Welaýat häkimliginiň guramagynda bugdaý ekişiniň başlanmagy mynasybetli maslahat geçirilip, onda ykdysadyýetimiziň oba hojalyk pudagynda türkmen halkynyň Milli Lideri Gahryman Arkadagymyzyň başlangyçlaryndan gözbaş alýan giň gerimli özgertmeleriň Berkarar döwletiň täze eýýamynyň Galkynyşy döwründe hormatly Prezidentimiz tarapyndan üstünlikli dowam etdirilmegi bilen ýetilýän belent sepgitler dogrusynda giňişleýin gürrüň edildi. 

Maslahatda agrosenagat toplumynda ýetilýän belent sepgitlere, gazanylýan üstünliklere mundan beýläk-de mynasyp goşant goşmakda öňde durýan wezipeler barada hem durlup geçildi. Güýzlük bugdaý ekişini agrotehnikanyň talaplaryna laýyklykda öz wagtynda we ýokary hilli geçirmegiň, bu işlerde kuwwatly oba hojalyk tehnikalarynyň hyzmatyndan netijeli peýdalanmagyň wajypdygy çykyşlarda aýratyn nygtaldy.

Jogapkärli möwsümiň başlanmagy mynasybetli welaýat Taryhy we ülkäni öwreniş muzeýine guralan gezelenç hem täsirliligi bilen tapawutlandy. Oňa gatnaşyjylar halkymyzyň gadymy daýhançylyk tejribelerini açyp görkezýän taryhy gymmatlyklar, şeýle-de täze taryhy eýýamda oba hojalygynda ýetilýän sepgitleriň beýany bolup durýan işler bilen ýakyndan tanyşdylar.

Soňra dabaralar çäräniň geçýän ýerinde, ýagny Gyzylarbat etrabynyň «Arkaç» daýhan birleşiginiň ekin meýdanynda dowam etdi. Alty ganat ak öýleriň, dürli görnüşli oba hojalyk tehnikalarynyň owadan hatarlary, giňden ýaýbaňlandyrylan amaly-haşam, el işleriniň, oba hojalyk önümleriniň sergileri dabaranyň geçýän ýerine aýratyn bezeg berdi. Sergileri uly höwes bilen synlan adamlar medeni mirasymyzy aýawly saklamakda, baýlaşdyrmakda edilýän aladalaryň oňyn netijeleri, oba hojalygynda gazanylýan üstünlikler bilen ýakyndan tanyşdylar.

Gelin-gyzlaryň ümeçilik dessuryndan görkezen parçalary, ak bugdaýyň unundan dürli çörek önümlerini taýýarlaýyşlary dabaranyň täsirli pursatlarynyň üstüni ýetirdi. Sahna ussatlarynyň gadymy daýhançylyk däplerimizi beýan edýän çykyşlary, medeniýet we sungat ussatlarymyzyň täze taryhy eýýamyň beýik ösüşlerini, daýhanlarymyzyň göreldeli zähmetini, bagtyýar durmuşymyzy taryplaýan joşgunly aýdym-sazlary dabaranyň şowhunyna şowhun goşdy. Şunuň ýaly ýatda galyjy pursatlaryň dowamy Arkadagly Serdarymyzyň sargydyna eýerilip, halkymyzyň asylly däbine görä dilleri senaly ýaşulularyň «Bismilla!» diýip başlap bermekleri, ýagşy doga-dilegleri bilen badalga alan güýzlük bugdaý ekişine utgaşdy. Ýokary öndürijilikli ekiş tehnikalary köpçülikleýin ekişe girişdiler. 

Şu ýyl welaýatymyzda 50 müň gektar meýdanda bugdaýyň «Alekseýiç» hem-de «Bezostaýa 100» ýaly görnüşleri ekiler. Ekiljek şonça meýdandan 80 müň tonna galla hasylyny ýygnap almak ýer eýeleriniň arzyly maksadydyr. Ekiş geçirmekde kuwwatly traktorlaryň 125-si, ekiji enjamlaryň bolsa 117-si gallaçy kärendeçileriň hyzmatynda bolar. Tehnikalaryň bökdençsiz işledilmegini gazanmak üçin ýörite tehniki hyzmat ediş toparlarynyň 26-sy hereket eder. Ekişe gatnaşyjylara ediljek medeni we söwda hyzmatlary umumy işe oňyn itergi berer.

Ekin meýdanynda guralan maslahatda jogapkärli möwsümi agrotehnikanyň kadalaryna laýyk geçirmekde, şeýle-de bellenilen möhletinde tamamlamakda öňde durýan wezipelere ýene bir ýola ser salyndy. 

Arkadag Serdarly bagtyýar ýaşlar ýylynyň 1-nji sentýabrynda Bilimler we talyp ýaşlar güni hem-de täze okuw ýylynyň başlanmagy mynasybetli welaýatymyzyň ähli bilim ojaklarynda geçirilen dabaralar özboluşly baýramçylyk ruhuna beslendi. Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminde, Balkanabat şäherindäki daşary ýurt dillerine ýöriteleşdirilen 3-nji hem-de tebigy ugurly derslere ýöriteleşdirilen 21-nji orta mekdeplerde geçirilen baýramçylyk dabaralary has-da giň gerimli bolup, olara welaýat hem-de şäher häkimlikleriniň, jemgyýetçilik guramalarynyň wekilleri, il sylagly ýaşulular, mährem eneler, talyp ýaşlar, mekdep okuwçylary, bilim işgärleri gatnaşdylar. Hormatly Prezidentimiziň Garaşsyz, hemişelik Bitarap Türkmenistanyň mekdep okuwçylaryna, talyp ýaşlaryna, mugallymlaryna we bilim işgärlerine Gutlagynyň okalmagy hemmeleriň baýramçylyk şatlygyny, buýsanjyny artdyrdy.

          Aýdym-sazyň owazy belentden ýaňlanan dabaraly çärelerde çykyş edenleriň buýsanç bilen nygtaýyşlary ýaly, ýurdumyzda bilim we terbiýeçilik edaralarynyň işini kämilleşdirmek bilen bagly özgertmeler Berkarar döwletiň täze eýýamynyň Galkynyşy döwründe üstünlikli amala aşyrylýar, döwlet Baştutanymyzyň taýsyz tagallasy netijesinde röwşen geljegimiz bolan ýaş nesillerimize berilýän bilim-terbiýäniň hilini ýokarlandyrmak, halkara tejribeleri milli ýörelgelerimiz bilen utgaşdyrmak arkaly döwrebap we kämil bilim binýadyny emele getirmek maksady bilen badalga berilýän başlangyçlar has-da rowaçlanýar.

          Täsirli çykyşlardan soňra, bilim ojaklarynda täze okuw ýylynyň ilkinji jaňynyň sesi ýaňlanyp, ähli synplarda «Arkadag Serdarly bagtyýar ýaşlar ýyly» diýen at bilen geçirilen ilkinji okuw sapagy ýokary ruhubelentlige beslendi. Ilkinji gezek ak mekdebiň gapysyndan ätläp, 1-nji synpa baran çagalara Gahryman Arkadagymyzyň we hormatly Prezidentimiziň adyndan kompýuterleriň sowgat berilmegi aýratyn ýatda galyjy pursatlary peşgeş berdi.

        Täze okuw ýylynyň başlanmagy hem-de Bilimler we talyp ýaşlar güni mynasybetli aýdym-sazly dabaralar welaýatymyzyň ähli ýerinde ýokary guramaçylyk derejesinde geçirildi.

             Arkadag Serdarly bagtyýar ýaşlar ýylynyň altyn güýz paslynyň ilkinji güni welaýatymyzyň ähli ýaşaýjylarynyň, esasan hem, mekdep okuwçylarynyň, talyp ýaşlarynyňdyr bilim işgärleriniň durmuşynda ýatdan çykmajak pursatlara beslendi.  

            Bilimler we talyp ýaşlar gününde Etrek etrabynyň Gyzylbaýyr obasynda häzirki zamanyň iň kämil enjamlary bilen üpjün edilen 320 orunlyk täze orta mekdebiň dabaraly ýagdaýda açylyp, ulanylmaga berilmegi baýramçylyk gününiň şanly wakalaryň hataryny artdyrdy.

            Welaýat häkimliginiň düýpli gurluşyk dolandyryş edarasynyň buýurmasy esasynda Türkmenistanyň Senagatçylar we telekeçiler birleşmesiniň agzasy bolan  «Myhmansöýer» hususy kärhanasynyň gurluşykçylarynyň bina eden täze orta mekdebi belentden ýaňlanýan döwrebap aýdym-sazlaryň astynda dabaraly ýagdaýda ulanyşa tabşyryldy. 

          Ýaşlara bilim we terbiýe bermekde döwrebap amatlyklarydyr mümkinçilikleri bolan täze mekdebiň açylyş dabarasynda edilen çykyşlarda hormatly Prezidentimiziň ýurdumyzyň ylym-bilim ulgamyny hil babatda dünýä ülňülerine laýyk getirmek barada edýän çäksiz aladalary dogrusynda buýsançly söhbet edildi. 

            Täze mekdebiň gurluşygynda göreldeli zähmet çeken ussat gurluşykçylara hormatly Prezidentimiziň adyndan gymmat bahaly sowgatlaryň dabaraly ýagdaýda gowşurylmagy uludan tutulan baýramçylyk çäresinde ýatda galyjy pursatlaryň birine öwrüldi.  

           Täsirli, şowhunly geçen dabarada medeni çärelere hem giň orun berlip, onda welaýatymyzyň medeniýet we sungat ussatlary, şeýle-de mekdep okuwçylarydyr körpeler çykyş etdiler.

           Ýaşuly nesliň ak patasy bilen toý bagy kesilenden soň,  dabara  ýygnananlar täze binanyň  içine aýlanyp, bilim ojagynda döredilen ähli döwrebap amatlyklar bilen içgin tanyşdylar. Bilim ojagynda aýry-aýry derslere ýöriteleşdirilen  lingafon we kompýuter synp otaglary bar.  Okuwçylaryň zähmet endiklerini kemsiz ele almagy üçin ähli zerur şertleri bolan ýörite zähmet otaglary göwnüňi göterýär. Täze mekdepdäki açyk we ýapyk sport meýdançalaryny, naharhanany, mejlisler zalyny, kitaphanany, suw, elektrik, ýyladyş, howa çalşyş ulgamlaryny uly buýsanç bilen synlap gören ildeşlerimiz ýaş nesle kämil bilim bermekde ägirt uly işleri durmuşa geçirýän Gahryman Arkadagymyza, Arkadagly Serdarymyza päk ýürekden çykýan alkyşlaryny beýan etdiler.

Akyldar şahyrymyz Magtymguly Pyragynyň doglan gününiň 300 ýyllygy mynasybetli Magtymguly etrap merkezinde dabaraly çäreler geçirildi. Gahryman Arkadagymyzyň çuňňur paýhasyndan dörän «Pähim-paýhas ummany Magtymguly Pyragy» atly ajaýyp goşgusyny hem-de beýik söz ussady Magtymguly Pyragynyň edebi mirasyny giňden wagyz etmek maksady bilen «Arkadagyň senasy — Pyragynyň kelamy» diýen at bilen geçirilen dabaraly çäräni Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Balkan welaýat we Magtymguly etrap häkimlikleri, Türkmenistanyň Magtymguly adyndaky Ýaşlar guramasynyň Magtymguly etrap geňeşi bilelikde guradylar.

         Dabaraly çäre etrap merkezindäki Magtymguly Pyragy muzeýiniň öňündäki ajaýyp meýdançada welaýatyň medeniýet we sungat ussatlarynyň giňden ýaýbaňlandyrylan joşgunly aýdym-sazlary bilen badalga aldy. Soňra dabara gatnaşyjylar muzeýiň girelgesinde guralan sergini uly gyzyklanma bilen synladylar. Sergide Gündogaryň beýik akyldarynyň eserleri, onuň ömrüne we döredijiligine degişli taryhy gymmatlyklar hem-de Gahryman Arkadagymyzyň çuň mazmunly kitaplary mynasyp orun eýeleýär.

         Muzeýiň mejlisler jaýynda geçirilen maslahatda Gahryman Arkadagymyzyň «Pähim-paýhas ummany Magtymguly Pyragy» atly goşgusynyň çuňňur many-mazmuny, onda halkymyzyň beýik söz ussadyna goýýan nusgalyk hormat-sarpasynyň örboýuna galşy, goşgynyň çeperçiligi hem-de wajyp ähmiýeti barada giňden gürrüň edildi. Dana şahyrymyzyň ömri we döredijiligi baradaky täsirli çykyşlara hem maslahatda giň orun berildi.

         Halkymyzyň medeni mirasyny giňden öwrenmekde, baýlaşdyrmakda, ony dünýäniň ylmy jemgyýetçiligine hem-de geljekki nesillere ýetirmekde ägirt uly işleri alyp barýan türkmen halkynyň Milli Lideri Gahryman Arkadagymyzyň hem-de Arkadagly Serdarymyzyň adyna aýdylan hoşallyk sözleri dabaraly çärede öwran-öwran gaýtalandy.

Akyldar şahyrymyz Magtymguly Pyragynyň doglan gününiň 300 ýyllygy mynasybetli Magtymguly etrap merkezinde dabaraly çäreler geçirildi. Gahryman Arkadagymyzyň çuňňur paýhasyndan dörän «Pähim-paýhas ummany Magtymguly Pyragy» atly ajaýyp goşgusyny hem-de beýik söz ussady Magtymguly Pyragynyň edebi mirasyny giňden wagyz etmek maksady bilen «Arkadagyň senasy — Pyragynyň kelamy» diýen at bilen geçirilen dabaraly çäräni Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Balkan welaýat we Magtymguly etrap häkimlikleri, Türkmenistanyň Magtymguly adyndaky Ýaşlar guramasynyň Magtymguly etrap geňeşi bilelikde guradylar.

Dabaraly çäre etrap merkezindäki Magtymguly Pyragy muzeýiniň öňündäki ajaýyp meýdançada welaýatyň medeniýet we sungat ussatlarynyň giňden ýaýbaňlandyrylan joşgunly aýdym-sazlary bilen badalga aldy. Soňra dabara gatnaşyjylar muzeýiň girelgesinde guralan sergini uly gyzyklanma bilen synladylar. Sergide Gündogaryň beýik akyldarynyň eserleri, onuň ömrüne we döredijiligine degişli taryhy gymmatlyklar hem-de Gahryman Arkadagymyzyň çuň mazmunly kitaplary mynasyp orun eýeleýär.

Muzeýiň mejlisler jaýynda geçirilen maslahatda Gahryman Arkadagymyzyň «Pähim-paýhas ummany Magtymguly Pyragy» atly goşgusynyň çuňňur many-mazmuny, onda halkymyzyň beýik söz ussadyna goýýan nusgalyk hormat-sarpasynyň örboýuna galşy, goşgynyň çeperçiligi hem-de wajyp ähmiýeti barada giňden gürrüň edildi. Dana şahyrymyzyň ömri we döredijiligi baradaky täsirli çykyşlara hem maslahatda giň orun berildi. 

Halkymyzyň medeni mirasyny giňden öwrenmekde, baýlaşdyrmakda, ony dünýäniň ylmy jemgyýetçiligine hem-de geljekki nesillere ýetirmekde ägirt uly işleri alyp barýan türkmen halkynyň Milli Lideri Gahryman Arkadagymyzyň hem-de Arkadagly Serdarymyzyň adyna aýdylan hoşallyk sözleri dabaraly çärede öwran-öwran gaýtalandy.