Türkmenistanyň Magtymguly adyndaky Ýaşlar guramasynyň Merkezi geňeşi hem-de ýurdumyzyň gazet-žurnallarynyň redaksiýalary tarapyndan yglan edilen «Berkarar döwletiň ylham joşguny», «Ýaşlar — beýik geljegi gurujylar», «Garaşsyzlyk bilen galkynan gözel Diýar», «Watanymyzyň Garaşsyzlygy — ylham çeşmesi»,  «Köken», «Türkmen bedewi — at-myratly Watanyň göz-guwanjy» atly bäsleşikleriň ýeňijilerini sylaglamak dabarasy Magtymguly etrabynda geçirildi. Oňa ýurdumyzyň dürli künjeklerinden halypa ýazyjy-şahyrlar,  döredijilik bilen meşgullanýan ýaşlar, TMÝG-niň işjeň agzalary gatnaşdylar.

Dabara gatnaşanlar ir säher bilen welaýat häkimliginiň hem-de welaýat medeniýet müdirliginiň guramagynda Magtymguly Pyragy muzeýiniň öňündäki meýdançada ýaýbaňlandyrylan aýdym-sazly çykyşlara tomaşa etdiler. Soňra bu ýere ýygnananlar Magtymguly Pyragynyň heýkeline gül çemenleri goýup, akyldar şahyra tagzym etdiler. Muzeýdäki taryhy we medeni gymmatlyklar, şeýle-de amaly-haşam sungatynyň, el işleriniň sergileri bilen tanyşdylar.

Muzeýiň mejlisler jaýynda geçirilen döredijilik bäsleşikleriniň ýeňijilerini sylaglamak dabarasy şatlyk-şowhuna beslendi. Bu ýerde edilen çykyşlarda ýaş nesilleriň ukyp-başarnyklaryny açyp görkezmekleri üçin ähli mümkinçilikleri döredip berýän Gahryman Arkadagymyza hem-de Arkadagly Gahryman Serdarymyza alkyş sözleri aýdyldy.

Döredijilik bäsleşikleriniň ýeňijilerini sylaglamak dabarasyna gatnaşanlar günüň ikinji ýarymynda Gerkez obasyna baryp gördüler. Bu ýerde welaýatymyzyň sungat ussatlarynyň ýerine ýetiren aýdym-sazlary çykyşlary ýygnananlara ruhy lezzet paýlady. Magtymguly Pyragy muzeýiniň Gerkez obasyndaky şahamça muzeýine guralan gezelenç çärelere gatnaşyjylarda aýratyn ýakymly täsirleri galdyrdy.