Arkadagly Gahryman Serdarymyzyň «Magtymguly — dünýäniň akyldary» atly kitabynyň welaýat häkimliginiň mejlisler jaýynda geçirilen tanyşdyrylyş dabarasy Gündogaryň beýik söz ussady Magtymguly Pyraga we onuň  tutuş adamzadyň ylham çeşmesine öwrülen döredijiligine goýulýan hormat-sarpanyň aýdyň kepili bolup, ýokary ruhubelentlige beslendi. Welaýat we Balkanabat şäher häkimlikleriniň, jemgyýetçilik guramalarynyň wekilleriniň, edara-kärhanalaryň işgärleriniň, il sylagly ýaşulularyň, mährem eneleriň, bagtyýar ýaşlaryň gatnaşmagynda geçirilen tanyşdyrylyş dabarasynda döwlet Baştutanymyzyň täze kitabynyň ägirt uly ähmiýeti dogrusynda giňişleýin gürrüň edildi.

Tanyşdyrylyş dabarasynda çykyş edenleriň nygtaýyşlary ýaly, Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň taýsyz tagallalary bilen beýik akyldaryň edebi mirasyny öwrenmek, dünýäde wagyz etmek boýunça uly işler durmuşa geçirilýär. Geçen ýylyň «Pähim-paýhas ummany Magtymguly Pyragy» ýyly diýlip atlandyrylmagy, dana şahyryň doglan gününiň  300 ýyllyk ýubileýiniň dünýä boýunça dabaraly bellenilmegi we beýleki çäreler munuň subutnamalarydyr. Hormatly Prezidentimiziň täze kitabynyň şöhratly wakalary bilen bilen taryha giren «Pähim-paýhas ummany Magtymguly Pyragy» ýylynda halkymyza peşgeş bermegi  aýratyn many-mazmuna eýe bolup, ajaýyp sazlaşygy emele getirýär.  Mähriban halkymyz üçin bahasyna ýetip bolmajak gollanma, ruhy hazyna bolan kitapda Magtymgulyny öwreniş ylmynyň döreýşi we ösüşi, akyldaryň edebi mirasyny öwrenmegiň we öwretmegiň usullary, beýik söz ussadynyň döredijiligini dünýäde wagyz etmek boýunça alnyp barlan işler öz beýanyny tapýar. Dabarada merdana halkymyza ajaýyp serpaý ýapan Arkadagly Gahryman Serdarymyza aýdylan hoşallyk sözleri ýürek buýsanjy bolup ýaňlandy.

Sungat ussatlarynyň ýerine ýetiren çykyşlary dabara aýratyn öwüşgin çaýdy. Täze taryhy döwrüň bedew batly ösüşlerini, parahatçylygy, asuda durmuşy wasp edýän aýdymlar, şeýle-de beýik söz ussadynyň şygyrlaryna döredilen aýdymlar belentden ýaňlandy.

Tanyşdyrylyş dabarasynyň ahyrynda hormatly Prezidentimiziň adyna Ýüzlenme kabul edildi. 

Welaýat häkimliginiň mejlisler jaýynda 2025-nji ýylyň «Halkara parahatçylyk we ynanyşmak ýyly» diýlip atlandyrylmagyny hem-de ýylyň nyşanynyň many-mazmunyny ilatyň arasynda giňden düşündirmek maksady bilen wagyz-nesihat çäresi geçirildi. Onda giň gerim berlen çykyşlarda aýratyn nygtalyşy ýaly, türkmen halkynyň Milli Lideri Gahryman Arkadagymyzyň saýasynda, hormatly Prezidentimiz Arkadagly Gahryman Serdarymyzyň paýhasly baştutanlygynda berkarar Diýarymyz täze taryhynyň her bir ýylyny uly üstünliklere besleýär. Munuň özi agzybir, zähmetsöýer halkymyzy ýeneki üstünliklere ruhlandyrýar. Birleşen Milletler Guramasynyň Baş Assambleýasy tarapyndan ykrar edilen hemişelik Bitaraplygymyzyň 30 ýyllyk taryhy senesiniň uludan toýlanyljak ýylyny hem dünýäde parahatçylygy pugtalandyrýan, ynanyşmagy dabaralandyrýan şunuň ýaly döwletli tutumlara beslemek merdana halkymyzyň naýbaşy arzuwydyr. Ýylyň şygarynyň we nyşanynyň, Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutýan ugurlarynyň Konsepsiýasynyň çuňňur many-mazmuny muny ähli aýdyňlygy bilen görkezýär. Wagyz-nesihat çäresinde çykyş eden Türkmenistanyň Mejlisiniň kada-kanunçylyk baradaky komitetiniň başlygy Batyr Baýlyýew, Türkmenistanyň Magtymguly adyndaky Ýaşlar guramasynyň Merkezi geňeşiniň başlygy, Mejlisiň deputaty Ýazpolat Keriýew hem-de «Adalat» gazetiniň baş redaktory Maksat Nuryýew bu barada giňişleýin durup geçdiler.

Hemişelik Bitaraplygymyzyň giň mümkinçiliklerini ählumumy bähbitleriň hyzmatynda goýýan Gahryman Arkadagymyzyň hem-de Arkadagly Gahryman Serdarymyzyň adyna aýdylan alkyşly sözler çäräniň tutuş dowamynda joşgunly ýaňlandy.

          Halkara Bitaraplyk gününiň we hemişelik Bitaraplygymyzyň 29 ýyllyk şanly senesiniň dabaralary welaýatymyzda ýokary ruhubelentlige beslendi. Baýramçylyk gününiň dabarasy Balkanabat şäherindäki Baş baýdak meýdançasynda Döwlet senamyzyň ýerine ýetirilmegi we ýaşyl Tugumyzyň belende galdyrylmagy bilen başlandy. Welaýat häkimliginiň, welaýat medeniýet müdirliginiň, jemgyýetçilik guramalarynyň bilelikde guramagynda geçirilen dabarada bu ýere ýygnananlary parahatçylygy, dostlugy, agzybirligi, asudalygy dabaralandyrýan ajaýyp baýram bilen gutlaýan buýsançly çykyşlara giň orun berildi. Çykyş edenleriň belleýişleri ýaly, Garaşsyz, baky Bitarap Watanymyz bitaraplyk ýörelgesine berk eýermek bilen, parahatçylygy, durnukly ösüşi, ählumumy howpsuzlygy üpjün etmekde dünýä döwletleri, abraýly halkara guramalar bilen gatnaşyklary ýola goýmakda uly tejribe toplady. Hormatly Prezidentimiziň oýlanyşykly we öňdengörüjilikli başlangyçlary esasynda durnukly energetika we ulag ulgamy, ekologiýa, azyk howpsuzlygy, üstaşyr ulag geçelgeleri, medeni-ynsanperwer hyzmatdaşlyk gatnaşyklary hem-de beýleki halkara ähmiýetli meseleler boýunça durmuşa geçirilýän işler rowaçlyga beslenýär.

Dabarada welaýatymyzyň medeniýet we sungat ussatlarynyň ýerine ýetiren aýdym-sazlary, sahna ussatlarynyň çykyşlary alkyşly sözleriň dowamy bolup, oňa gatnaşanlaryň baýramçylyk ruhuny belende göterdi.  Sungat ussatlarynyň joşgunly çykyşlarynda döwlet Baştutanymyzyň ynsanperwer döwlet syýasatynyň, halklaryň dostlukly gatnaşyklarynyň mizemez binýady bolup durýan hemişelik Bitaraplygymyzyň, ösüşiň, beýik özgertmeleriň ýoly bilen öňe barýan ata Watanymyzyň waspy ýetirildi.

Dabara gatnaşanlar berkarar döwletimiziň şan-şöhratyny, abraý-mertebesini has-da belende göterýän Gahryman Arkadagymyza, Arkadagly Gahryman Serdarymyza çäksiz alkyş aýtdylar.

Halkara Bitaraplyk güni hem-de hemişelik Bitaraplygymyzyň 29 ýyllygy mynasybetli geçirilen dabaralar welaýatymyzyň ähli etraplardyr şäherlerinde hem giň gerime eýe boldy.

Balkanabat şäherindäki Nebitçileriň medeniýet köşgünde Halkara Bitaraplyk güni mynasybetli Türkmenistanyň Magtymguly adyndaky Ýaşlar guramasynyň welaýat geňeşiniň, Türkmenistanyň Agrar partiýasynyň welaýat komitetiniň, Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminiň, «Türkmennebit» döwlet konserniniň Balkanabat nebitçilik orta hünär okuw mekdebiniň hem-de welaýat ýörite sungat mekdebiniň bilelikde guramaklarynda «At-abraýy dünýä dolan Bitarap Türkmenistan!» atly dabaraly maslahat geçirildi.

Uly ruhubelentlige beslenen çärede çykyş edenler hemişelik Bitaraplygymyzyň bize asudalykda, agzybirlikde erkana ýaşamaga, mukaddes Garaşsyzlygymyzy berkitmäge giň mümkinçilikleri açandygy, ata-babalarymyzdan dowam edip gelýän ynsanperwerlik, hoşniýetlilik, birek-birege ynam bildirmek we hormat goýmak ýaly ýörelgeleriň döwletimiziň daşary syýasatynyň düýp özenini düzýändigi we ýurdumyzyň halkara derejede alyp barýan işleriniň dünýä jemgyýetçiligi tarapyndan ykrar edilýändigi barada buýsanç bilen gürrüň etdiler. Dünýä döwletleri bilen syýasy, ykdysady, medeni, ylym-bilim we beýleki ugurlarda hoşniýetli gatnaşyklary ýola goýmakda uly tagallalary edýän Arkadagly Gahryman Serdarymyza  alkyş sözlerini aýtdylar.

Dabaraly maslahatyň dowamynda aýdym-sazlar belentden ýaňlanyp, olarda baky Bitaraplygymyzyň, eziz Watanymyzyň, Berkarar döwletiň täze eýýamynyň Galkynyşy döwründe durmuşa geçirilýän beýik işleriň waspy mynasyp beýanyny tapdy.

Geçen şenbe güni hormatly Prezidentimiziň asylly başlangyjyna eýerip, ählihalk bag ekmek dabarasyna welaýatymyzyň ilaty hem ýokary watançylyk hyjuwy bilen gatnaşdylar. Köpçülikleýin bag nahallaryny oturtmak üçin saýlanyp alnan ýerler, sözüň doly manysynda, baýramçylyk keşbine beslendi.

Arkadagly Gahryman Serdarymyzyň ata Watanymyzy bagy-bossanlyga öwürmek, onuň gözel  tebigatyny has-da baýlaşdyrmak we bu il-ýurt bähbitli, döwlet ähmiýetli işi yzygiderli dowam etdirmek boýunça beren anyk tabşyryklaryndan göwünleri galkynan welaýat merkeziniň ýaşaýjylary «Türkmeniň ak öýi» binasynyň golaýyndaky ýere bag ekmek dabarasyna ýygnandylar. Bu işe bilim, medeniýet, saglygy goraýyş, sport we beýleki ulgamlaryň işgärleri, jemgyýetçilik guramalarynyň, ýaşuly nesliň wekilleri, edara-kärhanalaryň zähmet toparlary, talyp ýaşlar hem-de welaýatyň köp sanly ýaşaýjylary gatnaşdylar. Watançylyk şygarlary, türkmeniň ak öýleri bilen bezelen meýdançada guralan dabarada welaýatymyzyň tanymal bagşy-sazandalarynyň, adygan tans, halk döredijilik toparlarynyň milli öwüşginli, şirin owazly, belent mukamly çykyşlary giňden ýaýbaňlandyryldy. Olarda ösüşdir özgertmelere beslenen bagtyýar durmuşymyzyň, päk zähmetiň waspy beýanyny tapdy.

Muzeý gymmatlyklaryndan, senetçilige, amal-haşam sungatyna degişli gurallardyr taýýar önümlerden, ýaşajyk bag nahallarynyň we gülleriň dürli görnüşlerinden guralan sergiler hem aýratyn many-mazmuna eýe boldy. Baglaryň ilkinji nahallaryny oturtmaklygyň ýaşuly nesliň wekillerine hem-de  şol gün durmuş toýuny toýlaýan ýaş çatynjalara ynanylmagy dabara gatnaşyjylaryň ruhubelentligini has-da  belende göterdi.

        Zähmet baýramçylygynyň dowamynda bu ýerde 4 müň düýp pürli bag nahallary oturdyldy we göwnejaý ideg edildi. Şol gün gözel künjekde oturdylan bag nahallary täze ýaşyl zolagy emele getirdi hem-de «Türkmeniň ak öýi» binasynyň gözelligine gözellik goşdy. Köpçülikleýin çäre welaýat merkezindäki seýilgählerde, köçeleriň ugurlarynda, önümçilik hem-de medeni-durmuş maksatly binalaryň daş-töwereklerinde geçirilip, hakyky zähmet baýramçylygyna öwrüldi.

Welaýatymyzda ählihalk bag ekmek dabarasyna gatnaşanlar dürli bag nahallarynyň jemi 15 müň 320 düýbüni oturtdylar, ozal ekilen baglaryň 60 müňe golaýyna ideg etdiler. Olar ýurdumyzy bagy-bossanlyga öwürmekde amala aşyrýan beýik işleri üçin Gahryman Arkadagymyza hem-de Arkadagly Gahryman Serdarymyza alkyş aýtdylar.