Hasyl toýy mynasybetli welaýat häkimliginiň, welaýatyň medeniýet müdirliginiň, Türkmenistanyň Agrar partiýasynyň welaýat komitetiniň we beýleki jemgyýetçilik guramalarynyň Balkanabat şäherindäki «Türkmeniň ak öýi» binasynyň  ajaýyp meýdançasynda guran baýramçylyk dabarasy çuň many-mazmuna eýe boldy. Giňden guralan toý çäreleri welaýatymyzyň ussat babadaýhanlarynyň, ýaşuly nesliň wekilleriniň,  talyp ýaşlaryň, medeniýet, saglygy goraýyş, bilim we sport ulgamlarynyň işgärleriniň  gatnaşmagynda dabaraly baýramçylyk ýörişi bilen başlandy. 

Hormatly Prezidentimiziň Hasyl toýy mynasybetli Garaşsyz, hemişelik Bitarap Türkmenistanyň edermen oba zähmetkeşlerine, hasyl ussatlaryna we ähli halkyna iberen Gutlagyndan ruhlanan hasyl ussatlary bu ýerde çykyş edip, Arkadagly Gahryman Serdarymyzyň baştutanlygynda ýurdumyzyň oba hojalyk toplumynyň düýpli galkynyşa eýe bolýandygyny aýratyn buýsanç bilen nygtadylar. Belentden tutulan baýramçylyk çäresiniň dowamynda welaýatyň oba hojalyk pudagynyň öňdebaryjylarynyň uly toparyna hormatly Prezidentimiziň adyndan gymmatbahaly baýramçylyk sowgatlary dabaraly ýagdaýda gowşuryldy. 

Hasyl toýunyň geçýän ýerinde guralan oba hojalyk önümleriniň sergisi welaýatymyzyň bereketli topragynyň sahawatyny açyp görkezdi. Sergilerde ekerançylyga degişli milli däp-dessurlar, azyk önümleriniň taýýarlanylyşy  ussatlyk bilen  görkezildi. Oba hojalyk toplumynyň gaýtadan işleýän senagatynyň, çörek we çörek önümleriniň sergisine, şeýle-de amaly-haşam sungatynyň, nusgalyk el işleriniň  sergisine-de uly orun berildi. Milli senetçilik, halyçylyk, zergärçilik hem-de sungatyň beýleki görnüşleri boýunça ýerleşdirilen işler bu ýere ýygnananlaryň üns merkezinde boldy.

Dabaranyň geçýän ýerinde «Bereketli türkmen saçagy» atly kitap esasynda türkmen milli tagamlaryny, datly işdäaçarlary taýýarlamak boýunça geçirilen bäsleşige gatnaşan ussat aşpezler türkmen halkynyň milli tagamlaryny ýokary derejede taýýarlamagyň inçe tilsimlerini açyp görkezmegi başardylar. Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik kitabyna salgylanyp taýýarlanylan melhemlik içgiler dabara gatnaşyjylara hödür edildi.                                               

Baýramçylyk dabarasy welaýatyň sungat ussatlarynyň edebi-sazly çykyşlary bilen utgaşdy. Onda türkmen daýhanynyň waspy belentden ýaňlandy. Dabarada welaýat medeniýet müdirliginiň tanymal bagşy-sazandalary, welaýat ýörite sungat mekdebiniň talyp ýaşlary çykyş edip, hasyl ussatlaryna we ähli toý mähellesine ruhy lezzet paýladylar. 

Baýramçylyk dabarasynda welaýatyň çagalar aýdym-saz toparlarynyň çykyşlaryna hem giň orun berildi. Bagtyýar körpeleriň ýerine ýetiren buýsançly çykyşlarynda Gahryman Arkadagymyzyň hem-de Arkadagly Gahryman Serdarymyzyň çagalaryň bagtyýar durmuşy ugrunda amala aşyrýan beýik işleri aýdyň beýanyny tapdy.

Hasyl toýy mynasybetli welaýat häkimliginde geçirilen aýdym-sazly dabara-da ýokary ruhubelentlige beslendi. Dabarada çykyş edenler oba hojalygyny ösdürmek, daýhanlaryň ýokary önümçilik netijelerini gazanmak babatda edýän hemaýat-goldawlary üçin Gahryman Arkadagymyza hem-de Arkadagly Gahryman Serdarymyza tüýs ýürekden hoşallyklaryny beýan etdiler. Bereketli topragymyzy, zähmetsöýer babadaýhanlarymyzy wasp edýän döwrebap aýdym-sazlaryň hoş  owazy  çärä gatnaşanlara ruhy lezzet paýlady.

3-nji noýabrda — Gurluşyk we senagat toplumynyň işgärleriniň hünär baýramynyň giňden bellenilýän gününde Etrek etrabynda täze elektrik bekediniň açylyş dabarasy boldy. Dabara Mejlisiň deputatlary, welaýat we etrap häkimlikleriniň, elektroenergetika pudagynyň, jemgyýetçilik guramalarynyň ýolbaşçylary hem-de wekilleri, hormatly ýaşulular gatnaşdylar. Welaýatyň medeniýet we sungat ussatlarynyň aýdym-sazly çykyşlary dabara baýramçylyk öwüşginini çaýdy.

Hormatly Prezidentimiziň baştutanlygynda ýurdumyzyň elektroenergetika pudagynyň maddy-enjamlaýyn binýadyny mundan beýläk-de pugtalandyrmak we ygtybarly energetika ulgamyny döretmek boýunça maksatnamalaýyn işler durmuşa geçirilýär. Dünýäniň belli önüm öndürijileriniň öňdebaryjy enjamlary bilen üpjün edilen, güýjenmesi 220 kilowat «Etrek» elektrik bekediniň gurlup ulanmaga berilmegi hem munuň nobatdaky güwäsidir. Bu elektrik bekediniň gurluşygynda ekologik talaplaryň berjaý edilmegine möhüm ähmiýet berildi. Energetika toplumynda sebit we halkara ähmiýetli iri taslamalary durmuşa geçirmek bilen, Türkmenistan ekologiýa, daşky gurşawy goramak meselelerine jogapkärçilikli, ylmy esasda çemeleşýändigini görkezýär. Hut şonuň üçin-de hormatly Prezidentimiziň durmuş-ykdysady özgertmeler maksatnamalarynda degişli ugurdaky talaplara doly laýyk gelýän serişde tygşytlaýjy, ekologik taýdan arassa tehnologiýalary we ýokary netijeli enjamlary işjeň ornaşdyrmak baş wezipeleriň biri hökmünde kesgitlenendir.

Dabaradaky çykyşlarda bellenilişi ýaly, elektroenergetika syýasatyny üstünlikli durmuşa geçirmek maksady bilen, Energetika ministrligi tarapyndan wajyp taslamalar amala aşyrylýar. Soňky ýyllarda pudakda ýaýbaňlandyrylan özgertmeleriň netijesinde ýurdumyzyň sarp edijileriniň elektrik energiýasyna bolan isleglerini doly kanagatlandyrmaga şert döredýän ygtybarly energetika kuwwatlyklary döredildi. Bu bolsa türkmen elektrik energiýasynyň daşary ýurtlara eksport edilýän möçberini artdyrmaga hem mümkinçilik berýär.

Açylyş dabarasynyň dowamynda täze desganyň gurluşygynda tapawutlanan gurluşykçylara hormatly Prezidentimiziň adyndan sowgatlar gowşuryldy.

Dabara gatnaşyjylar elektroenergetika pudagyny ösdürmäge berýän yzygiderli ünsi üçin Arkadagly Gahryman Serdarymyza hem-de Gahryman Arkadagymyza tüýs ýürekden hoşallyk bildirdiler.

Türkmen alabaýynyň baýramy mynasybetli Halkara «Türkmen alabaý itleri» assosiasiýasynyň welaýat merkezinde geçirilen aýdym-sazly dabarada Gahryman Arkadagymyzyň hem-de Arkadagly Gahryman Serdarymyzyň ýurdumyzda dünýä meşhur bolan alabaýlarymyzyň şan-şöhratyny has-da artdyrmak ugrunda edýän taýsyz tagallalary, ynsanyň iň wepaly dosty bolan alabaýlarymyzyň tohum arassalygyny gorap saklamak, hüşgärligi, çydamlylygy, duýgurlygy bilen tapawutlanýan milli gymmatlygymyzy ilat arasynda wagyz etmek baradaky söhbetler mynasyp beýanyny tapdy. Gahryman Arkadagymyzyň dünýäde giň meşhurlyga eýe bolan «Türkmen alabaýy» atly eseriniň  taýsyz gymmatlykdygy aýratyn nygtaldy.

Dabara gatnaşanlar Türkmen alabaýynyň baýramy mynasybetli  giňden guralan sergä syn etdiler. Welaýat ýörite sungat mekdebiniň talyplarynyň, Balkanabat çagalar çeperçilik mekdebiniň okuwçylarynyň türkmen alabaýlaryna bagyşlap çeken suratlary, taýýarlan şekilleri ýygnananlarda aýratyn täsirleri galdyrdy. Merkeziň hünärmenleriniň alabaýlaryň başarjaň hereketlerini görkezen pursatlary olarda uly gyzyklanma döretdi. Welaýat döwlet drama teatrynyň artistleriniň teatrlaşdyrylan sahna oýunlary, sungat ussatlarynyň ýerine ýetiren döwrebap aýdym-sazlary baýramçylyk çäresine gatnaşanlara ruhy lezzet paýlady.

Welaýat häkimliginiň, welaýat zenanlar bölüminiň, Türkmenistanyň Agrar partiýasynyň welaýat komitetiniň «Türkmeniň ak öýi» binasynda geçiren baýramçylyk  maslahaty «Ynsanyň wepaly dosty» diýlip atlandyryldy. Önümçiligiň öňdebaryjylarynyň, talyp ýaşlaryň we itşynaslaryň gatnaşmaklarynda geçen dabarada çykyş edenler hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe halkymyzyň ýaşaýyş-durmuş şertlerini has-da gowulandyrmakda amala aşyrylýan işler, türkmen alabaýynyň şöhratly taryhy we şu güni barada  buýsançly söhbet etdiler. Berkarar Watanymyzy rowana ak ýollardan okgunly öňe alyp barýan, il-ulsumyzyň bagtyýarlygy üçin ähli taraplaýyn alada edýän Gahryman Arkadagymyza hem-de  Arkadagly Gahryman Serdarymyza  alkyş aýtdylar.

Welaýat häkimliginiň mejlisler jaýynda welaýat häkimliginiň hem-de welaýat medeniýet müdirliginiň bilelikde guramaklarynda «Magtymguly Pyragynyň mirasy — parahatçylygyň, dostlugyň, hoşniýetli hyzmatdaşlygyň binýady» atly dabaraly maslahat geçirildi. Jemgyýetçilik guramalarynyň, edara-kärhanalaryň wekilleriniň, il sylagly ýaşulularyň, kümüş saçly eneleriň hem-de talyp ýaşlaryň gatnaşmaklarynda geçirilen maslahat ýokary ruhubelentlige beslendi.

Maslahatda çykyş edenler hormatly Prezidentimiziň başlyklyk etmeginde, daşary ýurtlaryň döwlet we hökümet ýolbaşçylarynyň gatnaşmaklarynda paýtagtymyz Aşgabatda geçirilen «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň hem-de Arkadagly Gahryman Serdarymyzyň onda eden çuň many-mazmunly çykyşynyň taryhy ähmiýete eýe bolandygyny buýsanç bilen nygtadylar. Akyldar şahyrymyz Magtymguly Pyragynyň döredijiliginiň bütin Ýer ýüzünde uly meşhurlyga eýedigi, onuň goşgularynyň dünýä dillerine terjime edilip, söýlüp okalýandygy, akyldaryň parahatçylygy, aýdyň geljegi, bagtyýar durmuşy arzuwlan şahyrdygy we şol arzuwlarynyň ajaýyp zamanamyzda hasyl bolandygy barada gürrüň etdiler. Berkarar döwletiň täze eýýamynyň Galkynyşy döwründe şahyra goýulýan sarpanyň has ýokary derejelere göterilýändigine paýtagtymyzda geçirilen halkara forum aýdyň şaýatlyk edýändigini belläp, beýik söz ussadynyň at-abraýyny arşa göteren Gahryman Arkadagymyza hem-de Arkadagly Gahryman Serdarymyza  tüýs ýürekden alkyş aýtdylar.

Dabaraly maslahatda welaýatymyzyň sungat ussatlarynyň joşgunly çykyşlary ýaýbaňlandyrylyp, olarda Watanymyzyň, ajaýyp döwrümiziň, hormatly Prezidentimiziň durmuşa geçirýän beýik işleriniň, Magtymguly  Pyragynyň waspy belentden ýetirildi.

Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň, ÝUNESKO-nyň işleri barada Türkmenistanyň Milli toparynyň sekretariatynyň hem-de Türkmenistanyň Telewideniýe, radiogepleşikler we kinematografiýa baradaky döwlet komitetiniň bilelikde yglan eden «Türkmen keşdeçilik sungaty — milli mirasymyz» atly bäsleşiginiň welaýat tapgyry Balkanabat şäherindäki Türkmeniň «Ak öýi» binasynda geçirildi.

Halkymyzyň medeni mirasynyň görnükli nusgalarynyň biri bolan türkmen keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilmegine bagyşlanyp geçirilen bäsleşik ene-mamalarymyzdan gelýän keşdeçilik sungatyny mynasyp dowam etdirmegi, ýaşlarda bu sungata bolan söýgini artdyrmagy maksat edindi.

Bäsleşige gatnaşan zenanlar onuň şertlerine laýyklykda, türkmen keşdeçilik sungatyny ösdürmäge goşýan goşantlary barada buýsanç bilen gürrüň berdiler. Olar ýaka, tahýa, kürte keşdelemekde taýýarlyk işlerini birme-bir ýerine ýetirip, özleriniň saýlap alan keşdelerini çeper sözlerde wasp etdiler. Olaryň keşdelejek işlerini dyzlarynyň üstlerinde dogry goýuşlary, iňňe tutuşlary, sanjyşlary, işilen ýüpekleri ýerligine görä ulanyşlary emin agzalary tarapyndan aýratyn gözegçilikde saklanyldy.

Zenanlaryň dürli nagyşlar bilen sünnälän milli lybaslarynyň waspyny goşgularyň, rowaýatlaryň, gazallaryň üsti bilen ýerine ýetirmekleri has-da täsirli boldy.

Milli mirasymyzy aýawly saklamaga, gadymy nusgalara täze öwüşgin çaýmaga, olary ýaş nesillerimize ýetirmäge ähli mümkinçilikleri döredýän Gahryman Arkadagymyza, hormatly Prezidentimize alkyş sözleri çäräniň dowamynda öwran-öwran dile getirildi.

Uly ruhubelentlige beslenen bäsleşigiň jemi jemlenilende, Gyzylarbat etrabyndaky 22-nji orta mekdebiň mugallymy Oguljeren Amangeldiýewa we şol etrabyň 28-nji orta mekdebiniň mugallymy Laçyn Saryýewa ýeňijiler diýlip yglan edildiler we olar bäsleşigiň döwlet tapgyryna gatnaşmaga hukuk gazandylar.  

Bäsleşige gatnaşanlara Türkmenistanyň Kärdeşler arkalaşyklarynyň welaýat birleşmesi tarapyndan sowgatlar dabaraly ýagdaýda gowşuryldy.