arkadagymyza hem-de Arkadagly Gahryman Serdarymyza hoşallyk sözlerini aýtdylar.

Ýaşulularyň halkara güni mynasybetli welaýat häkimliginiň, Türkmenistanyň Zenanlar birleşiginiň welaýat bölüminiň jemgyýetçilik guramalary bilen bilelikde geçiren baýramçylyk dabarasynyň arzyly myhmanlary dilleri senaly aksakgal gojalar, mährem eneler, zähmet weteranlary boldular. Baýramçylyk dabarasynda Gahryman Arkadagymyzyň, Arkadagly Gahryman Serdarymyzyň aladalary netijesinde ýaşuly nesle sylag-sarpanyň egsilmezdigi, eziz Diýarymyzda il-ýurt bähbitli amala aşyrylýan ägirt uly işleriň her birine pähim-paýhasyň mekdebi bolan ýaşulular bilen maslahatly badalga berilýändigi barada buýsanç bilen gürrüň edildi. Watanymyzyň Garaşsyzlygynyň şanly 33 ýyllyk baýramçylygy mynasybetli döwlet sylaglaryna we hormatly atlara mynasyp bolan ildeşlerimiziň joşgunly çykyşlary dowamly el çarpyşmalar bilen garşylandy.

Dabaranyň dowamynda il-sylagly ýaşululara, mährem enelere welaýatyň jemgyýetçilik guramalarynyň baýramçylyk sowgatlary dabaraly ýagdaýda  gowşuryldy.

Baýramçylyk dabaralary soňra welaýat merkezindäki «Türkmeniň ak öýi» binasynyň öňündäki meýdançada dowam etdi. Welaýat ýörite sungat mekdebiniň dutarçy talyp ýaşlarynyň hem-de  welaýatyň adygan aýdym-saz toparlarynyň ýerine ýetiren döwrebap aýdym-sazlarynda «Pähim paýhas ummany Magtymguly Pyragy» ýylynyň rowaçlyklarynyň, ýaşululara goýulýan sylag-sarpanyň, eşretli ýaşaýşymyzyň, bagtly durmuşymyzyň waspy mynasyp beýanyny tapdy.        

Welaýatyň il sylagly ýaşulularynyň gatnaşmagynda «Awaza» milli syýahatçylyk zolagyna, welaýat kitaphanasyna, welaýat Taryhy we ülkäni öwreniş we Magtymguly Pyragy muzeýlerine guralan gezelençler hem täsirli boldy. 

Garaşsyzlygymyzyň şanly 33 ýyllygy welaýatymyzda ýokary ruhubelentlikde bellenilip geçildi. Esasy dabara Balkanabat şäherindäki Baş baýdak meýdançasynda geçirilip, oňa welaýat we şäher häkimlikleriniň, jemgyýetçilik guramalarynyň, dürli pudaklaryň işgärleri, ýaşuly nesliň wekilleri, ýaşlar, şäheriň ýaşaýjylary gatnaşdylar.

Döwlet senamyzyň belentden ýaňlanyp, ýaşyl Tugumyzyň al-asmana galdyrylmagy bilen baýramçylyk dabarasyna badalga berildi. Hormatly Prezidentimiziň Garaşsyz, hemişelik Bitarap Türkmenistanyň halkyna şanly Garaşsyzlygymyzyň 33 ýyllyk baýramy mynasybetli iberen Gutlagy dabaraly ýagdaýda okalyp, ol şowhunly el çarpyşmalar bilen garşylandy. Bu ýerde edilen  çykyşlarda Garaşsyzlyk ýyllarynda ýetilen belent sepgitler, mukaddes Garaşsyzlygymyzyň halkymyza eçilen bagty dogrusynda buýsanç bilen bellenildi. Baş baýramymyzyň öňüsyrasynda geçirilen Türkmenistanyň Halk Maslahatynyň mejlisiniň halkymyzyň ýaşaýyş-durmuş derejesiniň ýokarlandyrylmagyna gönükdirilen beýik işleriň has-da rowaçlanjakdygynyň güwäsine öwrülendigi nygtaldy. Gahryman Arkadagymyza we Arkadagly Gahryman Serdarymyza tüýs ýürekden alkyş aýdyldy.

Soňra welaýatymyzyň medeniýet we sungat ussatlarynyň şirin owazly aýdym-sazlaryna, tanslaryna, welaýat döwlet drama teatrynyň artistleriniň edebi-sazly kompozisiýasyna tomaşa edildi. Uly joşgun bilen ýerine ýetirilen çykyşlarda ýurt Garaşsyzlygynyň, Gahryman Arkadagymyzyň we hormatly Prezidentimiziň beýik işleriniň waspy belentden-belent ýaňlandy.