Orta mekdeplerde okuw ýylynyň tamamlanmagy mynasybetli geçirilýän «Soňky jaň» dabarasy welaýatymyzyň bilim ojaklarynda hem ýokary guramaçylyga eýe boldy. Orta mekdepleri tamamlap, özbaşdak durmuş ýoluna ak pata alýan uçurymlaryň Balkanabat şäherindäki Baş baýdak meýdançasynda ýurdumyzyň berkararlygynyň baş nyşanlarynyň biri bolan Döwlet baýdagymyza ter gül desselerini goýup, oňa tagzym etmekleri Aşgabat şäheriniň güni bilen utgaşykly toýlanýan «Soňky jaň» dabarasyna badalga berdi.

Soňra «Garaşsyz, baky Bitarap Türkmenistan — bedew batly at-myradyň mekany» atly şygar astynda geçýän esasy dabara welaýat merkezindäki iňlis dili dersine ýöriteleşdirilen 25-nji orta mekdepde dowam etdi. Garaşsyzlygymyzyň 35 ýyllyk şanly senesiniň uludan toýlanjak ýylynyň uçurymlary, bilim işgärleri, ata-eneler welaýat, Balkanabat şäher häkimlikleri, welaýat Baş bilim hem-de medeniýet müdirlikleri, jemgyýetçilik guramalary tarapyndan geçirilen dabaranyň hormatly myhmanlary boldular. Dabaranyň açyk diýlip yglan edilmegi bilen, Türkmenistanyň Döwlet senasy belentden ýaňlandy. Hormatly Prezidentimiziň ýurdumyzyň orta mekdepleriniň uçurymlaryna, mugallymlaryna we ähli bilim işgärlerine iberen Gutlagynyň okalmagy dabara gatnaşyjylarda ruhubelentlik döretdi.

Ýaş nesilleri terbiýeläp ýetişdirmekde döredýän şert-mümkinçilikleri üçin dabarada çykyş edenler Milli Liderimize hem-de Arkadagly Gahryman Serdarymyza hoşallyk sözlerini aýdyp, şanly ýylyň uçurymlaryna özbaşdak durmuşyň nurana ýolunda uly üstünlikleri arzuw etdiler. Şeýle göwün göteriji arzuwlaryň dowamy 2025 — 2026-njy okuw ýylynyň üstünlikli tamamlanýandygyny alamatlandyrýan soňky jaňyň owazyna ulaşyp, şol pursat uçurymlaryň ak arzuwlarynyň nyşany bolan ak kepderiler, dürli röwüşli howa şarlary asuda asmanyň bezegine öwrüldi.

Dabaranyň dowamynda okuwyny ýokary bahalar bilen tamamlap, dürli ders we döredijilik bäsleşiklerinde üstünlik gazanan uçurymlara Hormat hatlary hem-de sowgatlar gowşuryldy. Sungat ussatlarynyň, mekdep okuwçylarynyň ýerine ýetiren aýdym-sazlarynda «Garaşsyz, baky Bitarap Türkmenistan — bedew batly at-myradyň mekany» ýylynyň taryhy tutumlary, paýtagtymyz Aşgabadyň şäheriniň gözellikleri, abadan durmuşymyz wasp edildi.

Welaýat Taryhy we ülkäni öwreniş muzeýine, welaýat kitaphanasyna guralan gezelençler uçurymlara ýatda galyjy pursatlary peşgeş berdi. Tanymal sungat ussatlarynyň, mekdep okuwçylarynyň welaýat kitaphanasynyň öňünde guran aýdym-sazly çykyşlary hem baýramçylyk gününiň täsirli çäreleriniň üstüni ýetirdi.