Welaýatymyzda 2023 — 2024-nji okuw  ýylynyň tamamlanmagy mynasybetli «Pähim-paýhas ummany Magtymguly Pyragy» atly şygar astynda geçirilen «Soňky jaň» dabaralary giň gerime eýe boldy. Baýramçylyk çäreleri welaýat merkezindäki Baş baýdak meýdançasyndan badalga aldy. Bu ýerde uçurymlar Döwlet senasynyň ýaňlanmagy bilen, Döwlet baýdagymyza ter gül çemenlerini goýup, mukaddes ýaşyl Tugumyza tagzym etdiler. Gül goýmak dabarasy baýramçylyk ýörişine utgaşdy. Oňa uçurymlar bilen birlikde, ýaşuly  nesliň wekilleri, bagtyýar çagalar, medeniýet we sungat işgärleri hem gatnaşdylar.

Soňra «Soňky jaň» dabaralary orta mekdepleriň öňündäki baýramçylyk keşbine beslenen meýdançalarda dowam etdi. Welaýat, şäher häkimlikleriniň, welaýat Baş bilim, medeniýet müdirlikleriniň hem-de jemgyýetçilik guramalarynyň bilelikde guramaklarynda geçirilen çäreler tolgundyryjy pursatlara baý boldy. Orta mekdeplerde ir säher bilen Döwlet senamyz belentden  ýaňlandy. Dabara gatnaşanlar hormatly Prezidentimiziň Türkmenistanyň orta mekdepleriniň uçurymlaryna, mugallymlaryna we bilim işgärlerine iberen Gutlagyny uly ruhubelentlik bilen diňlediler. Çykyş edenler uçurymlara ak ýol arzuw etdiler,  ýygnananlary paýtagtymyz Aşgabat şäheriniň güni bilen tüýs ýürekden gutladylar. Bilim  ulgamyny kämilleşdirmekde gazanylýan üstünlikleriň gözbaşynda durýan Gahryman Arkadagymyza, Arkadagly Gahryman Serdarymyza  alkyş sözlerini aýtdylar.

Göreldeli uçurymlaryň bilim ojagynyň bosagasyndan ilkinji gezek ätlejek  körpelere bilimler dünýäsiniň  «altyn açaryny» gowşurmagy tolgundyryjy pursatlara baý boldy. Ýürekleri buýsançdan, kalplary şatlykdan doly bagtyýar uçurymlaryň durmuşynda ýatdan çykmajak pursady — 2023 — 2024-nji okuw ýylynyň üstünlikli tamamlanýandygyny alamatlandyrýan «Soňky jaň» sesiniň ýaňlanmagy bilen, kepderileriň, dürli reňkli şarlaryň al-asmana uçurylmagy dabaranyň şowhunyny has-da artdyrdy. Ak mekdebiň depesinde erkana ganat kakyp ýören kepderiler uçurym ýaşlaryň buýsançly göwünlerini alamatlandyryp, asuda asmanymyza bezeg berdi. Mekdep okuwçylarynyň ýerine ýetiren aýdym-sazlarynda ajaýyp döwrümiz, bagtly çagalyk, paýtagtymyz Aşgabadyň gözellikleri wasp edildi.

Welaýat kitaphanasyna, welaýat Taryhy we ülkäni öwreniş muzeýine, Magtymguly etrabynyň Magtymguly Pyragy muzeýine guralan gezelençler bagtyýar uçurymlaryň şatlygyny has-da  artdyrdy. Kitaphananyň bölümindäki dürli ugurlara niýetlenilen kitaplar, muzeý işgärleriniň bölümlerde ýerleşdirilen taryhy gymmatlyklar baradaky täsirli söhbetleri uçurymlarda uly gyzyklanma döretdi. 

«Soňky jaň» dabarasy mynasybetli welaýat kitaphanasynyň öňünde geçirilen baýramçylyk çäresi hem ýatda galyjy pursatlara baý boldy. Sungat ussatlarynyň aýdym-sazly çykyşlary gyzgyn garşylandy. Bu ýerde zehinli uçurymlara ýadygärlik sowgatlar, welaýat Baş bilim müdirliginiň Hormat hatlary dabaraly ýagdaýda gowşuryldy.

«Soňky jaň» dabarasynyň çäreleri welaýatymyzyň ähli etrap-şäherlerinde hem ýokary guramaçylyga eýe bolup, egsilmejek şatlyk-şowhuna  beslendi. 

Welaýat häkimliginiň hem-de Türkmenistanyň Zenanlar birleşiginiň welaýat bölüminiň bilelikde guramagynda häkimligiň mejlisler zalynda geçirilen «Türkmen-hytaý zenanlarynyň dünýäsi» atly forum — hyzmatdaşlygyň täze ugry» atly dabaraly maslahat ýokary ruhubelentlige beslendi. Ol golaýda paýtagtymyzda Gahryman Arkadagymyzyň maşgalasy, hormatly Prezidentimiziň mähriban käbesi Ogulgerek Berdimuhamedowanyň başlyklyk etmeginde hem-de Hytaýyň Halk syýasy konsultatiw geňeşiniň Ählihytaý komitetiniň başlygynyň orunbasary hanym Şen Ýueýueniň ýolbaşçylygyndaky wekiliýetiň gatnaşmagynda geçirilen «Türkmen-hytaý zenanlarynyň dünýäsi» atly forumdan gelip çykýan wezipelere bagyşlandy.

Jemgyýetçilik guramalarynyň wekilleriniň we işjeň agzalarynyň, edara-kärhanalarda zähmet çekýän öňdebaryjy zenanlaryň, mährem eneleriň, talyp gyzlaryň gatnaşmagynda geçirilen maslahatda edilen çykyşlarda nygtalyşy ýaly, «Türkmen-hytaý zenanlarynyň dünýäsi» atly forum iki halkyň arasyndaky medeni-ynsanperwer gatnaşyklary ösdürmekde möhüm ähmiýete eýe boldy. Bu forum dostlukly hyzmatdaşlygy pugtalandyrmakda, ählumumy parahatçylygy gorap saklamakda zenanlaryň ornunyň uludygyny, şunda milli sungatlaryň hem möhüm ähmiýete eýedigini bütin aýdyňlygy bilen görkezdi.

Çykyş edenler möhüm ähmiýete eýe bolan çärä Gahryman Arkadagymyzyň agtyjagy Aýjereniň gatnaşmagynyň, mähirlije Aýjereniň geçen ýyl atasy bilen Hytaýda bolan pursatlarynda özüne panda şekilindäki gurjagyň sowgat berlendigini, onuň özünde uly täsir galdyrandygyny we bu gurjakdan täsirlenip, ony ilki şekile geçirendigini hem-de onuň esasynda keşde taýýarlandygyny aýdyp, myhmandan taýýarlan işini HHR-iň Başlygy Si Szinpiniň maşgalasyna gowşuryp bermegini haýyş etmeginiň, şeýle hem forumyň dowamynda Gahryman Arkadagymyzyň maşgalasy, hormatly Prezidentimiziň mähriban käbesi Ogulgerek Berdimuhamedowanyň myhmanlary haly dokalýan enjam bilen tanyşdyrmagynyň, halkymyzyň milli däp-dessurlaryny berjaý etmek bilen, hormatly myhman, hanym Şen Ýueýueni dokalyp tamamlanan halyny bilelikde kesmäge çagyrmagynyň, oňa Gahryman Arkadagymyzyň «Arşyň nepisligi» atly kitabyny sowgat hökmünde gowşurmagynyň aýratyn buýsandyryjy bolandygyny guwanmak hem buýsanmak bilen gürrüň berdiler. Türkmen we hytaý dostlukly gatnaşyklarynyň taryhynda şanly waka öwrülen şeýle çäreleri geçirmäge döredip berýän şert-mümkinçilikleri üçin Milli Liderimize we döwlet Baştutanymyza alkyş sözlerini aýtdylar.

Täsirli söhbetlere baý bolan maslahatda sungat ussatlarynyň ýerine ýetirmeklerinde aýdym-sazlar belentden ýaňlanyp, olarda ajaýyp zamanamyz, ösüşlere beslenýän eziz Watanymyz, dost-doganlyk wasp edildi.

Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli esasy dabara welaýat merkezindäki Baş baýdak meýdançasynda geçirilip, şol gün ir säherde uly buýsanç, çäksiz joşgun bilen köpçülikleýin ýerine ýetirilen Döwlet senamyzyň belent owazynyň astynda ýaşyl Tugumyz al-asmana galdyryldy.

Hormatly Prezidentimiziň baýramçylyk mynasybetli Garaşsyz, hemişelik Bitarap Türkmenistanyň halkyna iberen Gutlagyny ýokary ruhubelentlik bilen garşylan ildeşlerimiz bu ýere ýygnananlary ählihalk baýramy bilen tüýs ýürekden mähirli gutladylar. Başymyzyň täjine deňelýän Döwlet baýdagymyzyň ýurdumyzyň parahatçylyk söýüjiliginiň hem-de berkararlygynyň kepili bolup durýandygyny, bu günki gün asuda asmanymyzda bagtyýarlygyň nyşany bolup parlaýandygyny buýsanç bilen bellediler. Ajaýyp sene agzybirligimizi, bitewüligimizi, parahatçylyk ýörelgelerine üýtgewsiz ygrarlydygymyzy alamatlandyrýan Konstitusiýamyza hem-de Döwlet baýdagymyza söýgi-buýsanjyň egsilmezdigini bütin aýdyňlygy bilen görkezýär diýip, çykyş edenler nygtadylar. Ösüşlere beslenýän ýurdumyzda halkymyzyň bagtyýarlygy, eşretli durmuşy barada uly alada edýän Milli Liderimize we hormatly Prezidentimize tüýs ýürekden çykýan hoşallyklaryny bildirdiler.

Al-asmana uçurylan şarlar, adaja öwüsýän şemala gollarynda ýaşyl Tugumyz erkana pasyrdaýan bagtyýar adamlaryň şatlygy ajaýyp toý gününiň buýsandyryjy alamatlary boldy. «Mähek» aýdym-saz toparynyň aýdym-sazlary,  «Nurana», «Tumar»,  «Bagtyýarlyk» tans toparlarynyň joşgunly tanslary, welaýat döwlet drama teatrynyň artistleriniň taýýarlan edebi-sazly kompozisiýasy bu ýere ýygnanlara ruhy lezzet paýlady.  Nebitçiler medeniýet köşgüniň «Dehistan» folklor toparynyň «Küştdepdi» tansy baýramçylyk dabarasynyň şowhunyny hasam artdyrdy.

Türkmenistanyň Magtymguly adyndaky Ýaşlar guramasynyň Merkezi geňeşiniň, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň hem-de welaýat häkimliginiň bilelikde guramagynda geçen anna güni «Pähim-paýhas ummany Magtymguly Pyragy» ýyly hem-de Magtymguly Pyragynyň doglan gününiň 300 ýyllygy mynasybetli ýurdumyzyň ýaşlarynyň arasynda «Magtymguly geçmişimiz, şu günümiz we geljegimizdir» atly ylmy-amaly maslahat geçirildi. Oňa gatnaşyjylar çäräniň dowamynda Magtymguly Pyragy muzeýiniň öňündäki meýdançada medeniýet we sungat ussatlarynyň aýdym-sazly çykyşlaryna hem-de «Akyldary sarpalap, galkyndyryp çar ýany, toý-baýrama beslenýär Pyragynyň mekany» atly edebi-sazly kompozisiýa tomaşa etdiler. Soňra akyldar şahyryň heýkeline ter gül çemenlerini goýup, beýik söz ussadyna tagzym etdiler. Bu ýerde «Biz — Arkadag Serdarly Watanyň bagtyýar nesilleri» atly surat çekmek boýunça bäsleşige gatnaşýan zehinli çagalaryň çekýän suratlary maslahata gatnaşyjylarda uly gyzyklanma döretdi. Ýaşlar Magtymguly Pyragy muzeýine aýlanyp, bu ýerdäki gymmatlyklar bilen tanyşdylar, sergide görkezilen amaly-haşam, el işlerine syn etdiler. 

Muzeýiň mejlisler jaýynda ylmy-amaly maslahatyň açylyş dabarasy bolup, onda halypalar, ýaş şahyrlar çykyş etdiler. Maslahatda akyldar şahyryň döredijiligi baradaky çykyşlar diňlenildi. Türkmenistanyň Magtymguly adyndaky Ýaşlar guramasynyň Merkezi geňeşiniň we Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň bilelikde taýýarlan «Alym Arkadagymyzyň kitaplarynda Magtymguly Pyragynyň edebi mekdebi» atly ylmy neşiriň tanyşdyrylyş dabarasyna hem uly orun berildi.

11-nji maýda Türkmenistanyň Magtymguly adyndaky Ýaşlar guramasynyň Merkezi geňeşiniň hem-de «Nesil» gazetiniň redaksiýasynyň bilelikde ýurdumyzyň ýaşlarynyň arasynda yglan eden «Berkarar döwletiň ylham joşguny» atly bäsleşiginiň ýeňijilerine sowgat gowşurmak dabarasy geçirildi. Döredijilik bäsleşigine gatnaşyjylar welaýat häkimliginiň we welaýat medeniýet müdirliginiň guramagynda Magtymguly Pyragy muzeýiniň öňündäki meýdançada ýaýbaňlandyrylan aýdym-sazly çykyşlara, edebi-sazly kompozisiýa tomaşa etdiler. Berkarar döwletiň täze eýýamynyň Galkynyşy döwrüniň ajaýyplyklary kalplara ylham joşgunyny berýär. Zehinli ýaşlaryň döredijiliginde ýurdumyzyň beýik ösüşleri, dana Pyragynyň waspy ýetirilýär. Ýeňijileri sylaglamak dabarasyndan soňra etrabyň Gerkez obasyndaky Magtymguly Pyragynyň muzeýine edilen gezelenç has täsirli boldy. 

Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli welaýat häkimliginiň, welaýat medeniýet müdirliginiň, jemgyýetçilik guramalarynyň bilelikde guramagynda Balkanabat şäherindäki Baş baýdak meýdançasynda geçirilen baýramçylyk dabarasy ýokary ruhubelentlige beslendi. Oňa  jemgyýetçilik guramalarynyň, medeniýet, bilim, saglygy goraýyş, sport ulgamlarynyň wekilleri, il sylagly ýaşulular, ak saçly eneler, talyp ýaşlar gatnaşdylar.

Dabarada çykyşlara giň orun berildi. Soňra edebi-sazly kompozisiýa görkezildi. Baş Kanunymyzyň hem-de Döwlet baýdagymyzyň özara sazlaşygynyň aýdym-sazly ajaýyp çykyşlaryň üsti bilen açylyp görkezilmegi örän täsirli boldy. Welaýatyň tanymal sungat ussatlarynyň goşa mukaddesligi wasp edýän aýdymlaryna, belentden ýaňlanýan sazlaryna goşulyp ýerine ýetirilen tanslar  dabaranyň şatlyk-şowhunyny artdyryp, oňa gatnaşanlaryň baýramçylyk ruhuny ýokary göterdi. Çäräniň dowamynda Gahryman Arkadagymyzyň, Arkadagly Gahryman Serdarymyzyň beýik işlerini, Türkmenistanyň Konstitusiýasyny, Döwlet baýdagyny, Berkarar döwletiň täze eýýamynyň Galkynyşy döwründe amala aşyrylýan özgertmeleri, gözel tebigatymyzy, dost-doganlygy wasp edýän aýdymlar ýerine ýetirildi. Halk döredijilik toparlarynyň çykyşlary hem belent heňde ýaňlanan aýdym-sazlar bilen  utgaşyp, dabara aýratyn bezeg berdi. Halkymyzyň medeni mirasynyň aýrylmaz bölegi bolan, häzirki döwürde täze many-mazmun bilen baýlaşdyrylan «Küştdepdi» tansyny bu ýere ýygnanlar şowhunly el çarpyşmalar bilen garşyladylar.

Milli mukaddesliklerimiziň şanyna bagyşlanyp geçirilen baýramçylyk dabarasy uly ruhubelentlige, egsilmez şatlyk-şowhuna beslenip, «Pähim-paýhas ummany Magtymguly Pyragy» ýylynda aýratyn many-mazmuna eýe boldy.