Üstümizdäki ýylyň galla oragyna badalga bermek dabarasy welaýat häkimliginde geçirilen maslahat bilen başlandy. Onda galla oragyny öz möhletinde ýokary hilli geçirmek, ýetişdirilen bol hasyly gysga wagtda isripsiz ýygnamak, tehnikalaryň gije-gündiz bökdençsiz işledilmegini üpjün etmek ýaly wajyp meselelere seredildi. Maslahata gatnaşyjylar öz çykyşlarynda türkmen obasyny ähli taraplaýyn ösdürmek ugrundaky taýsyz tagallalary üçin Gahryman Arkadagymyza  hem-de Arkadagly Gahryman Serdarymyza ýürekden çykýan alkyşlaryny beýan etdiler.

Galla oragyna gatnaşjak mehanizatorlardyr kärendeçiler bilen welaýat Taryhy we ülkäni öwreniş muzeýine gezelenç guraldy. Olar bu ýerde  daýhançylygyň gadymy usullary, ekerançylygyň medeniýeti, şeýle-de şöhratly taryhymyzy şöhlelendirýän muzeý gymmatlyklary bilen tanyş boldular.

Soňra galla oragynyň başlanmagy mynasybetli dabara Gyzylarbat etrabynyň «Goç» daýhan birleşiginiň ekin meýdanynda dowam etdi. Bu ýerde  hormatly Prezidentimiziň  ak patasyna eýerilip, asylly däbe görä, sylag-sarpaly ýaşulularyň «Bismillasy» bilen galla oragyna badalga berildi.

50 müň gektardan 80 müň tonna bugdaý almagy öňlerinde belent maksat edip goýan welaýatymyzyň gallaçy daýhanlary tutanýerli zähmet çekip, şanly ýylda  azyklyk guşgursak dänäniň bitginli hasylyny ösdürip ýetişdirdiler. Galla oragynda «СLAAS» we «John Deer» kysymly kombaýnlaryň 109-synyň öndürijilikli işledilmegi üçin düzüminde mehanikler, sazlaýjylar, kebşirleýjiler bolan ýörite tehniki hyzmat ediş toparlarynyň 16-sy döredildi. Ýangyç-ýaglaýyş serişdeleri, zerur ätiýaçlyk şaýlary bilen üpjün edilen bu toparlar hemişe iş üstünde bolarlar. Kombaýnlaryň nowalaryndan agdaryljak azyklyk däne hasylyny Gyzylarbat hem-de Bereket etraplaryndaky galla kabul ediş kärhanalaryna öz wagtynda ýitgisiz daşamak üçin awtoulaglaryň 545-si bökdençsiz işlediler. Galla kabul ediş nokatlarynyň hem-de Gyzylarbat etrabyndaky her  biri 50 müň  we  30 müň  tonna  däne  saklamaga  niýetlenilen elewatorlaryň 2-siniň, dänäniň hilini kesgitlejek ýörite barlaghanalaryň, ammarlaryň irgözinden taýýarlanyp goýulmagy möwsümiň ýokary guramaçylykly ýagdaýda geçiriljekdigine şaýatlyk edýär. Galla oragynyň öň ýanynda «Balkanobahyzmat» önümçilik birleşigine hormatly Prezidentimiziň sowgady bolan täze galla orujy kombaýnlaryň we ýöriteleşdirilen awtoulaglaryň gelip gowuşmagy jogapkärli möwsümiň öz wagtynda ýokary hilli geçirilmegine aýratyn täsirini ýetirer.

Dabaranyň geçýän ýerinde öňde duran möhüm wezipelere bagyşlanan iş maslahaty hem işjeň ýagdaýda dowam etdirildi. Onda welaýatyň oba hojalyk toplumynyň işgärleri, Türkmenistanyň Agrar partiýasynyň welaýat komitetiniň, welaýat Polisiýa müdirliginiň ýangyn howpsuzlygy bölüminiň, ýol gözegçilik gullugynyň wekilleri çykyş edip, kombaýnlaryň iş düzgünleri, ýangyn howpsuzlyk düzgünlerini berjaý etmegiň möhüm ähmiýeti barada gürrüň berdiler. 

Tanymal bagşy-sazandalaryň, ussat aýdymçylaryň, çeper höwesjeňleriň ýerine ýetiren döwrebap aýdym-sazlarynda Garaşsyz, baky Bitarap Watanymyzyň bedew batly rowaç menzilleri, hormatly Prezidentimiziň  il-ýurt bähbitli beýik işleri, edermen babadaýhanlarymyzyň zähmet üstünlikleri wasp edildi. Welaýatyň tans, halk döredijilik toparlarynyň şowly çykyşlary bu ýere ýygnananlara ruhy lezzet paýlady. Ekerançylyga we maldarçylyga degişli milli däp-dessurlar, azyk önümleriniň taýýarlanylyşy ussatlyk  bilen janlandyryldy. Dabarada oba hojalyk toplumynyň gaýtadan işleýän senagatynyň, çörek we çörek önümleriniň sergilerine uly orun berlipdir. Milli senetkärlik, halyçylyk, zergärçilik hem-de sungatyň beýleki görnüşleri boýunça ýerleşdirilen işler hem özüneçekiji  boldy.

Soňra bereketli hasylyň ilkinji tonnalary ýüklenen awtoulag kerweni «Balkangallaönümleri» önümçilik birleşiginiň Gyzylarbat etrabynyň Sarp obasyndaky galla kabul ediş bölümine tarap ugradyldy. Ak bugdaýyň bereketli hasylyndan ýüklenen bezemen awtoulaglar galla kabul ediş bölüminde dabaraly ýagdaýda garşy alyndy. Bu ýerde belentden tutulan baýramçylyk çäresiniň dowamynda galla oragynyň ilkinji gününde aýratyn tapawutlanan ussat gallaçylara hormatly Prezidentimiziň adyndan sowgatlar dabaraly ýagdaýda gowşuryldy.