Hormatly Prezidentimiziň ak patasy bilen Gurluşyk we senagat toplumynyň işgärleriniň gününiň öňüsyrasynda welaýatymyzda möhüm desgalaryň düýbi tutuldy we ulanyşa berildi. Bu dabaralara Arkadagly Gahryman Serdarymyzyň gatnaşmagy welaýatymyzyň ýaşaýjylarynda ýokary ruhubelentlik we çuňňur hoşallyk duýgularyny döretdi. Welaýat häkimliginiň mejlisler jaýynda «Alkyş size, şöhrat Size Arkadagly Gahryman Serdarymyz!» ady bilen geçirilen hoşallyk maslahaty munuň şeýledigini aýdyň görkezdi. Gurluşyk we senagat toplumynyň işgärleriniň, jemgyýetçilik guramalarynyň, edara-kärhanalaryň wekilleriniň, il sylagly ýaşulularyň,  mährem eneleriň, bagtyýar ýaşlaryň gatnaşmagynda geçirilen maslahatda möhüm desgalaryň ähmiýeti dogrusynda aýratyn durlup geçildi.

Bilşimiz ýaly, geçen ýekşenbe güni Türkmenbaşy etrabynyň çäginde karbamid öndürýän toplumyň gurluşygynyň, Türkmenbaşy — Garabogaz — Gazagystan serhedi awtomobil ýolunyň Türkmenbaşy — Garabogaz böleginiň düýbüni tutmak, şeýle hem Esenguly etrabynda agyz suwuny arassalaýjy desganyň we Garabogazköl aýlagynyň üstünden geçýän awtomobil köprüsiniň açylyş dabaralary ýokary ruhubelentlige beslendi. Bu desgalaryň ýurdumyzyň himiýa senagatyny, ýol-ulag düzümini ösdürmekde, haryt dolanyşygynyň, ulag we ýolagçy gatnawlarynyň möçberini  artdyrmakda, ilatyň ýaşaýyş-durmuş derejesini gowulandyrmak bilen, halkyň arassa agyz suwuna bolan islegini kanagatlandyrmakda ähmiýeti uludyr. Munuň özi ýurdumyzy durmuş-ykdysady taýdan ösdürmek boýunça badalga berlen maksatnamalaryň, özgertmeleriň Berkarar döwletiň täze eýýamynyň Galkynyşy döwründe giň gerimde durmuşa geçirilýändigini subut edýär. Dabaraly hoşallyk maslahatynda şular barada giňişleýin söhbet edildi hem-de türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak bolmagy arzuw edildi.

Welaýatymyzyň medeniýet we sungat işgärleriniň aýdym-sazly çykyşlary dabara aýratyn bezeg berdi. Joşgunly aýdym-sazlarda Halkara parahatçylyk we ynanyşmak ýylynda durmuşa geçirilýän tutumly işleriň, gazanylýan beýik ösüşleriň, dost-doganlygyň, parahatçylygyň waspy belentden ýetirildi.

Maslahatyň ahyrynda hormatly Prezidentimiziň adyna Ýüzlenme kabul edildi.

Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň, ÝUNESKO-nyň işleri barada Türkmenistanyň Milli toparynyň sekretariatynyň hem-de Türkmenistanyň Telewideniýe, radiogepleşikler we kinematografiýa baradaky döwlet komitetiniň bilelikde yglan eden «Türkmen keşdeçilik sungaty — milli mirasymyz» atly bäsleşiginiň welaýat tapgyry geçirildi. Balkanabat şäherindäki «Türkmeniň ak öýi» binasynda geçirilen bäsleşige onuň etrap-şäher tapgyrlarynda öňe saýlanan zenanlar gatnaşdylar.

Halkymyzyň köpasyrlyk medeni mirasynyň görnükli nusgalarynyň biri bolan türkmen keşdeçilik sungatynyň, milli gymmatlyklarymyzyň şan-şöhratynyň dünýä ýüzünde dabaralanmagyna mynasyp goşandyny goşýan gelin-gyzlaryň bu el hünärini wagyz etmegi maksat edinen bäsleşigiň birinji şertinde oňa gatnaşyjylar ady äleme dolan keşdeçilik sungatyny ösdürmäge goşýan goşantlaryny beýan edip, keşde çekmekde ilkinji taýýarlyk işlerini ýerine ýetirdiler, el işleriniň sergisini guradylar. Ikinji şertinde bolsa saýlap alan nagyşlaryny çeper sözde wasp etdiler. Jemleýji şert has-da täsirli bolup, onda zenanlar öz elleri bilen tiken, keşdelän lybaslaryny geýnip, milli keşde-nagyşlarymyzy goşgularyň, rowaýatlaryň, gazallaryň üsti bilen wasp etdiler.

Netijede, Magtymguly etrabyndaky 8-nji orta mekdebiň mugallymy Şirin Alymowa we Bereket etrabyndaky 3-nji orta mekdebiň mugallymy Altyn Sähedowa birinji, Balkanabat şäherindäki 18-nji çagalar bakja-bagynyň tans goýujysy Jumasoltan Atabaýewa we 33-nji çagalar bakja-bagynyň aýdym-saz mugallymy Bibiselime Çakanowa ikinji, Türkmenbaşy şäheriniň merkezi  kitaphanasynyň kitaphanaçysy Bägül Batyrowa we Esenguly etrabyndaky 1-nji çagalar bakja-bagynyň aýdym-saz mugallymy Gülruh Gurbanowa üçünji orunlara mynasyp boldular. Bäsleşikde birinji orny eýelänler onuň döwlet tapgyryna gatnaşmaga hukuk gazandylar. 

Birleşen Milletler Guramasynyň döredilmeginiň 80 ýyllygy mynasybetli Birleşen Milletler Guramasynyň Türkmenistandaky hemişelik wekilhanasynyň, welaýat häkimliginiň hem-de welaýat bedenterbiýe we sport baradaky Baş müdirliginiň bilelikde guramagynda marafon ýaryşy geçirildi.

         «Awaza» milli syýahatçylyk zolagynda «Parahatçylyk we durnukly ösüşe tarap batly gadam» ady bilen 5 kilometr aralyga guralan marafon ýaryşynyň dört tapgyrda geçirilmegi oňa dürli kärdäki, dürli ýaşdaky raýatlaryň gatnaşmaklaryny üpjün etdi. Ýaryş başlanmazyndan öňinçä bu ýerde aýdym-sazly dabara guralyp, onda ajaýyp zamanamyzyň, dost-doganlygyň, sagdyn durmuş ýörelgesiniň, sportuň waspy belentden ýetirildi. Türgenleriň sportuň dürli görnüşleri boýunça ýaýbaňlandyran görkezme çykyşlary hem täsirli boldy. Soňra tomaşaçylaryň şowhunly goldawy astynda ýaryşlara badalga berildi.

         Uly ýaşly erkekleriň arasynda guralan marafon ýaryşynda birinji orny Türkmenbaşy şäherindäki Deňizçilik orta hünär okuw mekdebiniň talyby Şyhberdi Ezizow eýeledi. Ýetginjekleriň arasynda bolsa şeýle netijäni Türkmenbaşy şäherindäki 2-nji sport mekdebiniň türgeni Jumanyýaz Jumanyýazow görkezdi.

         Aýal-gyzlaryň arasynda geçirilen ýaryşda pellehana ilkinji bolup Gyzylarbat etrabyndaky 2-nji sport mekdebiniň tälimçisi Aleksandra Gurbanýazowa gelmegi başardy. Ýaş gyzlaryň arasynda bolsa Türkmenbaşy şäherindäki 1-nji sport mekdebiniň türgeni Nagiýa Ahmedowa taý tapylmady.

         Ýaryşlarda ýeňiji bolanlara dabaraly ýagdaýda medallar we sowgatlar gowşuryldy.

Halkara «Türkmen alabaý itleri» assosiasiýasynyň Balkan welaýat merkezinde geçirilen aýdym-sazly dabara Türkmen alabaýynyň baýramyna bagyşlandy. Oňa itşynaslar, edara-kärhanalaryň hünärmenleri, jemgyýetçilik guramalarynyň wekilleri, il sylagly ýaşulular, ak saçly eneler hem-de talyp ýaşlar gatnaşdylar. Bu ýerde birkemsiz bezelen alty ganat ak öýlerde toý supralary giňden ýazyldy. Bagşy-sazandalaryň ýerine ýetiren aýdym-sazlary,  ýaýbaňlandyrylan amaly-haşam, el işleriniň hem-de muzeý gymmatlyklarynyň sergileri, toý gazanlarynda taýýarlanylan milli tagamlar, buýsanjymyz, guwanjymyz bolan alabaý itleriniň gezelençleri baýramçylygyň dabarasyny has-da artdyryp, halkymyzyň şu gününiň we geljekki rowaçlyklarynyň çeper beýanyna öwrüldi.

 Ajaýyp zamanamyzda dünýäde uly gyzyklanma eýe bolan, daş keşbi we özüni alyp barşy bilen beýleki tohum itlerden tapawutlanýan alabaýlaryň müňýyllyklardan gelýän şöhratly ýolunyň dowam etdirilip, nesilden-nesle geçirilmegine möhüm ähmiýet berilýändigi baradaky söhbetlere dabarada giň orun berildi. Gahryman Arkadagymyzyň «Türkmen alabaýy» atly eseriniň alabaýlaryň tohum arassalygyny gorap saklamak we ösdürip ýetişdirmek bilen bagly alnyp barylýan işlerde taýsyz gymmatlyk bolup durýandygy aýratyn nygtaldy. Berkarar Watanymyzy ak ýollardan okgunly öňe alyp barýan, halkymyzyň bagtyýar, eşretli durmuşy ugrunda uly alada edýän Gahryman Arkadagymyza, Arkadagly Gahryman Serdarymyza alkyş sözleri aýdyldy.

Dabaranyň dowamynda welaýatyň sungat ussatlarynyň, talyp ýaşlaryň ata Watanymyzy, bagtyýar durmuşymyzy, edermen türkmen alabaýyny wasp edip ýerine ýetiren döwrebap aýdym-sazlary oňa gatnaşyjylara ruhy lezzet paýlady.

Welaýatymyzda Türkmenistanyň saglygy goraýyş we derman senagaty işgärleriniň güni mynasybetli geçirilen dabaralar uly ruhubelentlige, şatlyk-şowhuna beslendi. Mollagara şypahanasynda geçirilen aýdym-sazly baýramçylyk çäresine saglygy goraýyş işgärleri, dürli ulgamyň wekilleri, il sylagly ýaşulular, kümüş saçly eneler hem-de talyp ýaşlar gatnaşdylar.

         Baýramçylyk çäresinde edilen her bir çykyşyň özenini raýatlaryň saglygyny goramakda dünýä nusgalyk uly işleri durmuşa geçirýän Gahryman Arkadagymyza, Arkadagly Gahryman Serdarymyza alkyş hem-de hoşallyk sözleri düzüp, olarda ýurdumyzyň saglygy goraýyş ulgamynda hem-de derman senagatynda gazanylýan ösüşler barada giňişleýin aýdylyp geçildi. Hormatly Prezidentimiziň parasatly baştutanlygynda öňe sürlen il-ýurt bähbitli maksatnamalara, şol sanda «Saglyk» Döwlet maksatnamasyna laýyklykda, milli saglygy goraýyş ulgamynyň düzümleriniň düýpli özgertmelere eýe bolandygy hakynda giňişleýin gürrüň edilip, halkymyzyň sagdyn, eşretli durmuşda ýaşamagy üçin taýsyz tagallalary edýän Milli Liderimiziň, döwlet Baştutanymyzyň janlarynyň sag, ömürleriniň uzak bolmagy arzuw edildi.

Çäre welaýatyň sungat ussatlarynyň, talyp ýaşlaryň çykyşlary bilen dowam etdi. Ýerine ýetirilen aýdym-sazlar joşgunly tanslar bilen utgaşyp, olarda ata Watanymyzyň, täze taryhy eýýamymyzyň, saglygy goraýyş ulgamynda gazanylýan üstünlikleriň waspy belentden ýetirildi. Soňra çärä gatnaşanlar bu ýerde ýaýbaňlandyrylan sergini synladylar. Sergi ýurdymyzyň saglygy goraýyş ulgamynyň ajaýyp zamanamyzda gazanan üstünlikleri, ýeten belent sepgitleri, öňdebaryjy usullardyr hyzmatlar bilen ýakyndan tanyşmaga mümkinçilik berdi.

Çäräniň ahyrynda welaýatymyzyň öňdebaryjy saglygy goraýyş we derman senagaty işgärlerine Hormat hatlary we baýramçylyk sowgatlary dabaraly ýagdaýda gowşuryldy.