Welaýat

häkimliginiň mejlisler jaýynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň akyldar şahyrymyza bagyşlap döreden «Pähim-paýhas ummany Magtymguly Pyragy» atly ajaýyp goşgusynyň tanyşdyrylyş dabarasy geçirildi.

Dabarada edilen buýsançly çykyşlarda Gahryman Arkadagymyzyň döwet-galamyndan dörän täze şygryň akyldar şahyrymyzyň dünýä içre arşa göterilen abraý-mertebesini, oňa goýulýan hormat-sarpany has-da belende göterendigi aýratyn nygtalyp aýdyldy. «Pähim-paýhas ummany Magtymguly Pyragy» atly ajaýyp goşgynyň Gündogaryň beýik akyldary hakynda ýazylan iň gowy eserleriň biridigi, bu şygryň üsti bilen dana şahyrymyza türkmen halkynyň Milli Lideriniň hormat-sarpasynyň, söýgi-buýsanjynyň nusgalyk derejededigine göz ýetirmek bolýandygy baradaky söhbetler çykyşlaryň özenini düzdi.

Şeýle-de dabaraly maslahatda Türkmenistanyň Magtymguly adyndaky Ýaşlar guramasynyň ÝUNESKO-nyň Bütindünýä Ýaşlar jemgyýetiniň resmi agzasy bolmagy bilen baglanyşykly çykyşlara hem orun berlip, bu taryhy çözgüdiň Gahryman Arkadagymyz tarapyndan binýady goýlan, Arkadagly Serdarymyz tarapyndan giň gerimde durmuşa geçirilmegi dowam etdirilýän döwlet ýaşlar syýasatynyň halkara derejede ykrar edilmesi bolandygy buýsanç bilen nygtaldy.

Dabaranyň dowamynda welaýatymyzyň medeniýet we sungat ussatlarynyň çykyşlary ýygnananlara ruhy lezzet paýlady.

Tanyşdyrylyş dabarasynyň ahyrynda oňa gatnaşyjylar kitap sergisine syn etdiler. 

Türkmenistanyň Söwda we daşary ykdysady aragatnaşyklar ministrliginiň «Balkan» döwlet lomaý-bölek söwda firmasy tarapyndan welaýatymyzyň çäginde mekdep bazarlarynyň we göçme söwda nokatlarynyň onlarçasy guraldy. Halka ýokary hilli hyzmat edilýän mekdep bazarlarynda şu ýyl ilkinji gezek ak mekdepleriň bosagasyndan ätlejek bagtyýar körpelerden başlap, uly ýaşly mekdep okuwçylaryna niýetlenilen harytlaryň bolçulygy göwnüňi göterýär. Olaryň ählisiniň diýen ýaly öz ýurdumyzda öndürilen milli öwüşginli, ýokary hilli okuw esbaplarydyr egin-eşikleridigi, ýaraşykly aýakgaplardygy kalbyňy buýsanç duýgusyndan doldurýar. Mekdep bazaryna barýan alyjylaryň bada-bat ünsüni özüne çekýän depderleriň, suratdyr çyzuw esbaplarynyň, ýaşlaryň sowatlylygyny artdyrmaga niýetlenilen gollanmalaryň we beýleki neşir önümleriniň Türkmen döwlet neşirýat gullugy tarapyndan ýokary hil derejesinde öndürilendigini hem aýratyn nygtamak gerek. Ýurdumyzyň dokma we tikin kärhanalarynyň nah egin-eşikleriniň, mekdep lybaslarynyň, telekeçileriň mekdep okuwçylaryna niýetläp taýýarlan dürli önümleriniň hyrydarlary hem ýetik.

«Balkan» döwlet lomaý-bölek söwda firmasynyň işgärleri mekdep bazarlaryny guramaçylykly ýola goýmak boýunça irgözinden taýýarlyk gördüler. Welaýatymyzyň şäherlerinde we etrap merkezlerinde hereket edýän mekdep bazarlaryndaky harytlaryň bolçulygyny synlanyňda, ruhuň has-da belende göterilýär.

Türkmenistanyň Senagatçylar we telekeçiler birleşmesiniň agzasy bolup durýan, Balkanabat şäherinde hereket edýän «Zürýada hyzmat» hususy kärhanasy gazlandyrylan alkogolsyz içgileriň hem-de arassalanan agyz suwunyň önümçiligini üstünlikli ýola goýdy. Kärhanada ornaşdyrylan önümçilik enjamlarynyň iş mümkinçilikleri, döwrebaplygy bilen ýakyndan tanşanyňda, hünärmenleriň olar baradaky gürrüňlerini diňläniňde, telekeçiligiň artykmaçlyklaryna ýene bir ýola göz ýetirýärsiň.

«Zürýada hyzmat» hususy kärhanasynyň «Dam-dam» ady bilen öndürýän gazlandyrylan alkogolsyz içgileriniň hem-de arassalanan agyz suwunyň hil derejesi oňat bolup, öndürilýän möçberleri barha artýar. Teşneligi gandyrýan dürli içgiler Hytaýdan, Russiýadan, Germaniýadan satyn alnan kämil önümçilik enjamlarynyň sazlaşykly işledilmegi arkaly öndürilýär. Döwrebap enjamlara kärhanada bir çalşykda zähmet çekýän 50-den gowrak hünärmenler başarjaňlyk bilen erk edýärler.

Telekeçilik başlangyçlaryny höweslendirmekde, döwlet bilen hususy ulgamyň arasyndaky hyzmatdaşlygy has-da ösdürmekde, bazar gatnaşyklarynyň kanunçylyk esaslaryny yzygiderli kämilleşdirmekde Arkadagly Serdarymyzyň baştutanlygynda Berkarar döwletiň täze eýýamynyň Galkynyşy döwründe alnyp barylýan düýpli özgertmelere mynasyp iş görkezijileri bilen jogap bermek «Zürýada hyzmat» hususy kärhanasynyň agzybir zähmet toparynyň baş maksady bolup durýar. Bu ýerde gazlandyrylan alkogolsyz içgileriň ýylda ortaça 8 million 500 müň litrini, gaplanan arassa agyz suwunyň bolsa 15 million litrden gowragyny öndürmäge zerur şertler bar. Kärhanada bu önümçilik mümkinçilikleri netijeli peýdalanylýar. 

Balkanabat şäherindäki daşary ýurt dillerine ýöriteleşdirilen 3-nji orta mekdebiň mejlisler jaýynda welaýatymyzyň öňdebaryjy bilim işgärleriniň maslahaty geçirilip, oňa gatnaşyjylar, ilki bilen, bu ýerde milli bilim ulgamynyň gazananlaryny açyp görkezýän sergini synladylar. Şeýle täsirli pursatlar bilen başlanan maslahatda geçen okuw ýylynyň guwandyryjy netijelerine seljerme berlip, täze 2023 — 2024-nji okuw ýylynyň möhüm wezipeleriniň üstünde giňişleýin durlup geçildi. Çykyşlarda beýan edilişi ýaly, geçen okuw ýylynda welaýat Baş bilim müdirliginiň iş meýilnamasyna laýyklykda, bilim edaralarynda alnyp barylýan okuw-terbiýeçilik işleriniň hil derejesini ýokarlandyrmak we usuly ýardam bermek maksadyndan ugur alnyp, ýylyň dowamynda toplumlaýyn işler alnyp baryldy. Pedagogik işgärleriň hünär ýokarlandyryş okuwlaryna işjeň gatnaşmaklary üpjün edildi. Netijede, bilim işgärleriniň 686-sy hünär ýokarlandyryş okuwlaryna gatnaşdylar.

Maslahatda welaýatymyzda bar bolan 164 sany umumybilim berýän mekdeplerde täze okuw ýylyna ähli ugurlar babatda taýýarlyk işleriniň geçirilendigi aýratyn nygtaldy. Bilim ojaklary täze okuw ýylynda ilkinji gezek ak mekdepleriň bosagasyndan ätlejek bagtyýar çagalaryň 12 müň 120-ä golaýyny gujak açyp garşylar. Şeýle-de, welaýatyň çäginde 173 sany mekdebe çenli çagalar edaralary, 1 sany kömekçi mekdep-internaty, 1 sany welaýat saglygy dikeldiş okuw-terbiýeçilik toplumy hem-de 1 sany çagalyk öýi hereket edýär. 11 sany mekdepden daşary we goşmaça bilim edaralary bolup, olarda ajaýyp döwrümiziň ýaş nesillerine hünärleriň 38 görnüşi ýörite hünärmenler tarapyndan öwredilýär.

Etrap-şäherlerinden gelen öňdebaryjy bilim işgärleriniň bilim bermekde toplan oňyn tejribeleri dogrusyndaky çykyşlaryna hem maslahatda giň gerim berildi.

Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynda Hazar deňziniň güni mynasybetli «Awaza» milli syýahatçylyk zolagynda geçirilen «Hazar deňzi — parahatçylyk we dostluk deňzi» atly ylmy-amaly maslahat dünýäde parahatçylyk söýüjilikli ýurt hem-de ylalaşdyryjy merkez hökmünde giňden tanalýan hemişelik Bitarap döwletimiziň Hazar deňzi bilen baglanyşykly meseleleri netijeli çözmek başlangyçlaryny hoşniýetli goňşuçylyk gatnaşyklary, milli we umumy bähbitleri nazara almak bilen, sebitde deňhukukly, özara bähbitli hyzmatdaşlyk etmek, köpasyrlyk taryhy-medeni gatnaşyklara eýe bolan Hazarýaka döwletleriň halklarynyň arasynda dost-doganlygy pugtalandyrmak bilen bagly aýdyň maksatlara gönükdirýändigini nobatdaky gezek aýan etdi. Ylmy-amaly maslahatda Nýu-Ýork şäherinde şu ýylyň 12-nji sentýabrynda öz işine başlajak BMG-niň Baş Assambleýasynyň nobatdaky 78-nji sessiýasynda ýurdumyzyň öňe sürjek ileri tutýan garaýyşlarynyň ähmiýeti aýratyn nygtaldy. Şolaryň hatarynda Hazar deňziniň daşky gurşawyny, onuň bioserişdelerini gorap saklamak, şeýle hem birnäçe ekologiýa meselelerini çözmek bilen baglanyşykly wezipeleriň giň toplumy boýunça hyzmatdaşlyk etmäge halkara meýdança boljak «Hazar ekologiýa başlangyjyny» döretmek baradaky teklibiň bolmagy buýsanç bilen bellenilmäge mynasypdyr. Maslahatda nygtalyşy ýaly, çäk taýdan amatly ýerleşmegi, uglewodorod we beýleki tebigy serişdeleriň baý gorlary, oňaýly howa şertleri Hazar deňzi sebitiniň häzirki günde ösen senagat, ulag we şypahana merkezine öwrülmegine mümkinçilik berdi. Şunuň bilen baglylykda, köp möhüm ugurlarda, şol sanda Hazar deňziniň bioserişdelerini gorap saklamak, artdyrmak we peýdalanmak, söwda gämi gatnawlary, syýahatçylygy ösdürmek we beýleki ugurlar babatda hyzmatdaşlygyň ýola goýulmagy aýratyn ähmiýete eýedir.