Türkmenistanyň Zenanlar birleşiginiň welaýat bölümi tarapyndan Halkara zenanlar gününe bagyşlanyp Balkanabat şäherindäki «Türkmeniň ak öýi» binasynda geçirilen aýdym-sazly dabaraly çärä dürli kärlerde döredijilikli zähmetiň nusgasyny görkezýän gelin-gyzlar we mährem eneler gatnaşdylar.

Berkarar döwletiň täze eýýamynyň Galkynyşy döwründe zenanlar çäksiz hormat-sarpanyň eýeleri bolup, olara ygtybarly zähmet we durmuş şertlerini döretmek, eneligi we çagalygy goramak ýaly meseleler döwlet syýasatynyň ileri tutulýan ugurlary bolup durýar. Zenanlaryň hukuklaryny goramak üçin hemmetaraplaýyn alada edilýär. Her ýyl ençeme enelere «Ene mähri» diýen hormatly atlar dakylýar, «Zenan kalby» ordeni zenanlaryň döşüni bezeýär. Olar ata Watanymyzyň pajarlap ösmegine mynasyp goşant goşýarlar.

Ine, şular dogrusynda giňişleýin gürrüň edilen, baýramçylyk gutlaglary biri-birine ulaşan çärede aýdym-sazly, şatlyk-şowhunly çykyşlara hem giň orun berildi. Aýdym-saz, tans, hor toparlarynyň şowhunly çykyşlary we wäşileriň görkezen gysgajyk sahnalary bu ýere ýygnananlarda ýatdan çykmajak täsir galdyrdy.

Halkara zenanlar gününe bagyşlanyp welaýat häkimliginiň guramagynda Balkanabat şäherindäki köpugurly sport toplumynda «Sagdyn maşgala — sagdyn nesil» atly bäsleşik geçirildi.

Sagdyn maşgalalarda sagdyn nesilleriň kemala gelmegini gazanmak, olaryň arasynda sportuň, bedenterbiýäniň, sagdyn durmuş ýörelgesiniň wagyz edilmegini has-da giň gerime eýe etmek maksady bilen geçirilen bäsleşikde welaýatymyzyň etrap-şäherlerinden gelen maşgala toparlary hereketli oýunlaryň dürli görnüşleri boýunça ýaryşyp, öz ukyp-başarnyklaryny görkezdiler.

Şatlyk-şowhuna beslenen bäsleşigiň netijesi boýunça Bereket etrabyndan «Asuda» topary birinji, Gyzylarbat etrabyndan «Ynam» topary ikinji, Türkmenbaşy şäherinden «Abadan» topary üçünji orunlary eýlediler we olara Türkmenistanyň Demokratik partiýasynyň welaýat komiteti hem-de Türkmenistanyň Kärdeşler arkalaşyklarynyň welaýat birleşmesi tarapyndan sowgatlar gowşuryldy.

Welaýat döwlet drama teatrynda ýaýbaňlandyrylan dabara dost-doganlygy pugtalandyrýan täsirli pursatlary bilen tapawutlandy. ÝUNESKO-nyň işleri barada Türkmenistanyň milli toparynyň sekretariatynyň meýilnamasyna laýyklykda guralan bu aýdym-sazly dabaraly çäre türkmen we gazak halklarynyň medeni mirasyny, sungatyny, däp-dessurlaryny wagyz etmek ýaly asylly maksada gönükdirildi. Halkara parahatçylyk we ynanyşmak ýylynyň ýokary ruhubelentligine beslenen dabaraly çärä balkanly medeniýet we sungat işgärleri, milli mirasy öwrenijiler, amaly-haşam sungatynyň, sebitde ýaşaýan gazak halkynyň wekilleri, il sylagly ýaşulular, kümüş saçly eneler uly höwes, ýokary ruhubelentlik bilen gatnaşdylar.

Dabarada giň gerim berlen çykyşlarda nygtalyşy ýaly, berkarar ýurdumyz dünýä döwletleri we halklary bilen hoşniýetli, dost-doganlyk gatnaşyklaryny alyp barýar. Türkmen we gazak halklaryny bolsa asyrlaryň jümmüşinden gözbaş alýan taryhy we medeni-ruhy umumylyklar baglanyşdyrýar. Şeýle gatnaşyklar hemişelik Bitaraplyk hukuk derejesinden gelip çykýan wezipe-borçlara berk eýerýän ata Watanymyzyň goňşy döwlet bilen köpugurly hyzmatdaşlyk gatnaşyklarynyň çäklerinde has işjeň häsiýete eýe bolýar. Bu günki dabara bolsa iki halkyň köpasyrlyk dost-doganlyk gatnaşyklaryny, milli öwüşginlere baý bolan medeni-ruhy hyzmatdaşlygy has-da ösdürmekde wajyp ähmiýetlidir. Dabarada dost-doganlyk gatnaşyklaryny ösdürmegiň sakasynda duran Gahryman Arkadagymyza hem-de Arkadagly Gahryman Serdarymyza alkyş sözleri aýdyldy.

Dostluk dabarasynyň geçýän ýerinde iki dostlukly halkyň ruhy-medeni, taryhy mirasyna degişli muzeý gymmatlyklarynyň, şekillendiriş we amaly-haşam sungatynyň eserleriniň, haly önümleriniň, el işleriniň sergileri ýaýbaňlandyryldy. Sergi türkmen we gazak halklarynyň özboluşly medeni-taryhy gymmatlyklary bilen ýakyndan tanyşmaga mümkinçilik berdi.

 Teatryň ajaýyp sahnasynda gazak halkynyň meşhur «Alpamyş» eposy esasynda goýlan oýundan parçalaryň görkezilmegi aýratyn täsirli boldy. Tomaşaçylaryň dowamly el çarpyşmalary bilen garşylanan sahna oýny goňşy halkyň gahrymançylykly taryhyna içgin aralaşmaga, bu eposyň milli mirasymyzda tutýan ornuna anyk göz ýetirmäge ýardam etdi.

Medeniýet we sungat ussatlarynyň doganlyk halklaryň joşgunly aýdym-sazlaryndan guran çykyşlary dostluk dabarasynyň täsirli pursatlarynyň hataryny artdyrdy. 

Türkmenistanyň Medeniýet ministrliginiň, Türkmenistanyň Kärdeşler arkalaşyklarynyň Milli merkeziniň we Türkmenistanyň Zenanlar birleşiginiň Merkezi geňeşiniň ýurdumyzyň döwlet drama teatrlarynyň arasynda yglan eden «Mähre doly eneleriň ýüregi» atly döredijilik bäsleşigi Balkanabat şäherindäki welaýat döwlet drama teatrynda täze sahna oýnunyň ilkinji görkezilişi bilen badalga aldy.

Gahryman Arkadagymyzyň «Enä tagzym — mukaddeslige tagzym» atly ajaýyp kitabyndaky rowaýatlar esasynda Baýramsoltan Gurbanowa bilen Öwezmämmet Galandarowyň ýazan edebi esasynda «Enä tagzym, tagzym — mukaddeslige» ady bilen sahnalaşdyrylan sahna oýnunda halkymyzyň enä bolan garaýşy, hormat-sarpasy açylyp görkezilýär.

Öwezmämmet Galandarowyň režissýorlyk etmegindäki sahna oýnunda maşgalanyň agzybirligini, abatlygyny goramagy özüniň mukaddes borjy hasaplaýan enäniň asylly häsiýetleri, sabyr-kanagatlylygy beýan edilýär. Oýnuň terbiýeçilik ähmiýeti örän ýokary bolup, pederlerimizden dowam edip gelýän ýol-ýörelgeleri ýaşlaryň özlerine nusga edinmelidigi hem-de ene süýdüniň ynsan durmuşyndaky ähmiýeti baradaky düşünjeler onuň içinden eriş-argaç bolup geçýär.

«Enä tagzym, tagzym — mukaddeslige» atly sahna oýnunyň tomaşaçylaryň dowamly el çarpyşmalary bilen garşylanmagy ony döretmäge gatnaşanlaryň yhlasly zähmetiniň ýerine düşendiginiň güwäsidir. Oňa tomaşa edeniňde, keşpleriň tomaşaçylaryň ýadynda galmagy üçin sahna ussatlarynyň köp zähmet siňdirendiklerine, sahna bezeginiň beýan edilýän wakalar bilen özboluşly sazlaşygy döredendigine göz ýetirýärsiň.

Biziň welaýatymyzdan badalga alan bu döredijilik bäsleşiginiň jemi Halkara Zenanlar gününe gabatlanylyp jemlener.

Türkmenistanyň Kärdeşler arkalaşyklarynyň welaýat birleşmesiniň, welaýat medeniýet müdirliginiň hem-de welaýat Taryhy we ülkäni öwreniş muzeýiniň Halkara Zenanlar güni mynasybetli bilelikde yglan eden «Medeni mirasyň paýhas çyragy, sallançak edebi — döwrüň owazy» atly bäsleşiginiň welaýat tapgyry geçirildi.

Maşgalanyň dowamaty bolan perzentleri terbiýeläp ýetişdirmekde, olaryň sagdyn ösüp-ulalmaklaryny gazanmakda ene hüwdüsi we çaga sallançagy derwaýysdyr. Ene hüwdüsiniň we sallançagyň nesil terbiýesindäki ähmiýetini, körpejäniň rahat hem kadaly ösüşine edýän täsirini ýaş enelere düşündirmek, olara degerli maslahatlary bermek, ene-mamalarymyzyň durmuş tejribesini ýaş eneleriň mynasyp dowam etdirmegini gazanmagy wagyz etmek döwrüň öňe çykarýan meselesidir.

Ine, şol maksatdan ugur alnyp geçirilen bäsleşige onuň deslapky tapgyrlarynda ýeňiji bolan zenanlar gatnaşdylar. Olar, şertlere laýyklykda,   berlen wagtyň dowamynda sallançak bilen bagly düşünjelerini çeper sözlerde beýan etdiler, sallançaga degişli rowaýatlary, tymsallary gürrüň berdiler. Ýerine ýetiren hüwdüleriniň dowamynda maşgala mukaddesligine çäksiz sarpa goýýan Gahryman Arkadagymyza we Arkadagly Gahryman Serdarymyza tüýs ýürekden alkyş aýtdylar. Her bir öýde sallançagyň badynyň ýatmazlygyny arzuw etdiler. Çaga sallançagynyň we çagany hüwdülemegiň olara ýetirýän täsiri barada berlen sowallara dogry we anyk jogap bermekde birek-birekden kem durmadylar.

Netijede, Türkmenbaşy şäherindäki 4-nji orta mekdebiň mugallymy Doýduk Ýazmämmedowa baş baýraga mynasyp boldy. Türkmenbaşy etrabynyň Irikli obasynyň ýaşaýjysy Ogulboldy Artykowa birinji, Etrek etrabynyň Etrek şäheriniň ýaşaýjysy Süýşe Gulmämmedowa ikinji, şol etrabyň Akýaýla obasynyň ýaşaýjysy Ogulbike Mämmetnurowa üçünji orunlary eýelediler.

Bäsleşigiň ýeňijilerine Hormat hatlary we sowgatlar gowşuryldy.