«Türkmennebit» döwlet konserniniň Türkmenbaşydaky nebiti gaýtadan işleýän zawodlar toplumynyň Kenar toplaýjy-ýükleýji nebit kärhanasynyň nebit we nebit önümleri guýulýan hem-de kabul edilýän täze 3-nji gämi duralgasy hormatly Prezidentimiziň sanly ulgam arkaly ak patasy bilen ulanmaga berildi.

Beýik Britaniýanyň «Petro Gas LLP» kompaniýasy bilen zawodlar toplumynyň arasynda baglaşylan şertnama laýyklykda gurlan täze desganyň ýyllyk kuwwaty nebit önümlerini ýüklemek boýunça 2 million 60 müň tonna, çig nebiti we nebit önümlerini düşürmek boýunça bolsa 1 million 150 müň tonna deňdir.

Täze gämi duralgasynda döwrebap zähmet we iş şertleri döredilip, ýangyn howpsuzlygynyň hem-de daşky gurşawy goramagyň düzgünleri  kämil enjamlaryň kömegi bilen awtomatlaşdyrylan usulda amala aşyrylýar. 

Desganyň ulanmaga berilmegi mynasybetli guralan dabaradan soňra toý sadakasy berlip, Gahryman Arkadagymyza hem-de Arkadagly Gahryman Serdarymyza berk jan saglyk, uzak ömür, ata Watanymyzyň gülläp ösmeginiň, eziz halkymyzyň has-da eşretli durmuşda ýaşamagynyň hatyrasyna alyp barýan beýik işlerinde mundan beýläk-de rowaçlyklar dileg edildi.

Tomusky dynç alyş möwsüminiň şu ajaýyp günlerinde bagtyýar çagalar güneşli ülkämiziň çar künjegindäki çagalar sagaldyş we dynç alyş merkezlerinde dynç alyp, saglyklaryny berkidýärler,  wagtlaryny şadyýan geçirýärler, birek-birek bilen dostlaşýarlar. Kitaphanalar, naharhanalar, kompýuter otaglary, sport zallary... merkezlere dynç almaga barýan ýaş nesilleriň hyzmatynda. Iň oňat şert-mümkinçilikler döredilen şeýle döwrebap merkezleriň biri-de «Awaza» milli syýahatçylyk zolagyndaky Balkan welaýat häkimliginiň «Balkan» dynç alyş we sagaldyş merkezidir.

Bu merkez 300 orundan ybarat bolup, onuň 200-si uly adamlara, 100-si bolsa çagalara niýetlenilendir. «Balkana» dynç almaga gelýän raýatlar, şol sanda çagalar mähir bilen garşylanylýar we uly alada bilen gurşalyp alynýar. Olaryň ýokary derejede dynç almaklary, saglyklaryny berkitmekleri, sport bilen meşgullanyp, sagdyn durmuş ýörelgelerine eýermekleri üçin ähli şertler üpjün edilipdir. Deňziň salkyn kenaryndaky döwrebap merkezde çagalaryň şadyýan gülküleri al-asmana göterilýär. Dürli çäreler, döredijilik bäsleşikleri, sport ýaryşlary, deňziň jana şypa beriji howasy, tebigatyň gözelligi olaryň ýadynda hemişelik galýar.

Çagalar deňziň kenarynda, şeýle-de «Jadyly kenar», «Älemgoşar», «Deňiz merjeni» atly oýun-attraksionly seýilgählerde ýygy-ýygydan gezelençde bolýarlar. Olar köpçülikleýin geçirilýän çärelere uly höwes bilen gatnaşýarlar, aýdym aýdýarlar, goşgy okaýarlar, surat çekýärler, sportuň dürli görnüşleri boýunça öz ukyp-başarnyklaryny görkezýärler. Jemgyýetçilik guramalary tarapyndan guralýan medeni çäreler, sport ýaryşlary körpeleri hasam begendirýär. Küşt, şaşka, futbol boýunça ýaryşlar, «Kim çalasyn?» atly bäsleşikler çagalaryň şatlyk-şowhunyny has-da artdyrýar.

«Awaza» milli syýahatçylyk zolagynda 4 — 8-nji awgust aralygynda geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna bagyşlanyp welaýat häkimliginiň guramagynda «Awaza» milli syýahatçylyk zolagy Ýer ýüzüniň parahatçylygyň, dost-doganlygyň merkezi» atly maslahat geçirildi.

Welaýat häkimliginiň mejlisler jaýynda geçirilen çärede edilen çykyşlarda dünýä ýaň saljak bu halkara maslahatyň ata Watanymyzyň şan-şöhratyny, hemişelik Bitaraplygymyzyň Ýer ýüzündäki ähmiýetini, ornuny has-da artdyrjakdygy hakynda buýsanç bilen gürrüň edildi. Şeýle-de türkmen halkymyzyň ata-babalarymyzdan dowam edip gelýän parahatçylyk söýüjilikli, dost-doganlyk gatnaşyklaryna ygrarly ýol-ýörelgeleriniň mynasyp dowam etdirilýändiginiň aýdyň subutnamasyna öwrüljekdigi nygtaldy. Dünýäde parahatçylygyň, ynanyşmagyň, dost-doganlygyň dabaralanmagy ugrunda taýsyz tagallalary edýän Gahryman Arkadagymyza we Arkadagly Gahryman Serdarymyza tüýs ýürekden alkyş aýdyldy.

Türkmenistanyň Senagatçylar we telekeçiler birleşmesiniň agzasy, telekeçi Halmämmet Amanmämmedowyň bagçylygy ösdürmekde bitirýän işleri guwandyryjydyr. Ol Balkanabat şäheriniň golaýyndaky Düzmergen ýaýlasynda döwlet tarapyndan 99 ýyl möhlet bilen bölünip berlen ýer böleginde eken bagçylygynda bol hasylyň kemala gelmegini gazandy. Telekeçi bagban 5 gektar ýer böleginde ösdürip ýetişdiren 5 müň 500 düýpden gowrak miweli baglaryna agrotehniki talaplara laýyk idegi ýola goýdy. Şonuň netijesinde hem üstümizdäki ýylda bereketli hasylyň eýesi boldy.

Şu günler bu ýerdäki baglarda ýetişdirilen datly miweleri ýygnamak işleri guramaçylykly alnyp barylýar. Telekeçiniň bagçylyk bölüminde zähmet çekýän bagbanlar miweli baglaryň  bitginli hasylyny ýygnamakda hem-de elýeterli  nyrhlardan  ilata ýetirmekde  yhlasly zähmet çekýärler. Bu ýerde erik, alma, armyt, şetdaly, garaly ýaly baglaryň ir, aralyk we giç ýetişýän görnüşleri bar. Häzire çenli baglardan ýyglyp alnan miweleriň möçberi 6 tonnadan geçdi. Telekeçi bagban möwsümiň ahyryna çenli dürli miweleriň 40 tonna golaýyny ýygnap almagy maksat edinýär.

Ýeri gelende aýtsak, işjanly telekeçiniň Düzmergen ýaýlasynda Türkiýede, Gollandiýada öndürilen enjamlar bilen üpjün edilen ýyladyşhanasy hem hereket edýär. Gök önümleriň dürli görnüşlerini ösdürip ýetişdirmäge niýetlenen, meýdany 4 gektara barabar bolan ýyladyşhanada ýaşlaryň altmyşdan gowragy zähmet çekýär. Halkara parahatçylyk we ynanyşmak ýylynyň başyndan bäri ýyladyşhanadan ýygnalyp alnan pomidor hasylynyň möçberi 656 tonnadan geçipdir. Şonuň 516 tonnasy daşarky bazarlarda ýerleşdirilipdir.

Ajaýyp zamanamyzda gelin-gyzlarymyzyň el senedine aýratyn sarpa goýulýar. Türkmeniň durmuşynda hiç wagt özüniň gymmatyny gaçyrmaýan, nepisligi, owadanlygy, ulanmaga amatlylygy, ynsan saglygy üçin ähmiýetliligi bilen tapawutlanýan keçe taýýarlamak işi hem häzirki döwürde döwrebap röwüşde, kämil derejede dowam etdirilýär. Munuň şeýledigini Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň we ÝUNESKO-nyň işleri barada Türkmenistanyň Milli toparynyň sekretariatynyň bilelikde yglan eden «Gülüň owadan!» bäsleşigi hem aýan edýär.

Bäsleşigiň welaýat tapgyry Balkanabat şäherindäki «Türkmeniň ak öýi» binasynyň öňündäki meýdançada geçirilip, oňa  etrap-şäher tapgyrlarynda ýeňiji bolan zenanlardan düzülen toparlar gatnaşdylar. Ak öýlerimiziň bezegi bolan milli keçelerimiziň ajaýyp nusgalarynyň taýýarlanylyşyny açyp görkezmegi, gelin-gyzlarda ene-mamalarymyzdan dowam edip gelýän asylly gylyk-häsiýetleri terbiýelemegi, ýaşlarda milli gymmatlyklarymyza bolan höwesi artdyrmagy maksat edinen bäsleşigiň şertlerine laýyklykda, zenanlar keçe taýýarlamakda ulanylýan usullar, gerek bolan gurallar we olaryň atlary barada gürrüň berdiler. Keçe üçin gerekli bolan ýüňi saýlamak, saýmak, daramak, boýamak, pişge etmek, pişgäni işmek, keçe ýazyljak gamşy taýýarlamak ýaly işleri ýerine ýetirdiler. Berlen wagtyň dowamynda keçe güllemekde we basmakda bir-birinden kem durmadylar. Olaryň keçe hakyndaky aýdyp beren rowaýatlary, nakyllary, yrymlary bäsleşigiň täsirliligini artdyrdy. Gözbaşyny müňýyllyklardan alyp gaýdýan medeni mirasymyzy, milli gymmatlyklarymyzy öwrenmekde, döwrebap kämilleşdirip, geljekki nesillere ýetirmekde giň ýollary açýan Gahryman Arkadagymyza, Arkadagly Gahryman Serdarymyza aýdylan alkyşly sözler bäsleşige gatnaşan zenanlaryň ýürek owazy bolup ýaňlandy.

Bäsleşigiň netijesi boýunça Esenguly etrabyndan gelen zenanlar topary baş baýraga mynasyp bolup, onuň döwlet tapgyryna gatnaşmaga hukuk gazandylar. Bereket etrabynyň topary birinji, Türkmenbaşy we Etrek etraplarynyň toparlary bolsa degişlilikde ikinji we üçünji orunlary eýelediler.

Bäsleşigiň ýeňijilerine Hormat hatlary we sowgatlar dabaraly ýagdaýda gowşuryldy.