Türkmen zenanlarynyň çeper eliniň hünäri barada näçe aýtsaň hem az. Zenanlarymyzyň ähli döwürde öz öýüni bezän ajap halylarynyň şan-şöhraty dünýä doldy. Olar öz lybaslaryna aýratyn üns berýärler. Asyrlarboýy türkmen zenanlary lybaslaryny owadan keşdeler bilen keşdeläp, onuň milliligini has-da ösdüripdirler.

Zenany yssydan-sowukdan goraýan başatgyç halk amaly sungatynyň bir bölegidir. Zenanlarymyz ony kümüş şaý-sepler bilen bezelen börügiň üstünden atynypdyrlar.

Türkmenlerde zenanyň ýaşy soralmaýar. Dogrusy, onuň geregem ýok. Çünki onuň başatgyjyndan haýsy ýaş tapgyryndandygyny bilse bolýar. Sebäbi olar zenanyň ýaşyna görä bolýar. Gyzyl, ýaşyl, sary we ak başatgyçlar ýylyň dört paslyny aňladýar.

Türkmenistanyň Döwlet medeniýet merkeziniň Döwlet muzeýiniň sergisine baranymyzda biz zenanlarymyzyň başatgyçlarynyň inçe syrlary bilen tanyşdyk. Gyz durmuşa çykanda oňa gyzyl kürte atylýandygyny, kürtäniň «goçak», «tazy guýruk», «okgözi», «tegbent», «çaňňa», «para» keşdeler bilen bezelýändigini muzeýiň işgäri Enejan Altyýewa gürrüň gürrüň berdi. Gelin gyzyl kürtäni 40 gün göterýär.

Soňra gelin gyzyl kürtäni ýaşyl çyrpa çalyşýar we ony 40 ýaşaýança toý-baýramlarda atynýar. Ýaşyl reňk bahary, tebigatyň gülzarlygyny, daşky dünýäniň gözelligini aňladýar, bu hem zenanyň 40 ýaşyna çenli döwre gabat gelýär.

Oral aýal güýzi, miweleriň ýetişen döwrüni aňladýan, ýagny çagalaryny terbiýeläp, dogan-garyndaşlarynyň we goňşularynyň arasynda hormat-sarpa mynasyp bolan zenana kybap sary çyrpy atynýar.

60 ýaşdan geçen ene bolsa at-abraýyň, danalygyň nyşany bolan ak çyrpy atynýar.

Başatgyçlar elde dokalan keteniden tikilýär. Onuň amaly däl-de, bezeglik ähmiýeti bar. Günorta sebitiň zenanlarynda ýasama ýeň gabat gelýär. Olara salynýan keşdä ortaça birnäçe aý sarp edilýär.

Türkmenistanyň Döwlet medeniýet merkeziniň Döwlet muzeýine Türkmenistanyň Prezindetiniň käbesi Ogulabat ejäniň baldyzy üçin tiken kürtesi peşgeş berildi.

Şeýle-de, ildeşlerimiz Oguz han adyndaky «Türkmenfilm» kinostudiýasynda surata düşürilýän «Gyzyl kürte» çeper filminiň görkezilerine sabyrsyzlyk bilen garaşýarlar.

Sergide ýurdumyzyň sebitleriniň ählisinde ýaşaýan zenanlaryň kürteleriniň 30-dan gowragy görkezilýär. Halylar we Türkmenistanyň halk nakgaşlary Yzzat Gylyjowyň «Jadyly nagyşlar», Şamuhammet Akmuhammedowyň «Halk döredijiligi», Gulnazar Bekmyradowyň «Nagyşlar» ýaly çeper elli zenanlarymyza bagyşlanan suratlary sergä bezeg berýär.

Şu gün hormatly Prezidentimiz Gurbanguly Berdimuhamedow BMG-niň Ösüş maksatnamasynyň Türkmenistanda täze bellenilen hemişelik wekili hanym Narine Saakýany kabul etdi.

Diplomat döwlet Baştutanymyza ynanç hatyny gowşuryp, BMG-niň Baş sekretary Antoniu Guterrişiň mähirli salamyny ýetirdi. Baş sekretar ösüşlere beslenen özgertmeler ýoly bilen ynamly barýan Garaşsyz Türkmenistan bilen köpýyllyk netijeli hyzmatdaşlygyň mundan beýläk-de çuňlaşdyrylmagyna özüniň ýolbaşçylyk edýän guramasynyň uly gyzyklanma bildirýändigini beýan etdi.

Duşuşykda hormatly Prezidentimiz Gurbanguly Berdimuhamedowyň alyp barýan oňyn daşary syýasat ýörelgesiniň, onuň ählumumy durnukly ösüşiň bähbidine giň halkara hyzmatdaşlyga gönükdirilmeginiň köp babatda ikitaraplaýyn gatnaşyklaryň netijeli häsiýetini kesgitländigi aýratyn nygtaldy. BMG-niň Merkezi Aziýa üçin öňüni alyş diplomatiýasy boýunça sebit merkeziniň baş edarasynyň Aşgabatda açylmagy hem-de türkmen paýtagtynda halkara ähmiýetli bilelikdäki wekilçilikli maslahatlaryň yzygiderli geçirilmegi bildirilýän uly ynamyň hem-de hormatyň aýdyň subutnamasydyr.

Milli Liderimiz BMG-niň Ösüş maksatnamasynyň Türkmenistandaky wekili Narine Saakýany ýurdumyzda işe başlamagy bilen gutlap, Birleşen Milletler Guramasynyň ýolbaşçylaryna iň oňat arzuwlaryny beýan etdi. Bu gurama bilen hyzmatdaşlyk daşary syýasat strategiýamyzyň ileri tutulýan ugrudyr.

Söhbetdeşligiň dowamynda bilelikdäki taslamalaryň durmuşa geçirilişiniň barşyna garaldy, ýurdumyzy durmuş-ykdysady taýdan ösdürmek boýunça maksatnamada kesgitlenilen wezipeleri üstünlikli ýerine ýetirmäge hem-de Durnukly ösüş maksatlarynyň gazanylmagyna gönükdirilen bilelikdäki işleri dowam etmegiň geljegi ara alnyp maslahatlaşyldy. Ýeri gelende bellesek, Türkmenistan Durnukly ösüş maksatlaryny milli derejä laýyk getiren ilkinji döwletleriň biridir.

Duşuşygyň dowamynda 2021 — 2025-nji ýyllar döwri üçin hyzmatdaşlygyň Maksatnamasyna laýyklykda, ykdysadyýeti diwersifikasiýa ýoly bilen ösdürmegiň, sanlylaşdyrmagyň, howanyň üýtgemegi, saglygy goraýyş, durmuş goraglylygy, adam hukuklary hem-de ençeme beýleki meseleleriň ileri tutulýan ugurlaryň hataryna çykarylandygy bellenildi.

BMG-niň Ösüş maksatnamasynyň hemişelik wekili pursatdan peýdalanyp, hormatly Prezidentimiz Gurbanguly Berdimuhamedowy we türkmen halkyny geljek 30 ýyl üçin Türkmenistany durmuş-ykdysady taýdan ösdürmegiň täze Milli maksatnamasynyň kabul edilmegi bilen ýene-de bir gezek gutlady.

Siziň ýurduňyz BMG-niň Ösüş maksatnamasyna, biziň hemmetaraplaýyn goldawymyza hemişe bil baglap biler. Biz halkara gurama hökmünde Türkmenistana dünýä tejribesini we täze tehnologiýalary çekmäge şat bolarys diýip, diplomat ynandyrdy.

Birleşen Milletler Guramasynyň hemişelik wekili Türkmenistan bilen BMG-niň Ösüş maksatnamasynyň arasyndaky gatnaşyklaryň soňky döwürde ep-esli derejede ösen depginini kanagatlanma bilen nygtap, döwrüň möhüm meseleleriniň çözgüdini tapmakda ýurdumyzyň eýeleýän işjeň ornuna ýokary baha berdi. Dürli ulgamlarda amala aşyrylan bilelikdäki taslamalaryň birnäçesi munuň subutnamasydyr.

Häzir garaşsyz ösüş ýyllarynda parahatçylyk döredijilik babatda örän uly tejribe toplan Bitarap Türkmenistan Merkezi Aziýada durnukly ösüşe, parahatçylygyň we howpsuzlygyň pugtalandyrylmagyna uly goşant goşýar hem-de sebit we umumydünýä häsiýetli döwrüň möhüm başlangyçlarynyň ençemesini öňe sürýär. Şol başlangyçlar hormatly Prezidentimiz Gurbanguly Berdimuhamedow tarapyndan BMG-niň Baş Assambleýasynyň belent münberinden yzygiderli beýan edilýär.

Milli Liderimiz türkmen tarapynyň Owganystandaky ýagdaýlary durnuklylaşdyrmak, dünýäde energiýa howpsuzlygyny üpjün etmek, ulag ulgamynda halkara hyzmatdaşlygy ösdürmek, serişdeleri oýlanyşykly peýdalanmak, howanyň üýtgemegi hem-de daşky gurşawy goramak ýaly adamzadyň möhüm meselelerine gönüden-göni degişli bolan başlangyçlaryny BMG-niň hemmetaraplaýyn goldaýandygy üçin minnetdarlyk bildirip, Türkmenistanyň abraýly guramanyň degişli edaralary we düzümleýin bölümleri bilen ýakyndan gatnaşyk edip, halkara durmuşyň ählumumy gün tertibi boýunça aç-açan pikir alyşmaga mundan beýläk-de örän işjeň gatnaşmagy maksat edinýändigini aýtdy.

Hormatly Prezidentimiz Gurbanguly Berdimuhamedow jogapkärli hem-de möhüm işinde Narine Saakýana üstünlikleri arzuw edip, Türkmenistanyň we BMG-niň Ösüş maksatnamasynyň arasynda ýola goýlan netijeli gatnaşyklaryň geljekde has-da işjeň dowam etdiriljekdigine pugta ynam bildirdi.

BMG-niň Ösüş maksatnamasynyň Türkmenistandaky hemişelik wekili päk niýet bilen ak ýol arzuw edendigi üçin hoşallyk bildirip, umumy bähbitlere kybap gelýän däp bolan hyzmatdaşlygy ýyl-ýyldan barha berkitmek hem-de ony ösüşiň täze derejesine çykarmak üçin ähli tagallalary etjekdigine döwlet Baştutanymyzy ynandyrdy.

Men bu ýerde mundan 10 ýyl ozal hem işläpdim we bu gün myhmansöýer Türkmenistana täze derejede, öýümize gelen ýaly duýgy bilen gaýdyp geldim diýip, diplomat nygtady hem-de milli Liderimize we tutuş türkmen halkyna iň oňat arzuwlaryny beýan etdi.

Şu gün Türkmenistanda Saýlawlary we sala salşyklary geçirmek boýunça merkezi toparyň mejlisi boldy. Oňa Merkezi saýlaw toparynyň ýolbaşçysy we agzalary gatnaşdylar. Agrar partiýanyň Türkmenistanyň Prezidenti wezipesine hödürlän dalaşgärini bellige almak mejlisiň gün tertibiniň esasy meselesi boldy.

Mary welaýatynyň häkiminiň orunbasary Agajan Bekmyradow iň ýokary döwlet wezipesine dalaşgär hökmünde bellige alyndy. Ol Agrar partiýanyň düýn geçirilen nobatdan daşary IV gurultaýynda Türkmenistanyň Prezidenti wezipesine dalaşgärlige hödürlenildi hem-de biragyzdan makullanyldy. Gurultaýa jemgyýetçilik guramalarynyň, köpçülikleýin habar beriş serişdeleriniň wekilleri hem gatnaşdylar.

Gurultaýda Agajan Bekmyradowyň ukyply ýolbaşçy hem-de guramaçydygy, hormata mynasyp hünär we şahsy häsiýetlere eýedigi, munuň bolsa ony ýokary döwlet wezipesine dalaşgärlige hödürlemäge esas döredýändigi bellenildi.

Türkmenistanyň Prezidentiniň wezipesine dalaşgär hökmünde bellige alnan Mary welaýatynyň häkiminiň orunbasary Agajan Bekmyradowa degişli şahsyýetnama gowşuryldy.

A.Bekmyradow Türkmenistanda Saýlawlary we sala salşyklary geçirmek boýunça merkezi toparyň mejlisine gatnaşyjylara hoşallyk bildirip, Türkmenistanyň Prezidenti wezipesine saýlanan ýagdaýynda, öz bilimini, ukyp-başarnygyny we tejribesini bildirilen ynamy ödemäge gönükdirjekdigine ynandyrdy.

Şeýlelikde, Türkmenistanyň Saýlaw kodeksine laýyklykda, 12-nji marta bellenilen Prezident saýlawlaryna taýýarlyk görmek boýunça çäreler dowam edýär. Olaryň hakyky demokratik esasda geçýändigini hem-de Garaşsyz döwletimiziň täze taryhynda möhüm tapgyr boljakdygyny ynam bilen aýdyp bolar.

Şu gün döwlet Baştutanynyň öňdäki boljak saýlawlaryna taýýarlygyň çäklerinde Türkmenistanda Saýlawlary we sala salşyklary geçirmek boýunça merkezi toparyň mejlisi boldy. Oňa Merkezi saýlaw toparynyň ýolbaşçysy we agzalary, ýurdumyzyň Demokratik partiýasynyň başlygy gatnaşdylar. Demokratik partiýanyň Türkmenistanyň Prezidenti wezipesine hödürlän dalaşgärini bellige almak mejlisiň gün tertibiniň esasy meselesi boldy.

Saýlawlary we sala salşyklary geçirmek boýunça merkezi topara gelen Ministrler Kabinetiniň Başlygynyň orunbasary Serdar Berdimuhamedow şu gün iň ýokary döwlet wezipesine dalaşgär hökmünde bellige alyndy. Ozal habar berlişi ýaly, Serdar Berdimuhamedowy Türkmenistanyň Prezidenti wezipesine dalaşgärlige hödürlemek Demokratik partiýanyň düýn geçen nobatdan daşary IX gurultaýynda biragyzdan makullanyldy. Gurultaýa delegatlar bilen bir hatarda, jemgyýetçilik guramalarynyň, köpçülikleýin habar beriş serişdeleriniň wekilleri hem gatnaşdylar.

Forumda çykyş edenleriň belleýşi ýaly, Serdar Berdimuhamedow ajaýyp ýolbaşçylyk we guramaçylyk häsiýetlerine eýedir. Ol pespäl hem-de islendik meselä jogapkärçilikli çemeleşýän ukyply hojalykçy we sagdyn durmuş ýörelgeleriniň tarapdary hökmünde öz kärdeşleriniň arasynda uly hormata eýe boldy. Gurultaýa gatnaşyjylar ýokary işjeňlige we ahlak häsiýetlerine eýe bolan Serdar Berdimuhamedowyň ýolbaşçy wezipelerde gazanan üstünliklerini we tejribelerini nazara alyp, ony ýokary döwlet wezipesine dalaşgär hökmünde bellige almak kararyny biragyzdan makulladylar.

Türkmenistanyň Prezidentiniň wezipesine dalaşgär hökmünde bellige alnan Ministrler Kabinetiniň Başlygynyň orunbasary Serdar Berdimuhamedowa degişli şahsyýetnama gowşuryldy.

Wise-premýer bu ýere ýygnananlara ýüzlenip, özüni ýokary döwlet wezipesine dalaşgärlige hödürländikleri üçin hoşallyk bildirdi. Ol Türkmenistanyň Prezidenti wezipesine saýlanan ýagdaýynda özüniň güýjüni, bilimini, tejribesini we ukyp-başarnygyny gaýgyrman bildirilen ynama mähriban halkymyzyň we Watanymyzyň abadançylygynyň, bagtyýarlygynyň bähbidine amala aşyrylýan anyk işler bilen hötde gelmek ugrunda zerur tagallalary etjekdigine ynandyrdy.

Şeýle hem şu gün Aşgabatda, Oba hojalyk toplumynyň binasynda ýurdumyzyň Agrar partiýasynyň nobatdan daşary IV gurultaýy geçirildi, onuň gün tertibine Türkmenistanyň Prezidenti wezipesine dalaşgäri hödürlemek meselesi girizildi. Gurultaýa jemgyýetçilik guramalarynyň, köpçülikleýin habar beriş serişdeleriniň wekilleri we beýlekiler gatnaşdylar.

Gurultaýa gatnaşyjylaryň gyzyklanma bildirip pikir alyşmalarynyň barşynda ýokary döwlet wezipesine dalaşgärlige Mary welaýatynyň häkiminiň orunbasary Agajan Bekmyradowy hödürlemek baradaky teklibe garaldy.

Şunuň bilen baglylykda, Agrar partiýanyň nobatdan daşary gurultaýyna gatnaşyjylar Milli Geňeşiň Halk Maslahatynyň mejlisinde döwlet Baştutanymyzyň Watanymyzyň hem-de halkymyzyň ykbaly üçin jogapkärçiligi öz üstüne almaga ukyply ýaş ýolbaşçylary öňe sürmek barada aýdan pikirleriniň möhümdigini bellediler.

Çykyş edenler A.Bekmyradowyň ýolbaşçylyk we guramaçylyk başarnyklaryny, onuň hormata mynasyp hünärini we şahsy häsiýetlerini bellediler.

Agajan Bekmyradow 1995-nji ýylda Türkmen döwlet binagärlik-gurluşyk institutyny tamamlap, inžener-gurluşykçy hünärini ele aldy. Ol dürli ýyllarda Mary welaýatynyň etraplarynyň häkimliklerinde, Türkmenistanyň Magtymguly adyndaky Ýaşlar guramasynyň Wekilbazar etrap mejlisinde, bu etrabyň Kärdeşler arkalaşyklarynyň birleşmesinde işledi. 2017-nji ýylyň aprel aýyndan bäri A.Bekmyradow Mary welaýatynyň häkiminiň orunbasary wezipesinde işleýär.

Ýokarda beýan edilenlerden ugur alyp, gurultaýa gatnaşyjylar ony ýokary döwlet wezipesine dalaşgär hökmünde hödürlemek baradaky çözgüdi kabul etdiler.

Çykyşlar we ses bermek tamamlanandan soňra, degişli karar biragyzdan kabul edildi.

Öz nobatynda A.Bekmyradow üstüne ýüklenilen uly jogapkärçilige düşünýändigini hem-de bildirilen ynamy ödemek üçin ähli tagallalary etjekdigini aýtdy.

Öňde duran saýlawlaryň düýpgöter täze taryhy şertlerde geçiriljekdigini bellemek gerek. Bu gün mähriban Watanymyz hormatly Prezidentimiz Gurbanguly Berdimuhamedowyň parasatly baştutanlygynda düýpli durmuş-ykdysady we demokratik özgertmeleri durmuşa geçirmekde, jemgyýetimizde türkmen halkyna mahsus halk häkimiýetlilik ýörelgelerini pugtalandyrmakda, medeni-ynsanperwerlik ulgamynyň işini kämilleşdirmekde ägirt uly üstünlikler gazandy.

Häzirki döwürde özüniň saýlap alan döredijilikli ýoluna üýtgewsiz ygrarly bolan Garaşsyz, Bitarap Türkmenistan döwletimizde ýurdumyzyň mundan beýläk-de hemmetaraplaýyn ösüşini üpjün etmäge gönükdirilen giň gerimli özgertmeler maksatnamalary we taslamalar durmuşa geçirilýär. Şunuň bilen baglylykda, “Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynyň” üstünlikli amala aşyrylmagyna aýratyn ähmiýet berilýär.

Mälim bolşy ýaly, bu wajyp resminama Türkmenistanyň Milli Geňeşiniň Halk Maslahatynyň 11-nji fewralda geçirilen mejlisinde hormatly Prezidentimiz Gurbanguly Berdimuhamedowyň gol çeken Karary bilen tassyklanyldy. Ol mejlis döwletimiziň we jemgyýetimiziň durmuşynda taryhy ähmiýetli waka öwrüldi. Bu Maksatnamadan we beýleki geljegi uly meýilnamalardan gelip çykýan möhüm wezipelerde täzeçe pikirlenip bilýän, giň aň-düşünjesi hem-de dünýägaraýşy bolan ýaş nesilleriň, hünärmenleriň ýolbaşçy wezipelerde işlemegine möhüm orun berilýär.

Şunuň bilen baglylykda, hormatly Prezidentimiziň Milli Geňeşiň Halk Maslahatynyň mejlisindäki taryhy çykyşynda Watanymyzyň hem-de halkymyzyň ykbaly üçin jogapkärçiligi öz üstüne almaga ukyply ýaş ýolbaşçylary öňe sürmek barada beýan eden pikiriniň aýratyn ähmiýetlidigini bellemek gerek. Ýaşuly nesil we ähli türkmenistanlylar bu başlangyjy dolulygyna goldadylar. Onda döwürleriň we nesilleriň aýrylmaz arabaglanyşygy öz beýanyny tapýar.

Döwlet Baştutanymyz Milli Geňeşiň Halk Maslahatynyň mejlisindäki çykyşynda diňe bir geljegimiziň däl, eýsem, şu günümiziň hem ýaşlar bilen baglanyşdyrylýandygy barada aýtdy. Her bir döwletiň beýikligi onuň ýetişdirip, öňe çykaryp bilen nesilleri bilen kesgitlenýär. Bu gün ýurdumyzyň watansöýüji ýaşlary ähli ulgamlarda ýokary işjeňlik görkezýärler. Olar milli mirasymyza çuňňur sarpa goýmak bilen, köpugurly we çalt özgerýän häzirki zamananyň ösen talaplaryna mynasyp hötde gelip bilýändikleri bilen tapawutlanýarlar. Ýaşlar döwletimiziň şu güni we geljegi, biziň başyny başlan işlerimizi mynasyp dowam etdirijilerdirler.

“Ýaşuly nesliň aň-paýhasy, baý tejribesi bilen ýaşlaryň gujur-gaýratynyň utgaşan ýerinde bolsa ýetilmejek maksat, gazanylmajak sepgit ýokdur!” diýip, döwlet Baştutanymyz çykyşynda belledi. Şeýle hem hormatly Prezidentimiz Gurbanguly Berdimuhamedow ýurdumyzy ösdürmegiň täze tapgyrynda döwlet dolandyryşynda häzirki zamanyň ruhy şertleri, ýokary talaplary esasynda kemala gelen ýaş ýolbaşçylara ýol bermegi makul bilýändigini aýdyp, özüniň toplan uly durmuş hem-de syýasy tejribesini bolsa mundan beýläk Halk Maslahatynyň Başlygy hökmünde bu ugra gönükdirmegi maksat edinýändigini beýan etdi.

Ýaşlara öz güýç-gaýratlaryny, bilim-ukyplaryny gaýgyrman tagalla etmek, zähmet çekmek borjy düşýär. Olaryň ýaşuly nesilleriň paýhasly sargytlaryna, baý durmuş tejribesine daýanyp, özleriniň paýhas we döredijilik mümkinçiliklerini has doly peýdalanmagy, möhüm döwlet wezipelerini netijeli ýerine ýetirmegi, Watanymyzyň mundan beýläk-de gülläp ösmegine we onuň halkara abraýynyň belende galmagyna, mähriban halkymyzyň abadan we bagtyýar durmuşynyň üpjün edilmegine gönükdirilen toplumlaýyn maksatnamalary amala aşyrmagy zerur bolup durýar.

Şunuň bilen baglylykda, saýlawlary möhletinden öň geçirmek babatda Türkmenistanyň Konstitusiýasynyň 81-nji maddasyna, Türkmenistanyň Saýlaw kodeksiniň 86-njy maddasyna laýyklykda, Milli Geňeşiň Mejlisiniň karary bilen ýurdumyzda Prezident saýlawlaryny 2022-nji ýylyň 12-nji martynda geçirmek bellenildi.

Saýlawlary we sala salşyklary geçirmek baradaky merkezi topar şu ýylyň 14-nji fewralyndan saýlaw möwsüminiň başlanýandygyny yglan etdi. Ozalkylary ýaly, açyklyk, demokratik we giň bäsdeşlik esasynda geçirilmegi bu jemgyýetçilik-syýasy möwsümiň esasy şerti bolup durýar.

Milli kanunçylyga we halkara tejribä laýyklykda, ähli dalaşgärlere saýlawçylar bilen duşuşmak, saýlawlaryň öň ýanynda olary maksatnamalary bilen tanyşdyrmak, köpçülikleýin habar beriş serişdeleriniň üsti bilen wagyz-nesihat çärelerini geçirmek üçin deň hukuklar we mümkinçilikler berilýär.

Saýlaw möwsümine taýýarlyk görmek we ony ýokary guramaçylyk derejesinde, ýurdumyzyň Konstitusiýasyna we umumy ykrar edilen halkara hukuk kadalaryna laýyklykda geçirmek üçin ähli zerur şertler döredilýär.

Şeýlelikde, Türkmenistanyň Prezidentiniň öňde boljak saýlawlary türkmen halkynyň mizemez bitewüligini, agzybirligini, döwletimiziň we jemgyýetimiziň halkymyzyň şöhratly taryhyndan gözbaş alýan we häzirki döwürde mynasyp derejede dowam etdirilýän demokratik ýörelgelere üýtgewsiz ygrarlylygyny has aýdyňlygy bilen äşgär eder.

Şu gün Jemgyýetçilik guramalarynyň merkezinde Türkmenistanyň Demokratik partiýasynyň nobatdan daşary IX gurultaýy geçirildi. Ýurdumyzyň iri syýasy guramalarynyň biri bolan Demokratik partiýadan Türkmenistanyň Prezidentiniň wezipesine dalaşgäri hödürlemek gurultaýyň gün tertibiniň esasy meselesi boldy.

Foruma delegatlar bilen birlikde, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdylar.

Mälim bolşy ýaly, 11-nji fewralda geçirilen Milli Geňeşiň Halk Maslahatynyň taryhy mejlisinde döwlet Baştutanymyz häzirki wagtda milli ruhly, döwrebap pikirlenýän ýaşlaryň, şol sanda ýaş ýolbaşçylaryň kemala gelendigi baradaky meselä aýratyn üns berdi. Ýurdumyzy mundan beýläk-de durnukly we durmuş-ykdysady taýdan hemmetaraplaýyn ösdürmekde, onuň dünýä giňişligindäki ornuny berkitmekde örän uly kesgitleýji ähmiýete eýedigi nazara alnyp, ýaşlara milli döwlet bähbitli jogapkärli işler ynanylýar.

Şunuň bilen baglylykda, Milli Geňeşiň Mejlisiniň karary bilen, 2022-nji ýylyň 12-nji martynda Türkmenistanyň Konstitusiýasynyň 81-nji, Türkmenistanyň Saýlaw kodeksiniň 86-njy maddalaryna laýyklykda, Türkmenistanyň Prezidentiniň saýlawlaryny geçirmek bellenildi. Kodeksiň bu maddasy saýlawlaryň möhletinden öň geçirilmegine degişlidir. Ýaýbaňlanan möwsümiň baş ýörelgesi türkmen jemgyýetinde onuň gadymy demokratik däplerini has-da pugtalandyrmagyň hökmany şerti hökmünde giň bäsdeşlik esasyndan ybaratdyr.

Saýlawlary we sala salşyklary geçirmek boýunça merkezi topar 2022-nji ýylyň 14-nji fewralyndan saýlaw möwsüminiň başlanýandygyny yglan etdi, şoňa görä-de, şu gün milli kanunçylyga laýyklykda, ýokary döwlet wezipesine dalaşgärleri hödürlemek başlandy.

Häzirki forumyň dowamynda oňa gatnaşyjylar Türkmenistanyň Prezidentiniň wezipesine Ministrler Kabinetiniň Başlygynyň orunbasary Serdar Berdimuhamedowy dalaşgärlige hödürlemek baradaky teklibe garadylar.

Bu mesele boýunça pikir alyşmalarda Demokratik partiýanyň agzalary — guramanyň işjeňleri çykyş etdiler. Şolaryň hatarynda Magtymguly adyndaky Türkmen döwlet uniwersitetiniň kafedra müdiri, professor, Hormatly il ýaşulusy A.Burunow, TDP-niň Ahal welaýat komitetiniň başlygy R.Işangulyýew we Lebap welaýat komitetiniň başlygy M.Dosmedow, Magtymguly adyndaky Ýaşlar guramasynyň Merkezi geňeşiniň başlygy Ý.Öwezberdiýew boldy.

Demokratik partiýanyň agzalarynyň çykyşlarynda öňde boljak saýlawlaryň düýbünden täze taryhy şertlerde geçiriljekdigi nygtaldy. Berkarar döwletimiziň bagtyýarlyk döwründe Türkmenistanda örän uly özgerişlikler bolup geçdi. Döwletimiziň demokratik esaslaryny pugtalandyrmakda möhüm ädimler ädildi, durmuş-ykdysady ulgamlary ösdürmekde hem-de ruhy galkynyşy üpjün etmekde ägirt uly üstünlikler gazanyldy. Giň gerimli özgertmeler jemgyýetimiziň ýaşaýyş-durmuşynyň hemme taraplaryny, ýurdumyzyň ähli sebitlerini gurşap alyp, halkymyzyň doly goldamagyna we makullamagyna mynasyp boldy.

Biziň hem-de tutuş dünýä jemgyýetçiliginiň gözüniň alnynda Türkmenistanda ägirt uly meýilnamalar durmuşa geçirilýär, batyrgaý pikirleniş iş ýüzünde amala aşyrylyp, anyk häsiýete eýe bolýar, iri möçberli syýasy, ykdysady, durmuş ulgamyna degişli işler ýurdumyzy tanalmaz derejede özgertdi, adamlaryň aňyna we düşünjesine örän güýçli täsir etdi.

Biziň halkymyz döwletimiziň Garaşsyzlyk döwrüniň taryhyndaky täze tapgyra hem-de Türkmenistanyň Prezidentiniň täze saýlawlaryna şunuň ýaly kämil dünýägaraýyşly tejribe bilen gelip, jemgyýetimizde dabaralanýan agzybirlik we jebislik ruhuny ýene-de bir gezek aýdyň görkezýär.

Türkmen halky ruhy, medeni, syýasy däplerini asyrlaryň jümmüşinden alyp gelip, şolara özgerişlik ugruny girizmegi hem-de döredijiligiň we rowaçlygyň özbaşdak giň ýoluna çykmagy başardy. Döwletimiziň adamlaryň abadançylygyna, bagtyýarlygyna gönükdirilen tutuş ykdysady we durmuş syýasatynyň özeni şunuň ýaly umumy binýatdyr.

Hormatly Prezidentimiz Gurbanguly Berdimuhamedow tarapyndan ykdysady, syýasy we durmuş ugurlarynda başy başlanan ähli ägirt uly we giň gerimli özgertmeleriň durmuşa geçirilmegi ýaş nesilleriň hem gerdenine düşýär. Özgertmeleriň üstünligi we halkymyzyň mundan beýläkki abadançylygy köp babatda hut häzirki ýaş oglan-gyzlaryň aň-paýhasyna, ukyp-başarnygyna, döredijilikli zähmetine hem-de ylhamyna baglydyr.

Şunuň bilen baglylykda, Milli Geňeşiň Halk Maslahatynyň mejlisinde milli Liderimiziň Watanymyzyň hem-de halkymyzyň ykbaly üçin jogapkärçiligi öz üstüne alyp biljek ýaş ýolbaşçylary öňe sürmek barada aýdan pikirleriniň möhümdigi bellenildi. Ýaşuly nesil bu başlangyjy doly goldaýar, şol başlangyçda döwürleriň we nesilleriň dowamatynyň aýrylmaz arabaglanyşygyny alamatlandyrýan asylly halypa-şägirtlik ýörelgesi beýanyny tapýar.

Mälim bolşy ýaly, döwlet Baştutanymyz Garaşsyz Türkmen döwletiniň daýanjy we umydy bolan ýaşlar bilen duşuşyklara aýratyn ähmiýet berýär. Şeýle duşuşyklaryň her biri — okuw mekdeplerinde ýa-da zawod-fabriklerde bolup geçýän duşuşyklar döwletimiziň hem-de jemgyýetimiziň öňünde durýan wezipeler we işler baradaky aç-açan söhbetdeşlige, hormatly Prezidentimiz Gurbanguly Berdimuhamedowyň her bir sözi bolsa ýaş türkmenistanlylar üçin hereket etmegiň maksatnamasyna öwrülýär.

Şu manyda giň, täzeçil, özbaşdak pikirlenip bilýän ýaş zehinli adamlaryň öňe sürülmegi ýurdumyzyň hut şeýle dalaşgärlere islegi bilen şertlendirilendir — olar özgertmeleriň dowam etdirilmegi, Watanyň ykbaly üçin jogapkärçiligi öz üstlerine almaga ukyplydyrlar.

Şunuň bilen baglylykda, çykyş edenler Türkmenistanyň Prezidenti wezipesine dalaşgär Serdar Berdimuhamedowyň ajaýyp ýolbaşçylyk we guramaçylyk häsiýetlerini bellediler. Ol agras hem-de islendik meselä seslenip bilýän, oňat hojalykçy we sagdyn durmuş ýörelgeleriniň tarapdary bolan adam hökmünde kärdeşleriniň hormatyna mynasyp boldy.

Serdar Berdimuhamedow 2001-nji ýylda S.A.Nyýazow adyndaky Türkmen oba hojalyk uniwersitetini inžener-tehnolog hünäri boýunça tamamlady. Halkara gatnaşyklar boýunça hem hünärmen bolmak bilen, ol zähmet ýolunda Mejlisiň komitetiniň başlygy, daşary işler ministriniň orunbasary, Ahal welaýatynyň häkiminiň orunbasary, häkimi, senagat we gurluşyk önümçiligi ministri, Ýokary gözegçilik edarasynyň başlygy, Döwlet howpsuzlyk geňeşiniň agzasy, Türkmenistanyň Ministrler Kabinetiniň Başlygynyň orunbasary ýaly wezipeleri eýeläp, dolandyryş işlerini alyp barmakda baý tejribe toplady.

Gurultaýa gatnaşyjylar ýolbaşçy wezipede bitiren hyzmatlaryny, iş tejribesini, belent işjeňlik hem-de ahlak häsiýetlerini belläp, ony ýurdumyzyň iň ýokary döwlet wezipesine dalaşgär hökmünde hödürlemek barada çözgüt kabul etdiler.

Çykyşlar tamamlanandan soň Serdar Berdimuhamedowy ýurdumyzyň Prezidenti wezipesine dalaşgär hökmünde hödürlemegi makullamak baradaky kararyň taslamasy sese goýuldy hem-de biragyzdan kabul edildi.

Ministrler Kabinetiniň Başlygynyň orunbasary Serdar Berdimuhamedow bildirilen ynam üçin ýygnananlara hoşallyk bildirip, onuň örän uly jogapkärçilikdigini hem-de bu ynamy ödemek üçin ähli tagallalary etjekdigini aýtdy.

Hökümet Baştutanynyň orunbasary ýygnananlaryň öňünde çykyş edip, eger, özüniň ýurdumyzyň Prezidenti wezipesine saýlanan ýagdaýynda mundan beýläk hem ata-babalarymyzyň ruhy, mirasyna ýugrulan ýol-ýörelgelerinden ugur alyp, ähli-ukyp başarnygyny gaýgyrman, Watanymyz, halkymyz üçin, milli Liderimiziň taryhy başlangyçlaryny üstünlikli durmuşa geçirmek, tutanýerli we döredijilikli tutumlar bilen beýik maksatlara ýetmek ugrunda zähmet çekjekdigine ynandyrdy.

Meniň ähli aladam, baş maksadym mydama halkymyzyň bagtyýar durmuşy, döwletimizi täze döwürde ösüşlere we galkynyşlara beslenen ýurda öwürmek ugrundaky tagallalar bolar diýip Serdar Berdimuhamedow belledi hem-de Türkmenistanyň Prezidentiniň öňde duran saýlawlarynyň öz gözbaşyny asyrlaryň jümmüşinden alyp gaýdýan milli demokratiýamyzyň ýokary mekdebiniň, halk häkimiýetiniň ösdürilmeginiň ýene-de bir hakyky dabaralanmasy boljakdygyna ynam bildirdi.

2022-nji ýylyň 11-nji fewralynda geçirilen Milli Geňeşiň Halk Maslahatynyň taryhy mejlisinde hormatly Prezidentimiz Gurbanguly Berdimuhamedowyň başlangyjy bilen “Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň milli Maksatnamasy” tassyklanyldy. Onuň amala aşyrylmagy biziň öňümizde mähriban halkymyzyň abadançylygyna gönükdirilen belent maksatlary hem-de wezipeleri goýýar. Şunuň bilen baglylykda, Serdar Berdimuhamedow bellenen maksatlary amala aşyrmak üçin ähli tagallalary etjekdigine ynandyrdy.

— Men öz halkyma, onuň belent we mizemez ruhuna, biziň ählimiziň bilelikde barha jebisleşip, mähriban Arkadagymyzyň ynamyny ödäp, eziz Türkmenistany has-da özgertjekdigimize, öz ajaýyp, bagtyýar geljegimizi gurjakdygymyza pugta ynanýaryn — diýip, döwlet Baştutanynyň wezipesine dalaşgär aýtdy.

Şeýle hem wise-premýer Demokratik partiýanyň ähli agzalarynyň “Döwlet adam üçindir!” diýen binýatlyk ýörelgä esaslanyp, ägirt uly başlangyçlaryň we işleriň amala aşyrylmagynda goldaw berjekdiklerine ynam bildirdi.

Sözüniň ahyrynda Serdar Berdimuhamedow uly ynam bildirilip, Türkmenistanyň Prezidentiniň saýlawlarynda dalaşgärlige hödürlenilendigi üçin hoşallyk bildirmek bilen, öz gezeginde, bu ynamy ödemek üçin zehinini, bilimini gaýgyrman işlejekdigine ynandyrdy.

Dalaşgärleri hödürlemek dowam edýär. Ýakyn wagtda ýokary döwlet wezipesine beýleki dalaşgärleriň atlary hem belli bolar. Bu bolsa Prezident saýlawlarynyň giň bäsdeşlik esasda geçirilýändigine aýdyň şaýatlyk edýär.

Milli kanunçylyga hem-de halkara tejribä laýyklykda, ähli dalaşgärlere deň hukuklar we saýlawçylar bilen duşuşyklar hem-de olary saýlawlaryň öň ýanyndaky maksatnamalar bilen tanyşdyrmak, wagyz etmek, şol sanda köpçülikleýin habar beriş serişdelerinde wagyz işlerini alyp barmak üçin deň mümkinçilikler döredilýär. Şeýle çäreleri ýerli ýerine ýetiriji häkimiýetiň degişli guramalary, kärhanalaryň, edaralaryň hem-de beýleki düzümleriň ýolbaşçylary bilen bilelikde guramak saýlaw toparlarynyň üstüne ýüklenilýär.

Häzirki jemgyýetçilik-syýasy möwsümiň Türkmenistanyň Konstitusiýasyna hem-de halkara hukugyň kadalaryna laýyklykda geçiriljekdigi aýdyň hakykatdyr. Bu halkymyzyň köp asyrlardan bäri gelýän hem-de milli häsiýetiniň özenine öwrülen gadymy halk häkimiýetlilik däplerinden gelip çykýar.

Ýurdumyzda ýaýbaňlandyrylan bu syýasy çärä jemgyýetçilik gyzyklanmasynyň uludygy düşnüklidir. Çünki döwlet Baştutanynyň saýlawy ýurdumyzyň halkynyň hem-de her bir raýatyň geljeginiň saýlawydyr.