Arkadagly Gahryman Serdarymyzyň ýakynda Azer­baý­jan Res­pub­li­ka­sy­na amala aşy­ran döw­let sa­pa­rynyň dowamynda dostlukly döwlet tarapyndan ýurdumyza sowgat berlen «Dostluk» nebit tankeriniň Türkmenbaşy Halkara deňiz portunda garşylanyş dabarasy boldy. Oňa Türkmenistanyň Deňiz we derýa ulaglary döwlet gullugynyň, welaýat, Türkmenbaşy şäher häkimlikleriniň jogapkär işgärleri, Mejlisiň deputatlary,  jemgyýetçilik guramalarynyň wekilleri, il sylagly ýaşulular, mährem eneler, medeniýet we sungat işgärleri hem-de talyp ýaşlar gatnaşdylar.                                           

Türkmenbaşy Halkara deňiz portunda geçirilen dabarada türkmen-azerbaýjan dostlugynyň nyşany bolan «Dostluk» nebit tankeri türkmen halkynyň milli däplerine laýyklykda ak un sepilip, üzärlik tütedilip garşy alyndy. 

Mälim bolşy ýaly, hor­mat­ly Prezidentimiziň 22-23-nji iýun­da Azer­baý­jan Res­pub­li­ka­sy­na amala aşy­ran döw­let sa­pa­rynyň netijesinde, iki goňşy halkyň bähbitlerine gönükdirilen resminamalaryň birnäçesine gol çekilmegi iki ýurduň arasyndaky goňşuçylyk we özara peýdaly gatnaşyklary ösdürmäge täze möhüm şertleri üpjün etdi. Dabarada çykyş edenler bular barada buýsanç bilen gürrüň berdiler.

Welaýatyň medeniýet we sungat ussatlarynyň, folklor toparlarynyň ýerine ýetirmeginde ýaňlanan  aýdym-sazlar dabara gatnaşanlaryň ruhuny has-da belende göterdi. Ussatlyk bilen ýerine ýetirilen aýdym-sazlarda türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň amala aşyrýan il-ýurt bähbitli işleri, türkmen-azerbaýjan dost-doganlygy  wasp edildi.

Soňra dabara gatnaşyjylar «Dostluk» nebit tankeriniň iş mümkinçilikleri bilen tanyş boldular. Nebit tankeriniň umumy uzynlygy 141 metr bolup, onuň ini 16,9 metr, ýük göterijiligi bolsa 8 müň tonna barabardyr. Dabarada ýurdumyzy ösüşleriň täze belentliklerine tarap ynamly alyp barýan hormatly Prezidentimize hem-de Gahryman Arkadagymyza tüýs ýürekden hoşallyk sözleri aýdyldy.

Balkanabat şäherindäki Saparmyrat Türkmenbaşy adyndaky Nebitçileriň medeniýet köşgünde Medeniýet hepdeliginiň çäklerinde Magtymguly Pyragynyň döredijiligine bagyşlanan «Pähim-paýhas ummany Magtymguly Pyragy» atly aýdym-sazly dabara geçirildi.

Dana şahyryň watansöýüjilige, gahrymançylyga, pähim-paýhasa, edep-terbiýä ýugrulan manyly goşgulary medeniýet, sungat, döredijilik işgärleriniň ylham joşgunyny artdyryp, berkarar Watanymyzyň belent ösüşlerini, ajaýyp zamanamyzy wasp etmäge ruhlandyrýar. Ýurdumyzyň tanymal bagşy-sazandalarynyň, döredijilik toparlarynyň, sahna ussatlarynyň edebi-sazly kompozisiýasy, hoş owazly, şirin mukamly aýdym-sazlary, milli äheňli joşgunly tanslary dabaranyň şatlyk-şowhunyny artdyrdy. Ruhubelentlikde ýerine ýetirilen  çykyşlar bu ýere ýygnananlarda ýatdan çykmajak täsirleri galdyrdy hem-de akyldar şahyrymyz Magtymguly Pyragynyň şygyrlaryna siňen arzuwlarynyň hasyl bolan ajaýyp zamanamyzda milli medeniýetimiziň we sungatymyzyň gülläp ösýändiginiň hem-de belent sepgitlere ýetýändiginiň, akyldar şahyra hormat-sarpanyň egsilmezdiginiň ýene-de bir özboluşly subutnamasy boldy.

Medeniýet we sungat işgärleriniň hem-de Magtymguly Pyragynyň şygryýet güni mynasybetli her ýyl geçirilmegi asylly däbe öwrülen Medeniýet hepdeliginiň dabaraly çäreleri welaýatymyzda giň gerime eýe bolýar. Akyldar şahyrymyzyň şygyrlarynda buýsanç bilen waspyny ýetiren Dehistan ýaýlasy hem gadymyýetde kerwen ýollarynyň geçen mekanydyr. Medeniýet hepdeliginiň çäklerinde bu ýerde, ýagny «Gadymy Dehistan» döwlet taryhy-medeni goraghanasynda «Taryhy-medeni ýadygärlikleriň öwrenilmeginiň we rejelenmeginiň häzirki zaman usullary» atly meýdan şertlerindäki ylmy-usulyýet maslahatynyň geçirilmegi ýurdumyzda taryhy we medeni ýadygärlikleri goramaga, öwrenmäge hem-de rejelemäge uly ünsüň berilýändigini aýdyň görkezdi. Öwredijilikli häsiýete eýe bolan meýdan şertlerindäki maslahatda ýurdumyzyň belli alym arheologlary, hünärmenleri, taryhçylary welaýatymyzyň çäklerinde saklanyp galan arheologik, binagärlik ýadygärliklerinde ýerine ýetirilen işler, öňde durýan wezipeler barada pikir alyşdylar. Döredijilik forumyna gatnaşanlar ata Watanymyzyň geçmişini taryhy-medeni ýadygärlikleriň üsti bilen öwrenmekde ähli şertleri döredip berýän Gahryman Arkadagymyza we Arkadagly Gahryman Serdarymyza egsilmez alkyş aýtdylar.

«Awaza» milli syýahatçylyk zolagynda Medeniýet hepdeligine gatnaşýan döredijilik işgärleriniň Hazar deňzinde gämili gezelenji guraldy. Ilki bilen, döredijilik işgärleri Türkmenbaşy Halkara deňiz portuna gezelenç etdiler. Ýurdumyzyň medeniýet we sungat ussatlarynyň ýerine ýetiren aýdym-sazlary, döredijilik toparlarynyň tanslary bu ýere ýygnanlara ruhy lezzet paýlady. Döredijilik işgärleriniň gatnaşmaklarynda guralan täsirli söhbetlere, aýdym-sazlara beslenen gämili gezelenje gatnaşanlar «Awaza» milli syýahatçylyk zolagynyň gözel görnüşini, tebigatyň aýratynlyklaryny, gojaman deňziň giňişliklerini höwes bilen synladylar, ajaýyp görnüşlerden lezzet aldylar. Akyldar şahyrymyz Magtymguly Pyragynyň mertlik, watançylyk, kalby päklik, tebigata söýgi, rehimdarlyk, ula-kiçä hormat goýmak, hoşniýetlilik, ynsanperwerlik ýaly pikirler öňe sürülýän şygyrlarynyň okalmagy gezelenjiň many-mazmunyny hasam artdyrdy. Joşgunly gazallarda, küştdepdilerde ýurdumyzyň ösüşleri, Gahryman Arkadagymyzyň, Arkadagly Gahryman Serdarymyzyň alyp barýan beýik işleriniň waspy belentden-belent ýaňlandy.

Balkan hem-de Daşoguz welaýatlarynyň medeniýet we sungat ussatlarynyň Balkanabat şäherindäki Nebitçileriň medeniýet köşgünde geçirilen konserti Medeniýet hepdeliginiň dabaraly çäreleriniň üstüni ýetirdi. Welaýatymyzyň  we daşoguzly sungat ussatlarynyň ýerine ýetiren aýdym-sazly çykyşlary belentden ýaňlanyp, tomaşaçylara ruhy lezzet paýlady. Baý mazmunly konsert maksatnamasy welaýatlaryň medeniýetiniň, aýdym-saz sungatynyň ýeten derejesini görkezdi.  Medeniýet  we sungat ussatlarynyň ýerine ýetiren şirin aýdym-sazlarynda Berkarar döwletiň täze eýýamynyň Galkynyşy döwründe alnyp barylýan beýik işleriň, baky bagtyýarlygymyzyň we berkararlygymyzyň, parahatçylygyň, dost-doganlygyň waspy ýetirildi. Folklor we tans toparlarynyň çykyşlary hem tomaşaçylar tarapyndan el çarpyşmalar bilen garşylandy. Ýokary joşgun bilen ýerine ýetirilen aýdym-sazlar türkmen halkynyň Milli Lideri Gahryman Arkadagymyza, Arkadagly Gahryman Serdarymyza alkyşlaryň beýanyna öwrüldi.