Türkmenistanyň Zenanlar birleşiginiň welaýat bölüminiň guramagynda Halkara zenanlar güni mynasybetli Balkanabat şäherindäki «Türkmeniň ak öýi» binasynda geçirilen dabaraly çäre dürli ugurlarda zähmet çekýän gelin-gyzlary, mährem eneleri üsti naz-nygmatly toý saçagynyň başynda jemledi.

Berkarar döwletiň täze eýýamynyň Galkynyşy döwründe zenanlaryň bagtyýar durmuşda ýaşamagy, zähmet çekmegi we nesil terbiýelemegi ugrunda uly aladalar edilýär. Muňa «Garaşsyz, baky Bitarap Türkmenistan — bedew batly at-myradyň mekany» ýylynda Halkara zenanlar güni mynasybetli geçirilýän şatlyk-şowhunly çäreleriň we olarda edilýän buýsançly çykyşlaryň mysalynda hem aýdyň göz ýetirmek bolýar. «Türkmeniň ak öýi» binasynda geçirilen dabaraly çärede hem buýsançly çykyşlara giň orun berlip, zenanlara egsilmez hormat-sarpa goýýan Gahryman Arkadagymyza we Arkadagly Gahryman Serdarymyza tüýs ýürekden alkyş aýdyldy.

Sungat ussatlarynyň, aýdym-saz, tans  toparlarynyň çykyşlary dabaraly çäräniň şatlyk-şowhunyny has-da artdyrdy. Belentden ýaňlanan aýdym-sazlarda, joşgunly tanslarda, küştdepdidir gazallarda Halkara zenanlar gününiň, bahar paslynyň, eneleriň, zenanlaryň waspy ýetirildi.