Welaýatymyzyň merdana gallaçylary sahawatly topragymyzdan 80 müň tonna guşgursak bugdaý ýygnap, ýurdumyzda ilkinjileriň hatarynda ajaýyp zähmet ýeňşini gazandylar. Munuň özi olaryň Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalarynyň, durmuşa geçirýän oba hojalyk özgertmeleriniň netijesinde ata-babalarymyzyň asylly daýhançylyk däplerini ösdürip, mynasyp dowam etdirýändikleriniň, kämilleşdirýändikleriniň aýdyň subutnamasydyr.

Ýylboýy çekýän argynsyz azaby bilen ene topragy gülledýän, ata Watanymyzyň bedew batly ösüşlerine saldamly goşant goşýan welaýatymyzyň zähmetsöýer daýhanlary bu gün ýeriň, suwuň hakyky eýeleri boldular. Bol hasyl ösdürip ýetişdirmekde oňat netije berýän peýdaly usullaryň ekerançylyga işjeň ornaşdyrylmagy, dünýäniň ösen, döwrebap oba hojalyk tehnikalarynyň hyzmatyndan başarnykly peýdalanylmagy, ekin meýdanlarynyň uzak möhletleýin esasda isleg bildiren tejribesi ýetik hasyl ussatlaryna berilmegi, işde ýokary netijeleri gazanmagy başarýan daýhan hojalyklarynyň döredilmegi, ýer eýeleriniň ýokary hilli tohum, dökünler bilen üpjün edilmegi bereketli toprakdan alnan hasylyň ýokary bolmagyna uly ýardam etdi.

Döwlet Baştutanymyzyň berýän goldawyndan, zähmet çekmek, ýokary hasyl ösdürip ýetişdirmek üçin döredýän amatly şertlerinden ýerlikli peýdalanmagy başarýan welaýatymyzyň gallaçy daýhanlary üstümizdäki ýylda 50 müň gektar meýdanda ak bugdaýyň bereketli hasylyny ösdürip ýetişdirdiler. Ekerançylykda ýerleriň melioratiw ýagdaýyny gowulandyrmak, suwdan rejeli peýdalanmak, işleri öňdebaryjy tejribäniň, ylmyň gazananlarynyň esasynda gurap, ýerli toprak-howa şertlerini nazara almak ýaly möhüm meselelere aýratyn üns berilmegi, daýhanlaryň ählitaraplaýyn alada bilen gurşalyp, tabşyrylan hasyl üçin olar bilen hasaplaşyklaryň bökdençsiz ýola goýulmagy we beýleki amatly şertleriň döredilmegi welaýatymyzyň zähmetsöýer babadaýhanlarynyň oňat netijeleri gazanmaklaryna oňyn täsirini ýetirdi. Bu gün sahawatly topraga göwnejaý ideg edip, ondan bereketli hasyl almagy başaran gallaçy daýhanlaryň haýsy biri bilen gürrüňdeş bolsaň-da, olar halal zähmet çekip, ýokary netijeleri gazanmak üçin ýeriň, suwuň, döküniň, tohumyň ýeterlikdigini, kuwwatly oba hojalyk tehnikalarynyň bardygyny, ähli şertleriň döredilendigini buýsanç bilen aýdýarlar. Özleri baradaky atalyk aladalary üçin türkmen halkynyň Milli Lideri Gahryman Arkadagymyza hem-de peder ýoluny mynasyp dowam etdirýän Arkadagly Gahryman Serdarymyza egsilmez alkyş aýdýarlar, çyn ýürekden buýsanç bilen hoşallyklaryny beýan edýärler.

Azyklyk ekinleriň arasynda ak bugdaýa taý geljegi ýok. Ol — uly iliň soltany, adamzadyň naýbaşy iýmiti, saçaklarymyzyň berekedi. Bu hakykata oňat düşünýän welaýatymyzyň edara-kärhanalarynyň sürüjileri, zähmetsöýer mehanizatorlarydyr tehnikalary abatlaýjylar toparlary we beýleki işgärler hem döwlet Baştutanymyzyň ak patasy, il sylagly ýaşulularyň «Bismillasy» bilen badalga alan galla oragyna agzybirlikde işjeň gatnaşdylar. Olar gallaçy daýhanlaryň ekin meýdanlarynda ösdürip ýetişdiren bereketli hasylyny gysga möhletde, isripsiz ýygnap almakda yhlaslaryny aýamadylar. Şeýlelikde, bir maksada gulluk edilip, agzybirlikli çekilen zähmet öz guwandyryjy netijesini berdi. Bu gün welaýatymyzyň zähmetsöýer gallaçylarynyň gazanan ajaýyp zähmet üstünligi hemmeleri guwandyrýar. Bizem şeýle şatlykly pursatda olara argynsyz zähmet çekip gazanan halal girdejiňiz toýlaryňyza ýarasyn diýýäris.

Harmanyňyza bereket, edermen gallaçylar!

Ömrüňize bereket, Gahryman Arkadagymyz, Arkadagly Gahryman Serdarymyz!

Türkmen zenanlarynyň döredýän nepis sungaty halkymyzyň milli buýsanjyna öwrülendir. Munuň şeýledigine «Pähim-paýhas ummany Magtymguly Pyragy» ýylyna bagyşlanyp, Balkanabat şäherindäki «Türkmeniň ak öýi» binasynda Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň hem-de ÝUNESKO-nyň işleri barada Türkmenistanyň Milli toparynyň sekretariatynyň bilelikde yglan eden «Gülüň owadan!» atly keçe bäsleşiginiň welaýat tapgyrynyň mysalynda hem aýdyň göz ýetirmek boldy.

Bäsleşigiň welaýat tapgyryna onuň deslapky tapgyrlarynda ýeňiji bolan çeper elli zenanlar gatnaşdylar. Halkymyzyň milli keçesiniň  ajaýyp nusgalarynyň taýýarlanylyşyny açyp görkezmek, gelin-gyzlarda zenan edebini, asylly gylyk-häsiýetleri terbiýelemek, ýaşlarda milli gymmatlyklarymyza, ene-mamalarymyzdan galan ajaýyp el işlerine bolan höwesi artdyrmak bäsleşigiň esasy maksady boldy.

«Gülüň owadan!» atly keçe bäsleşiginiň şertlerine laýyklykda, oňa gatnaşýanlar keçe taýýarlamak bilen baglanyşykly işleri, ýagny ýüň saýlamak, saýmak, daramak, boýamak, pişge ýasamak, keçäniň gamşyny çykamak ýaly işleri birin-birin ýerine ýetirdiler. Bu işlerde zerur bolan gurallaryň atlary, olaryň ulanylyşy barada gürrüň berdiler. Dürli gülleri salmak arkaly boýy 1,5 metre, ini 1 metre deň bolan keçeleri bellenen wagtda ýasamakda öz ukyp-başarnyklaryny görkezdiler. Iki ýüzli keçäniň görnüşleri, olara salynýan nagyşlaryň aýratynlyklary barada gürrüň berdiler. Keçe bilen baglanyşykly taryhy maglumatlary, keçe nagyşlaryndan söhbet açýan gadymy rowaýatlary, yrymlary, degişmeleri, gazallary, aýdyşyklary ýerine ýetirdiler we Berkarar döwletiň täze eýýamynyň Galkynyşy döwrüni wasp edip, öz ýürek buýsançlaryny şahyrana setirleriň, çeper sahnalaryň üsti bilen beýan etdiler. Halkymyzda «Keçe göwünli gelnim, kiçi göwünli gelnim» diýen aýtgynyň gaýyn-gelin gatnaşygynda agzybirligi ündeýändigi, enelerimiziň ýaş gyzlary ýa-da täze gelni el işleri bilen bagly tymsallaryň üsti bilen terbiýeländikleri barada gürrüň berdiler. Öz gözbaşyny müňýyllyklardan alyp gaýdýan el işlerimiziň, milli mirasymyzyň has içgin öwrenilmegine giň ýollary açýan Milli Liderimize we hormatly Prezidentimize tüýs ýürekden alkyş aýtdylar. Ene-mamalarymyzdan dowam edip gelýän el işlerimizi ýaş nesillere öwretmekde tagallalaryny, yhlaslaryny gaýgyrmajakdyklaryna ynandyrdylar.

Diýseň gyzykly hem täsirli geçen bäsleşigiň jemi jemlenilende, Türkmenbaşy etrabynyň Akguýy oba medeniýet öýüniň aýdym-saz ýolbaşçysy Çynar Meňlidurdyýewa birinji, şol etrabyň Sülmen oba medeniýet öýüniň guramaçysy Sapartäç Mollaýewa ikinji orunlara mynasyp boldular. Olar bäsleşigiň döwlet tapgyryna gatnaşarlar. 

Mukaddes Gurban baýramynyň çuň mazmunly dabaralary welaýatymyzda ýokary ruhubelentlige beslendi. «Pähim-paýhas ummany Magtymguly Pyragy» ýylyna mahsus şatlyk-şowhun bilen üç günläp dowam eden baýramçylyk merdana halkymyzyň milli däp-dessurlaryny, mizemez durmuş ýörelgelerini, ýokary ahlak, pähim-paýhas gymmatlyklaryny giňden dabaralandyrdy.

         Gurban baýramynyň esasy çäreleri Balkanabat şäheriniň binagärlik gözelliginiň möhüm bölegine öwrülen «Türkmeniň ak öýi» binasynyň döwresinde giňden ýaýbaňlandyryldy. Toý ýörişi mukaddes baýramyň dabaralarynyň özboluşly badalgasyna öwrülip, oňa hormatly ýaşulular, mährem eneler, bagtyýar çagalar hem-de dürli ýaşdaky raýatlar agzybirlik bilen gatnaşdylar. Baýramçylyk ýörişine gatnaşyjylar joşgunly ýaňlanan aýdym-sazlar, folklor toparlarynyň täsirli çykyşlary, şowhunly el çarpyşmalar bilen garşylandy.

Gurban baýramynyň mazmun taýdan biri-biriniň üstüni ýetirýän toý çäreleri soňra giňden ýaýbaňlandyryldy. «Türkmeniň ak öýi» binasynyň töwereginiň baýramçylyk keşbi hemmeleriň toý şatlygyny artdyrdy. Altmyş başly ak öýleriň owadan hatary, olarda giňden ýazylan bereketli baýramçylyk saçaklary, hatara düzülen toý gazanlarynda atarylan tagamlar, toý mähellesine edilen hödür-kerem milli däp-dessurlaryň, nusgalyk ýörelgeleriň mynasyp beýanyna öwrüldi. El işleriniň, amaly-haşam sungatynyň,  muzeý gymmatlyklarynyň sergileri köpleriň ünsüni çekdi. Milli sport oýunlarynyň görnüşleri boýunça ýaýbaňlandyrylan ýaryşlar, gelin-gyzlaryň ümeçilik dessurlaryndan görkezen parçalary, ýerine ýetiren gazallary, läledir öleňleri, bagtyýar körpeleriň oýunlary dabaralaryň şowhunyna şowhun goşdy. Bagşy-sazandalaryň hoş owazly aýdym-sazlary, sahna ussatlarynyň, folklor hem-de tans toparlarynyň ajaýyp çykyşlary göwünleri joşdurdy.

         Belentden dikilen bezemen hiňňildikler halkymyzda mübärek Gurban baýramyna mahsus esasy aýratynlyklaryň biridir. Bagtyýar ýaşlar uly şowhun bilen hiňňildik uçdular. Olaryň töwerege dolan şatlykly sesleri, joşgunly gülküleri täze taryhy eýýama, abadan durmuşymyza,  şeýle ajaýyp durmuşy peşgeş beren türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza bolan egsilmez buýsanjyň beýany bolup ýaňlandy. Medeniýet we sungat ussatlarynyň döwrebap aýdym-sazlary, milli tanslary her birimiziň ýüregimizi-kalbymyzy gurşap alan şeýle buýsanç duýgularyny mukamlarda beýan etdi.

         Şunuň ýaly şatlyk-şowhun, ýokary ruhubelentlik, aýdym-mukam welaýatymyzyň ähli şäherlerini, şäherçelerini, obalaryny gurşap alyp, beden we ruhy tämizlige, ahlak arassalygyna aýratyn ähmiýet beren pederlerimiziň asylly ýörelgelerine, döwürleri we nesilleri baglanyşdyrýan medeni gymmatlyklarymyza täze taryhy eýýamda uly sarpa goýulýandygyny, olaryň mazmun taýdan has-da baýlaşýandygyny ýene bir ýola ähli aýdyňlygy bilen görkezdi. 

Magtymguly Pyragynyň doglan gününiň 300 ýyllygy mynasybetli  welaýat we Magtymguly etrap häkimlikleriniň guramaklarynda etrap merkezinde dabaraly çäreler geçirildi.

«Magtymguly Pyragy» muzeýiniň mejlisler jaýynda «Magtymguly Pyragy — köňülleriň şahyry» ady bilen geçirilen dabaraly maslahat ýokary ruhubelentlige beslenip, oňa il sylagly ýaşulular, kümüş saçly eneler, medeniýet, bilim, saglygy goraýyş ulgamlarynyň işgärleri, jemgyýetçilik guramalarynyň wekilleri gatnaşdylar.

Dabaraly maslahatda edilen çykyşlarda nygtalyşy ýaly, ömrüni öz mähriban halkyna hyzmat etmäge bagyşlan Magtymguly Pyragynyň döredijilik dünýäsi ummanlar ýaly giňdir we çuňdur, baý we köpugurlydyr. Öz ýaşan döwründäki türkmen durmuşyny, türkmen topragyna çäksiz söýgüsini, tebigatyň gözelligini, ahlak päkligini nusgalyk derejede beýan etmegi başaran dana Pyragynyň döredijiliginde watançylyk temasy esasy orunlaryň birini eýeleýär. Agzybir ýaşamak, berkarar döwlet gurmak baradaky taglymlary häzirki ajaýyp zamanamyzda hasyl bolan dana şahyrymyz dünýä edebiýatynda öçmejek yz galdyran beýik şahsyýetdir.

         Dabaraly maslahatyň dowamynda şahyryň goşgularyna döredilen aýdymlary  bagşylar uly hyjuw hem joşgun bilen ýerine ýetirdiler. Çäreden soňra oňa gatnaşanlar muzeýe aýlanyp, ol ýerdäki gymmatlyklar bilen tanyşdylar. Şeýle-de bu ýerde guralan sergini hem olar uly gyzyklanma bilen synladylar.

Şol günüň ikinji ýarymynda «Magtymguly Pyragy» muzeýiniň öňündäki meýdançada kalplary joşa getirýän aýdym-sazly konsert geçirildi. Medeniýet we sungat ussatlarynyň çykyşlary bu ýere ýygnananlara ruhy lezzet paýlap, aýdym-sazlarda, «Akyldary sarpalap, galkyndyryp çar ýany, toý-baýrama beslenýär Pyragynyň mekany» atly edebi-sazly kompozisiýada eziz Watanymyzyň, ajaýyp zamanamyzyň, hormatly Prezidentimiziň parasatly ýolbaşçylygynda durmuşa geçirilýän il-ýurt bähbitli işleriň, beýik Pyragynyň waspy belentden ýetirildi. Magtymguly Pyragynyň aýdyma öwrülen setirleri hem belentden ýaňlandy.

Welaýatymyzda galla oragyna badalga bermek dabarasy welaýat häkimliginde geçirilen geňeş-maslahat bilen başlandy. Welaýat, etrap, şäher häkimlikleriniň, welaýatyň jemgyýetçilik guramalarynyň, oba hojalygyna dahylly edara-kärhanalaryň ýolbaşçylarynyň we jogapkär işgärleriniň, daýhan birleşikleriniň başlyklarynyň, tejribeli kärendeçileriň, şeýle-de il sylagly ýaşulularyň gatnaşmagynda geçirilen geňeş-maslahatda yhlas siňdirilip ýetişdirilen bugdaý hasylyny çalt we ýitgisiz ýygnamak, ony ammarlara we elewatorlara bökdençsiz daşamak hem-de däne öndürijiler bilen hasaplaşyklary wagtynda geçirmek bilen baglanyşykly täsirli çykyşlar diňlenildi.

Soňra galla oragynyň başlanmagy mynasybetli dabaralar «Batly Gadam» hususy kärhanasynyň Gyzylarbat etrabyndaky bereketli galla meýdanynda dowam etdi. Bu ýerde egsilmez ruhubelentlik, şatlyk-şagalaň höküm sürdi. Oba hojalyk ulgamynyň üstünliklerini we ýeten derejesini beýan edýän giň göwrümli sergi aýratyn ünsi çekiji boldy. Çörek we çörek önümleri, bugdaý tohumlarynyň görnüşleri sergä baý öwüşgin çaýdy. Gök-bakja önümleri, dürli miwedir ir-iýmişler serginiň bezegine öwrüldi. Oba hojalygyna degişli şygarlar toý meýdançasyna bezeg goşup, ajaýyp zähmet joşgunyny döretdi. Welaýatymyzyň medeniýet müdirligi tarapyndan guralan joşgunly aýdym-saz, halk döredijilik çykyşlary  giň gerime eýe boldy. Olarda  janypkeş daýhanlarymyzyň çekýän päk we halal zähmetiniň waspy ýetirildi. Aýdym-sazly çykyşlardan göwni galkynan dabara gatnaşyjylar giň gözýetime uzap gidýän altyn başly ak bugdaýly meýdanyň bir çetine ýygnandylar. Bu ýerde  hormatly Prezidentimiziň  sargydyna eýerilip, asylly däbe görä, sylag-sarpaly ýaşulularyň «Bismillasy» bilen galla oragyna ak pata berildi. Bu pursat şowhunly el çarpyşmalar bilen garşylandy. Şondan soňra kuwwatly däne orujy kombaýnlar hatar gurap, ak bugdaýly meýdanlara girdiler. Şeýlelikde, «Pähim-paýhas ummany Magtymguly Pyragy» ýylynda 80 müň tonna guşgursak dänäni taýýarlamagy belent maksat tutunan welaýatymyzyň ak ekin ussatlary galla oragyna köpçülikleýin girişdiler.

Welaýatymyzda şu ýyl 50 müň gektar meýdanda  azyklyk  ak bugdaýyň bitginli hasyly ösdürilip ýetişdirildi. Galla oragynda «John Deere» we «CLAAS» kysymly däne orujy kombaýnlaryň 100-den gowragynyň bökdençsiz we öndürijilikli işlemekleri üçin düzüminde abatlaýjylar, sazlaýjylar, kebşirleýjiler bolan ýörite tehniki hyzmat ediş toparlarynyň 16-sy döredildi. Ýygnalan hasyly daşamakda edara-kärhanalara degişli awtoulaglaryň 510-sy daýhanlaryň hyzmatynda bolar. Galla kabul ediş kärhanalary hem-de Serdar etrabyndaky her  biri 50 müň  we  30 müň  tonna  däne  saklamaga  niýetlenen elewatorlar, dänäniň hilini kesgitlejek ýörite barlamhanalar, hasyl saklanyljak ammarlar irgözinden möwsüme taýýarlanyp goýuldy.

Dabara gatnaşyjylar gallaly meýdanda däne hasylynyň ilkinji tonnalarynyň awtoulaglara guýluşyna buýsanç bilen syn etdiler. Däne daşaýjy awtoulaglar kerwen gurap «Balkangallaönümleri» önümçilik birleşiginiň Gyzylarbat etrabynyň Sarp obasyndaky degirmenler toplumyna tarap ýola düşdi. Üsti ak bugdaýly, dürli şygarlar bilen bezelen awtoulag kerweni toplumda uly şatlyk we şowhun bilen garşy alyndy. Ol ýere ýygnananlar täze däne hasylynyň agramynyň gapanda çekilişini we elewatora tabşyrylyşyny uly guwanç-buýsanç duýgusy bilen synladylar. Şol günki wakanyň şanyna giň gerim alan aýdym-sazly dabaralar zähmet baýramçylygynyň şowhunyny belende göterdi.  

Bugdaýy orlan meýdanlaryň samanyny dessine ýygnamaga girişen welaýatymyzyň gallaçylary özleri baradaky irginsiz aladalary üçin Gahryman Arkadagymyza,  Arkadagly Gahryman  Serdarymyza tüýs ýürekden çykýan alkyş sözlerini aýdýarlar.