Halkara zenanlar güni mynasybetli welaýat Baş bilim müdirliginiň hem-de Ylym we bilim işgärleriniň kärdeşler arkalaşygynyň ilkinji guramalarynyň Balkanabat şäher geňeşiniň bilelikde guramaklarynda aýdym-sazly çäre geçirildi.

Welaýat saglygy dikeldiş okuw-terbiýeçilik toplumynda geçirilen çärä bilim ulgamynyň we jemgyýetçilik guramalarynyň işgärleri, eneler, ýaşlar gatnaşdylar. Çykyş edenler bu ýere ýygnananlary Halkara zenanlar güni bilen mähirli gutladylar. Berkarar döwletiň täze eýýamynyň Galkynyşy döwründe enelerimize we gelin-gyzlarymyza goýulýan hormat-sarpanyň has belent derejelere göterilýändigini buýsanç bilen bellediler. Zenanlaryň maşgala mukaddesligini goramakda, perzentlerini milli ruhda terbiýeläp, olaryň Watanymyzy has-da ösdürjek adamlar bolup ýetişmeklerini gazanmakda tagallalaryny gaýgyrmaýandyklaryny, asylly zähmetiň nusgasyny görkezýändiklerini nygtadylar. Munuň üçin ähli şert-mümkinçilikleri döredýän Gahryman Arkadagymyza we Arkadagly Gahryman Serdarymyza tüýs ýürekden alkyş aýtdylar.

Baýramçylyk çäresiniň dowamynda aýdym-sazlar, tanslar, gazallar ýerine ýetirilip, olarda täze taryhy eýýamyň, Halkara zenanlar gününiň, bahar paslynyň waspy edildi.

Halkara zenanlar güni mynasybetli baýramçylyk çäreleri welaýatymyzda hem biri-birine ulaşdy. Welaýat häkimliginiň mejlisler jaýynda sekiz we şondan köp çagany dünýä inderen hem-de mynasyp terbiýeläp ýetişdiren eneleri sarpalamak dabarasy hem şeýle çuň mazmunly baýramçylyk çäreleriniň biri boldy. Onda çykyş edenleriň nygtaýyşlary ýaly, zenanlara uly hormat-sarpa goýýan halkymyzyň bu ýol-ýörelgesi Berkarar döwletiň täze eýýamynyň Galkynyşy döwründe täze mazmuna eýe bolýar. Eneligi we çagalygy, maşgala gymmatlyklaryny goramak, aýal-gyzlaryň hünär, döredijilik, aň-paýhas mümkinçiliklerini ýokarlandyrmak, olaryň kanuny bähbitlerini, hukuklaryny, gender deňligini üpjün etmek döwlet syýasatymyzyň möhüm aýratynlygydyr. Dabarada munuň üçin Gahryman Arkadagymyza hem-de Arkadagly Gahryman Serdarymyza egsilmez alkyş sözleri aýdyldy. Şeýle-de  hormatly Prezidentimiziň Permanyna laýyklykda, Türkmenistanyň «Ene mähri» diýen hormatly ady dakylan eneler gutlanyp, olara Arkadagly Gahryman Serdarymyzyň adyndan gymmatbahaly sowgatlar şowhunly el çarpyşmalar astynda gowşuryldy. «Ene mähri» diýen hormatly ada eýe bolan köp çagaly eneler bolsa özleri barada döwlet derejesinde edilýän ägirt uly aladalar üçin Milli Liderimize hem-de hormatly Prezidentimize ene kalbyndan çykýan alkyşlaryny beýan etdiler. Şunuň ýaly tolgundyryjy çykyşlar welaýatymyzyň sungat ussatlarynyň mährem eneleri, gelin-gyzlary, bahar paslyny, «Garaşsyz, baky Bitarap Türkmenistan — bedew batly at-myradyň mekany» ýylynyň taryhy tutumlaryny taryplaýan aýdym-sazlaryna utgaşdy.

Köp çagaly enelere Bereket etrabynyň Galkynyş şäherçesinde döwrebap ýaşaýyş jaýlarynyň açarlarynyň gowşurylyş dabarasy hem ýatda galyjy boldy. Onda hem gutlag çykyşlaryna uly orun berilip, zenanlaryň eziz Watanymyzyň gazanýan köpugurly ösüşlerine mynasyp goşantlaryny goşmaklaryny gazanmakda, sagdyn nesilleri terbiýeläp ýetişmeklerini üpjün etmekde, köp çagaly maşgalalary hemmetaraplaýyn goldamakda üstünlikli amala aşyrylýan döwletli tutumlar barada ýene bir ýola buýsanç bilen nygtaldy. Täze ýaşaýyş jaýlarynyň açarlaryny ýüzlerine sylan köp çagaly eneler — Balkanabat şäheriniň Oglanly şäherçesiniň ýaşaýjysy Hurma Baýramalyýewa we Balkanabat şäheriniň Gumdag şäherçesiniň ýaşaýjysy Arzygül Täçgulyýewa ýokary amatlyklary bolan döwrebap öýleri sowgat eden Gahryman Arkadagymyza hem-de Arkadagly Gahryman Serdarymyza tüýs ýürekden hoşallyklaryny bildirdiler. Sungat ussatlary bezemen sahnada joşgunly aýdym-sazlary, milli tanslary ýerine ýetirip, dabaranyň şowhunyny artdyrdylar.

Soňra dabara gatnaşyjylar täze öýleriň mümkinçilikleri bilen ýakyndan tanyşdylar hem-de «Ýurt garşy alsyn! Toýly jaý bolsun!» diýip, öý eýelerini täze ýaşaýyş jaýlary bilen gutladylar. Giňden ýazylan toý saçagynyň nygmatlaryndan dadyp, agzybir halkynyň bagtyýarlygy üçin ähli tagallalary edýän Milli Liderimiziň hem-de hormatly Prezidentimiziň janlarynyň sag, ömürleriniň uzak bolmagyny, beýik tutumlarynyň hemişe rowaçlyklara beslenmegini arzuw etdiler.

Türkmenistanyň diplomatik işgärleriniň güni mynasybetli welaýat häkimliginiň mejlisler jaýynda geçirilen dabaraly maslahat ýokary ruhubelentlige beslendi. Onda Berkarar döwletiň täze eýýamynyň Galkynyşy döwründe  türkmen halkynyň Milli Lideri Gahryman Arkadagymyzyň beýik başlangyçlaryny mynasyp dowam etdirýän Arkadagly Gahryman Serdarymyzyň parasatly baştutanlygynda ynsanperwerlige, parahatçylyk söýüjilige ýugrulan, bitaraplyk ýörelgelerine daýanýan türkmen diplomatiýasy, bedew batly ösüşlere beslenýän ýurdumyzyň daşary syýasatda durmuşa geçirýän tutumly işleri barada giňişleýin söhbet edildi.

Işjeň ýagdaýda geçen maslahatda çykyş edenler döwletimiziň Birleşen Milletler Guramasynyň Baş Assambleýasy tarapyndan üç gezek ykrar edilen Bitaraplyk hukuk derejesiniň möhüm ähmiýeti barada aýratyn nygtamak bilen, sebitde we dünýäde parahatçylygyň, asudalygyň, durnuklylygyň pugtalandyrylmagynda, özara ynanyşmagyň berkidilmeginde, dürli ugurlarda hyzmatdaşlygyň ösdürilmeginde tagallalaryny gaýgyrmaýan  döwletimiziň abraý-mertebesiniň, şan-şöhratynyň has-da belende göterilýändigini, türkmen diplomatiýasynyň dünýä ýurtlarynyň ösüşine, halklaryň parahatçylygynyň hatyrasyna hyzmat edýändigini belläp geçdiler. Dabaraly maslahatda Gahryman Arkadagymyzyň, Arkadagly Gahryman Serdarymyzyň adyna çäksiz alkyşlar aýdyldy.

Dabaranyň dowamynda täze taryhy döwürde ýurdumyzyň  durmuşa geçirýän dünýä ähmiýetli işlerini, baky Bitaraplygymyzy, parahatçylygy, dost-doganlygy wasp edýän aýdym-sazlar ýaňlandy.

Welaýat medeniýet müdirliginiň hem-de Türkmenistanyň Magtymguly adyndaky Ýaşlar guramasynyň welaýat geňeşiniň bilelikde guramaklarynda tans hem-de folklor toparlarynyň arasynda geçirilen bäsleşik «Bedew batly at-myradyň mekany — tans, folklor dessury döwrüň mukamy» diýlip atlandyryldy.

Hormatly Prezidentimiziň Berkarar döwletiň täze eýýamynyň Galkynyşy döwründe milli medeniýetimizi ösdürmek babatdaky taýsyz tagallalaryndan gelip çykýan wezipelerden ugur alyp, medeniýeti, sungaty, halk döredijiligini has-da kämilleşdirmek, halkymyza edilýän medeni hyzmatlaryň hilini ýokarlandyrmak, ösüp gelýän ýaş nesilleriň medeniýete, sungata bolan söýgülerini we garaýyşlaryny  ösdürmek maksady bilen geçirilen bäsleşige etrap-şäherleriň tans hem-de folklor toparlary gatnaşdylar.

Balkanabat şäherindäki «Bagt köşgi» toý dabaralary merkezinde guralan bäsleşigiň şertine laýyklykda, oňa gatnaşanlar «Garaşsyz, baky Bitarap Türkmenistan — bedew batly at-myradyň mekany» ýylymyza bagyşlanyp döredilen aýdymly tansy ýerine ýetirdiler. Folklordan parçalary ýerine ýetirmekde ussatlyklaryny görkezdiler.   

Emin agzalary bäsleşige gatnaşyjylaryň ýerine ýetirijilik ukybyna, tansyň milliligine, folkloryň many-mazmunyna, çykyş edýänleriň egin-eşikleriniň kybapdaşlygyna we döwrebaplygyna baha berdiler.

Netijede, tans sungaty boýunça Gyzylarbat etrabynyň «Misseriýan» tans topary baş baýraga mynasyp bolmagy başardy. Türkmenbaşy şäheriniň «Ýaşlyk», Türkmenbaşy etrabynyň «Kenar», Esenguly etrabynyň «Deňiz» tans toparlary degişlilikde birinji, ikinji, üçünji orunlary eýelediler.

 Folklor toparlaryň arasynda baş baýragy Balkanabat şäheriniň «Şapak» folklor topary eýeledi. Bereket etrabynyň «Bereket ýaýlasy» folklor topary birinji, Gyzylarbat etrabynyň «Köpetdag» folklor topary ikinji, Türkmenbaşy şäheriniň «Miras» folklor topary üçünji orunlara mynasyp boldular.

Bäsleşikde öňe saýlanan toparlara ony guraýjylar tarapyndan Hormat hatlary hem-de ýadygärlik sowgatlary gowşuryldy.

Hormatly Prezidentimiziň 13-nji fewralda geçiren Ministrler Kabinetiniň giňişleýin mejlisinde 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasynyň işlenip taýýarlanandygyny aýdyp, bu ugurda degişli resminama gol çekmegi aýratyn ähmiýete eýe boldy. Munuň özi şanly ýylyň ilkinji aýynda Monte-Karlo şäherinde geçirilen halkara sirk sungaty festiwalynda sirk sungatyna goşan uly goşandy üçin «Galkynyş» milli at üstündäki oýunlar toparyna Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalaryň gowşurylmagynyň şanyna Balkanabat şäherinde geçirilen dabaraly çäreleriň ýokary guramaçylygynyň gözbaşyna öwrüldi.   

Hakyky türkmen toýlaryna mahsus şatlyk-şowhuna, ruhubelentlige beslenen dabaraly çäreler «Galkynyş» milli at üstündäki oýunlar toparynyň agzalarynyň welaýat Taryhy we ülkäni öwreniş muzeýiniň öňünde milli däp-dessurlarymyza laýyklykda duz-çörek bilen garşylanmagy arkaly badalga aldy. Bu ýerde joşgunly aýdym-sazlar belentden ýaňlanyp, dabaranyň şowhunyny artdyran medeni çykyşlarda Gahryman Arkadagymyzyň, Arkadagly Gahryman Serdarymyzyň beýik özgertmeleriniň, behişdi ahalteke bedewleriniň, şanly ýylyň beýik tutumlary taryplandy. Halkymyzyň ýagşy yrym-ýörelgesine eýerilip, «Galkynyş» toparyna dagdan agajyndan ýasalan nalyň gowşurylmagy aýratyn ýatda galyjy boldy. Şeýle-de, toparyň agzalary bu ýerde ýaýbaňlandyrylan milli atçylyk sungatyna, amaly-haşam, el işlerine degişli sergini synlap, çäksiz ruhy lezzet aldylar.

Şunuň ýaly täsirli çärelerden soňra toparyň agzalary asman atlaryna deňelen ahalteke bedewlerine atlanyp, şäheriň döwrebap şaýoly boýunça guran toý ýörişi arkaly «Türkmeniň ak öýi» binasyna tarap ugur aldylar. Ýörişiň dowamynda şöhraty ýedi yklyma dolan toparyň agzalaryny şaýoluň ikiýan gyrasyny dolduran toý mähellesi alkyşly sözler, şowhunly el çarpyşmalar bilen mübäreklediler. Toý ýörişiniň dowamynda guralan medeni çäreler dabaraly ýörişiň şowhunyny has-da artdyrdy. Welaýatymyzyň döredijilik tans toparlarynyň gelin edinmek dessuryndan görkezen parçalary, sungat ussatlarynyň edebi-sazly kompozisiýalary hemmelerde ýakymly duýgulary döretdi.   

«Türkmeniň ak öýi» binasynyň öňünde ýaýbaňlandyrylan medeni çykyşlar dabaraly çäreleriň mazmun baýlygynyň üstüni ýetirip, halkymyzyň gamyşgulak bedewlerimize bolan çäksiz buýsanjynyň, türkmen bedewleriniň dünýä dolan şan-şöhratyny öňküdenem belende göterýän Milli Liderimize hem-de hormatly Prezidentimize bolan egsilmez alkyş sözleriniň mynasyp beýanyna öwrüldi. Ýürekleriň töründen çykýan şeýle hoşallyk sözleri «Türkmeniň ak öýi» binasynyň ajaýyp sahnasynda dowam eden buýsançly çykyşlaryň, belent heňlerde ýaňlanan aýdym-sazlaryň, ýerine ýetirilen küştdepdidir gazallaryň içinden hem eriş-argaç bolup geçdi. Çykyşlaryň çuňňur mazmunynda beýan edilişi ýaly, «Galkynyş» milli at üstündäki oýunlar toparynyň gazanýan üstünlikleri Gahryman Arkadagymyzyň, Arkadagly Gahryman Serdarymyzyň türkmen halkynyň milli guwanjy, buýsanjy bolup durýan ahalteke bedewlerine bolan nusgalyk söýgi-sarpasynyň miwesidir. Şeýle hormat-sarpa bedewlerimiziň şan-şöhratyny belende göterip, «Galkynyşy» täze üstünliklere ruhlandyrýar.

Dabarada «Galkynyş» toparynyň täsirli çykyşlaryna orun berilmegi aýratyn ýatda galyjy boldy. Toparyň agzalarynyň çapyp barýan bedewleriň üstünde ussatlyk bilen ýerine ýetirýän oýunlary, çalasyn hereketleri hemmeleri haýran galdyrdy. Olaryň çykyşlary dowamly ýaňlanan el çarpyşmalar bilen garşylandy. Sungat ussatlarynyň bedewlere atlanyp, ýerine ýetiren şirin aýdymlary dabaranyň täsirli pursatlarynyň üstüni ýetirdi.     

         «Garaşsyz, baky Bitarap Türkmenistan — bedew batly at-myradyň mekany» ýylyna bezeg berýän çuň mazmunly çäreleriniň hatarynda mynasyp orun alan dabaraly çäreler welaýatymyzyň ilatynyň Gahryman Arkadagymyzyň hem-de Arkadagly Gahryman Serdarymyzyň döwletli tutumlaryna bolan ýürek buýsanjyny ýene bir ýola tassyklady.

Dabaralar tamamlanandan soňra, Balkanabat şäherindäki «Türkmeniň ak öýi» binasynyň köpçülikleýin dabaralar geçirilýän ýerinde toý sadakasy berildi.