Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynda Hazar deňziniň güni mynasybetli «Awaza» milli syýahatçylyk zolagynda geçirilen «Hazar deňzi — parahatçylyk we dostluk deňzi» atly ylmy-amaly maslahat dünýäde parahatçylyk söýüjilikli ýurt hem-de ylalaşdyryjy merkez hökmünde giňden tanalýan hemişelik Bitarap döwletimiziň Hazar deňzi bilen baglanyşykly meseleleri netijeli çözmek başlangyçlaryny hoşniýetli goňşuçylyk gatnaşyklary, milli we umumy bähbitleri nazara almak bilen, sebitde deňhukukly, özara bähbitli hyzmatdaşlyk etmek, köpasyrlyk taryhy-medeni gatnaşyklara eýe bolan Hazarýaka döwletleriň halklarynyň arasynda dost-doganlygy pugtalandyrmak bilen bagly aýdyň maksatlara gönükdirýändigini nobatdaky gezek aýan etdi. Ylmy-amaly maslahatda Nýu-Ýork şäherinde şu ýylyň 12-nji sentýabrynda öz işine başlajak BMG-niň Baş Assambleýasynyň nobatdaky 78-nji sessiýasynda ýurdumyzyň öňe sürjek ileri tutýan garaýyşlarynyň ähmiýeti aýratyn nygtaldy. Şolaryň hatarynda Hazar deňziniň daşky gurşawyny, onuň bioserişdelerini gorap saklamak, şeýle hem birnäçe ekologiýa meselelerini çözmek bilen baglanyşykly wezipeleriň giň toplumy boýunça hyzmatdaşlyk etmäge halkara meýdança boljak «Hazar ekologiýa başlangyjyny» döretmek baradaky teklibiň bolmagy buýsanç bilen bellenilmäge mynasypdyr. Maslahatda nygtalyşy ýaly, çäk taýdan amatly ýerleşmegi, uglewodorod we beýleki tebigy serişdeleriň baý gorlary, oňaýly howa şertleri Hazar deňzi sebitiniň häzirki günde ösen senagat, ulag we şypahana merkezine öwrülmegine mümkinçilik berdi. Şunuň bilen baglylykda, köp möhüm ugurlarda, şol sanda Hazar deňziniň bioserişdelerini gorap saklamak, artdyrmak we peýdalanmak, söwda gämi gatnawlary, syýahatçylygy ösdürmek we beýleki ugurlar babatda hyzmatdaşlygyň ýola goýulmagy aýratyn ähmiýete eýedir.

Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde dutarçy bagşy-sazandalaryň arasynda yglan edilen «Çalsana, bagşy!» atly bäsleşigiň welaýatymyz boýunça jemleýji tapgyry milli aýdym-saz sungatyna höwesli ýaşlaryň barha köpelýändigini aýdyň görkezdi. Balkanabat şäherindäki «Türkmeniň ak öýi» binasynda geçirilen bäsleşige welaýatymyzyň etrap-şäherlerinden gelen bagşy-sazandalar gatnaşdylar.

Türkmen halkynyň ÝUNESKO-nyň Adamzadyň maddy däl medeni mirasynyň sanawyna girizilen baý geçmiş mirasyny, dutar ýasamak senetçiligini, dutarda ýerine ýetirijilik we bagşyçylyk sungatyny giňden wagyz etmek, halypa-şägirtlik däplerini pugtalandyrmak, şeýle-de täze zehinleri ýüze çykarmak maksady bilen geçirilen bäsleşikde Gyzylarbat etrabynyň ýaşaýjysy,  Maýa Kulyýewa adyndaky Türkmen milli konserwatoriýasynyň talyby Merdan Baýramgeldiýew, welaýat çagalar sungat mekdebiniň mugallymy Nurberdi Gulow türkmen halk aýdymlaryny ussatlyk bilen ýerine ýetirip, dutarda aýdym aýtmakda, welaýat ýörite sungat mekdebiniň mugallymy Daýançmyrat Hangeldiýew, Türkmenbaşy şäheriniň çagalar sungat mekdebiniň mugallymy Rejepgeldi Aşyrow dutarda saz çalmakda has tapawutlanyp, ýeňiji bolmagy başardylar. Bäsleşigiň ýeňijilerine Hormat hatlarydyr ýadygärlik sowgatlar gowşuryldy. Olar bäsleşigiň mukaddes ýurt Garaşsyzlygynyň şanly 32 ýyllyk baýramçylygynyň bosagasynda ýurdumyz boýunça geçiriljek jemleýji tapgyryna gatnaşmaga hukuk gazandylar.

Welaýat Baş bilim müdirliginiň guramagynda Balkanabat şäherindäki 3-nji orta mekdepde Magtymguly Pyragynyň doglan gününiň 300 ýyllygy mynasybetli Türkmenistanyň Bilim ministrliginiň we Magtymguly adyndaky Türkmen döwlet uniwersitetiniň ýurdumyzyň umumybilim berýän orta mekdepleriniň 10 — 11-nji synp okuwçylarynyň arasynda yglan eden «Magtymguly, sözlär tili türkmeniň» atly döredijilik bäsleşiginiň welaýat tapgyry geçirildi.

Bäsleşikde çykyş eden okuwçylar akyldar şahyrymyzyň watansöýüjilik, adalatlylyk, ynsan mertebesini belent saklamak, il-güne, ene-ata, ula-kiçä hormat-sarpaly bolmak hakyndaky şygyrlarynyň Berkarar döwletiň täze eýýamynyň Galkynyşy döwründe örän uly ähmiýete eýedigini öz düzen goşgularynyň üsti bilen beýan etdiler. Şeýle-de olar beýik Pyragynyň watançylyk, terbiýeçilik ähmiýetli goşgularyndan birini  ýatdan aýtdylar.

Netijede, Magtymguly etrabyndaky 3-nji orta mekdebiň okuwçysy Dünýä Meretgeldiýewa bäsleşigiň baş baýragyna, Balkanabat şäherindäki 23-nji orta mekdebiň okuwçysy Gülbibi Şyhberdiýewa birinji, welaýat merkezindäki 2-nji orta mekdebiň okuwçysy Yhlas Gurbanow ikinji orunlara mynasyp boldular we  bäsleşigiň döwlet tapgyryna gatnaşmaga hukuk gazandylar.

Balkan welaýat ýörite sungat mekdebinde ýurdumyzda hereket edýän sazçylyk we sungat orta hünär okuw mekdepleriniň mugallymlarynyň arasynda «Aýdym aýtmak sungatyny kämilleşdirmegiň usullary» atly okuw-usuly maslahat geçirildi. Oňa ýurdumyzyň bäş welaýatyndan wekiller — sazçylyk we sungat orta hünär okuw mekdepleriniň ýolbaşçylarydyr mugallymlary gatnaşdylar.

Okuw-usuly maslahatda birnäçe mowzukdan çykyşlar diňlenildi. Soňra myhmanlar welaýat Taryhy we ülkäni öwreniş muzeýine gezelenç etdiler. Ol ýerde dürli taryhy tapyndylar bilen ýakyndan tanyşdylar.

Maslahata gatnaşanlar Balkan welaýat ýörite sungat mekdebiniň talyplarynyň Weli Muhadowyň we Adrian Şapoşnikowyň «Kemine we kazy» operasyndan taýýarlan bir parçasyna tomaşa etdiler. Mugallymlaryň bilelikdäki konserti ýurt derejesinde geçen çäräniň özboluşly jemlenmesine öwrüldi.

Welaýat Saglygy goraýyş müdirliginiň, welaýat kitaphanasynyň, Saglygy goraýyş işgärleriniň kärdeşler arkalaşygynyň Balkanabat şäher geňeşiniň bilelikde guramaklarynda çäre geçirildi.

Saglygy goraýyş we medeniýet ulgamlarynyň wekilleriniň gatnaşmaklarynda geçirilen çärede edilen çykyşlarda ynsan saglygynyň ähli zatdan belentde tutulýan döwründe ýurdumyzda sagdyn durmuş ýörelgesiniň has-da rowaçlanmagy ugrunda durmuşa geçirilýän işleriň nusgalykdygy barada aýtdylar. Berkarar döwletiň täze eýýamynyň Galkynyşy döwründe ýurdumyzyň sagdynlygyň, ruhubelentligiň, sportuň mekany hökmünde dünýäde gazanan abraýynyň, mertebesiniň has-da belende göterilmegi babatda taýsyz tagallalaryň edilýändigi çykyşlarda buýsanç bilen bellenildi. Ýurdumyzda ynsan saglygyny goramakda we berkitmekde, sporty ösdürmekde, sagdyn ýaşlary ýetişdirmekde beýik işleri alyp barýan hormatly Prezidentimize tüýs ýürekden alkyş aýdyldy.