Balkanabat şäheriniň gözel künjegindäki Baş baýdak meýdançasynda ir säherden Döwlet senamyzyň joşgunly ýaňlanyp, ýaşyl Tugumyzyň ýokary galdyrylmagy Türkmenistanyň Konstitusiýasynyň we Türkmenistanyň Döwlet baýdagynyň gününiň şowhunly dabarasynyň badalgasyna öwrüldi. Şatlyk-şowhuna, ruhubelentlige beslenen baýramçylyk dabarasynda buýsançly çykyşlara uly orun berildi. Çykyşlarda aýratyn nygtalyşy ýaly, goşa mukaddesligiň senesi agzybir halkymyzy has-da jebisleşdirýän, synmaz ruhuny açyp görkezýän, şöhratly geçmişimizi, häzirki bagtyýar durmuşymyzy, röwşen geljegimizi dabaralandyrýan ajaýyp baýramdyr. Konstitusiýamyz ýurt Garaşsyzlygymyzyň, hemişelik Bitaraplygymyzyň, täze taryhy eýýamyň giň gerimli özgertmeleriniň mizemez hukuk binýadydyr. Ýaşyl Tugumyz bolsa dünýäniň çar künjünde, iri halkara guramalaryň binalarynda pasyrdap, Gahryman Arkadagymyzyň başyny başlan, Arkadagly Gahryman Serdarymyzyň üstünliklere besleýän parahatçylyk söýüjilikli döwlet syýasatynyň mazmunyny dünýä ýaýýar. BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi parahatçylygyň berkarar bolmagy ugrundaky tagallalarymyzyň bütin dünýäde uly goldawa eýe bolýandygynyň subutnamasydyr.

         Dabarada edilen şeýle buýsançly çykyşlaryň dowamy Esasy Kanunymyzy, Döwlet baýdagymyzy, baky Bitaraplygymyzy, täze taryhy eýýamyň beýik tutumlaryny wasp edýän joşgunly, milli tanslara beslenen aýdym-sazlara, täsirli sahnalara utgaşdy. Medeni çykyşlaryň dowamynda dürli röwüşli howa şarlary, parahatçylygyň nyşany bolan ak kepderiler asuda asmany bezedi.