Galla oragyna badalga berilmeginiň öň ýanynda welaýat häkimliginde geçirilen geňeş-maslahat işjeň häsiýete eýe boldy. Welaýat, etrap, şäher häkimlikleriniň, jemgyýetçilik guramalarynyň, oba hojalygyna dahylly edara-kärhanalaryň ýolbaşçylarynyň we jogapkär işgärleriniň, daýhan birleşikleriniň başlyklarynyň, tejribeli kärendeçileriň, şeýle-de il sylagly ýaşulularyň gatnaşmagynda geçirilen geňeş-maslahatda  welaýatymyzda galla oragyny öz möhletinde ýokary hilli geçirip, Watan harmanyna 80 müň tonna azyklyk däne tabşyrmak baradaky meýilnamany üstünlikli ýerine ýetirmek babatda öňde durýan wezipeler hakynda gürrüň edildi.

Soňra galla oragynyň başlanmagy mynasybetli dabara  Bereket etrabyndaky  «Nusgawy meýdan» daýhan hojalygynyň  ekin meýdanynda dowam etdi. Bu ýerde  hormatly Prezidentimiziň  ak patasyna  eýerilip, asylly däbe görä, sylag-sarpaly ýaşulularyň «Bismilla» diýen senaly sözleri bilen galla oragyna  girişildi.

Welaýatymyzyň ýer eýeleri tutanýerli zähmet çekip, mukaddes Garaşsyzlygymyzyň 34 ýyllyk, hemişelik Bitaraplygymyzyň 30 ýyllyk şanly baýramlarynyň dabaraly bellenjek ýylynda azyklyk guşgursak dänäniň bitginli hasylyny ösdürip ýetişdirdiler. Galla oragynda işlediljek «СLAAS» we «Joon Deer» kysymly kombaýnlaryň 102-niň öndürijilikli işledilmegi üçin düzüminde mehanikler, sazlaýjylar, kebşirleýjiler bolan ýörite tehniki hyzmat ediş toparlarynyň 16-sy döredildi. Ýangyç-ýaglaýyş serişdeleri, zerur ätiýaçlyk şaýlary bilen üpjün edilen bu toparlar hemişe iş üstünde bolarlar. Azyklyk bugdaýy Gyzylarbat hem-de Bereket  etraplaryndaky galla kabul ediş kärhanalaryna öz wagtynda ýitgisiz daşamak üçin awtoulaglaryň 510-sy bökdençsiz  işlediler. Galla kabul ediş nokatlarynyň hem-de Gyzylarbat etrabynda her biri 50 müň we 30 müň  tonna  däne  saklamaga  niýetlenen elewatorlaryň, dänäniň hilini kesgitlejek  barlamhanalaryň, ammarlaryň irgözinden taýýarlanyp goýulmagy möwsümiň ýokary guramaçylykly ýagdaýda geçjekdigine şaýatlyk edýär.

 Dabaranyň geçýän ýerinde guralan usuly-amaly maslahatda oba hojalyk toplumynyň, Türkmenistanyň Agrar partiýasynyň welaýat komitetiniň hünärmenleri, welaýat Polisiýa müdirliginiň ýangyn howpsuzlygy bölüminiň, ýol gözegçilik gullugynyň wekilleri çykyş edip, kombaýnlaryň iş düzgünleri, ýangyn howpsuzlyk düzgünlerini berjaý etmegiň möhüm ähmiýeti barada gürrüň etdiler. Bu ýerde atarylan toý  gazanlarynda milli tagamlar taýýarlanyp toý pişmeleridir çelpekleri bişirildi. Hatara dikilen altyganat ak öýleriň ýanynda türkmen halylary bilen bezelen telärlerde gelin-gyzlaryň ümeleri, monjugatdylarydyr läleleri, joşgunly gazallary, sungat ussatlarynyň ýerine ýetiren şirin aýdym-sazlary, tans we halk döredijilik toparlarynyň şowhunly çykyşlary gallaçylary belent üstünliklere ruhlandyrdy. Ekerançylyga we maldarçylyga degişli oba hojalyk önümleriniň sergisi  köpleriň ünsüni özüne çekdi.  Oba hojalyk toplumynyň gaýtadan işleýän senagatynyň, çörek we çörek önümleriniň, senetkärçilige, halyçylyga, zergärçilige hem-de sungatyň beýleki görnüşlerine degişli sergiler hem täsirli boldy. Dürli sport çäreleri özboluşlylygy, ýatda galyjylygy bilen tapawutlandy.

        Soňra ýygnalan  dänäniň ilkinji tonnalary ýüklenen awtoulaglaryň kerweni «Balkangallaönümleri»  önümçilik birleşiginiň Gyzylarbat etrabynyň Sarp obasyndaky galla kabul ediş bölümine  tarap ugradyldy. Olar galla kabul ediş bölüminde dabaraly ýagdaýda garşy alyndy. Bu ýerde ussat gallaçylara  hormatly Prezidentimiziň adyndan gymmat bahaly sowgatlar dabaraly ýagdaýda gowşuryldy.

Halkara parahatçylyk we ynanyşmak ýylynda bellenilip geçilen Gurban baýramy welaýatymyzda hem il agzybirliginiň, hoşniýetliliginiň, ynsanperwerliginiň dabaralanmasyna öwrüldi. Her bir ojakda giň gerim bilen garşylanyp, üç günläp toý-dabaralara beslenen bu baýramyň  şatlyk-şowhuny ýetik boldy. Balkanabat şäheriniň «Türkmeniň ak öýi» binasynyň ýanynda welaýat häkimliginiň, welaýat medeniýet müdirliginiň hem-de jemgyýetçilik guramalarynyň bilelikde guramagynda geçirilen baýramçylyk dabaralary munuň şeýledigine aýdyň şaýatlyk etdi. Çuň mazmuna beslenen baýramçylyk çäreleriniň geçýän ýerinde birkemsiz bezelen altyganat ak öýlerde toý supralary giňden ýazyldy. Toý tagamlaryndan dadan adamlar ýeneki ýyllarda Gurban baýramynyň il agzybirliginde, ýurt parahatçylygynda gelmegini Beýik Biribardan dileg etdiler. Bagşy-sazandalaryň ýerine ýetiren aýdym-sazlary, giňden ýaýbaňlandyrylan amaly-haşam, el işleriň hem-de muzeý gymmatlyklarynyň sergileri, toý gazanlarynda taýýarlanylan milli tagamlar Gurban baýramynyň dabarasyny has-da artdyrdy. Ýaşlar belent-belent bat alyp, hiňňildiklerde uçdular. Milli oýunlaryň dürli görnüşleri bilen gümra bolýan körpeleri synlamak has-da ýakymly boldy. Welaýatymyzyň sungat ussatlary özleriniň joşgunly aýdym-sazlary bilen toýa gelenlere ruhy lezzet paýladylar. Şirin aýdymlarda täze taryhy döwürde Gahryman Arkadagymyzyň beýik başlangyçlary, Arkadagly Gahryman Serdarymyzyň durmuşa geçirýän beýik tutumlary, Gurban baýramyň mukaddesligi, ýurdumyzda gazanylýan beýik ösüşler, ýurt Garaşsyzlygymyz, baky Bitaraplygymyz, halkymyzyň asudalygy, agzybirligi, dost-doganlyk wasp edildi. Halk döredijilik we tans toparlarynyň çykyşlary hem uly şowhun bilen garşylandy. Ýaş türgenleriň görkezme çykyşlary we sportuň dürli görnüşi boýunça geçirilen ýaryşlar baýramçylygyň dabarasyny artdyrdy.

Ynsanperwerligi, hoşniýetliligi, agzybirligi, ruhy päkligi, birek-birege sylag-hormaty alamatlandyrýan Gurban baýramyň dabaralary welaýatymyzyň ähli etrap-şäherlerinde hem belent joşgunda, ýokary ruhubelentlikde bellenip geçildi.

Türkmenistanyň Medeniýet ministrligi, Daşary işler ministrligi hem-de Balkan welaýat häkimligi tarapyndan guralyp, «Awaza» milli syýahatçylyk zolagynda birnäçe günläp dowam eden «Awaza — dostluk mekany» atly halkara tans we folklor festiwaly sungat muşdaklarynda uzak wagtlap ýatdan çykmajak täsirleri galdyrdy. Onda Eýrandan, Hindistandan, Täjigistandan, Özbegistandan gelen, şeýle-de ýurdumyzyň medeniýet we sungat ussatlary tans we folklor sungatynyň köpöwüşginliligini açyp görkezdiler, olaryň gadymdan gelýän däplerini şöhlelendirdiler. Ýurdumyzyň meşhur tans we folklor toparlarynyň ýerine ýetiren «Küştdepdi» tansy tomaşaçylarda, şol sanda festiwala gatnaşyjylarda örän ýakymly duýgulary döretdi. Şeýle buýsanç duýgulary festiwalyň çäklerinde aýratyn orun alan «Küştdepdi — parahatçylyk waspçysy» atly halkara maslahatda hem aýdyň ýüze çykdy. Ýeri gelende aýtsak, ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilen küştdepdi aýdym we tans dessury halk döredijiligimiziň giň ýaýran, gadymy görnüşleriniň biridir. Baýramçylyklarymyzyň, maşgala dabaralarymyzyň bezegi bolan küştdepdi halkymyzyň kämil pikir-garaýyşlaryny, tämiz duýgularyny, ýokary ruhy galkynyşy özünde jemläp, hemmeleri parahatçylykly durmuşa çagyrýar. Küştdepdiniň görnüşlerinden tomaşaçylara ýetirilen görkezme çykyşlaryna myhmanlaryň höwes bilen goşulyşmaklary munuň özboluşly subutnamasyna öwrüldi.

         Festiwalyň çäklerinde geçirilen döredijilik duşuşyklary, tans sungaty boýunça ussatlyk sapaklary, halk döredijilik, folklor-etnogarfik toparlarynyň çykyş edip, öz halkynyň milli sungatyny görkezmekleri, «Rowaç» gämisinde açyk deňze gezelenjiň guralmagy halkara çäräniň täsirliligini has-da artdyrdy. 

Halkara festiwalynyň ýapylyş dabarasynda oňa gatnaşyjylara degişli diplomlar gowşurylyp, «Awaza — dostluk mekany» atly halkara tans we folklor festiwalyna gatnaşyjylar hormatly Prezidentimiziň adyna Ýüzlenme kabul etdiler. Dabarada oňa gatnaşyjy döredijilik toparlarynyň bilelikdäki jemleýji konserti tomaşaçylaryň şowhunly el çarpyşmalary arkaly garşylandy. Ýurdumyzyň we daşary ýurtlaryň birleşen folklor we tans toparlarynyň gatnaşmaklarynda ýerine ýetirilen küştdepdi tansy şanly ýyla bezeg beren halkara festiwalyň jemleýji çykyşyna öwrülip, dünýä halklaryny dostlukly, hoşniýetli we parahatçylykly gatnaşyklara çagyryşyň mukamy bolup ýaňlandy.

Hazaryň türkmen kenarynda geçirilýän «Awaza — dostluk mekany» atly halkara tans we folklor festiwalynyň dabaraly açylyşy ýokary ruhubelentlige, şatlyk-şowhuna beslendi. Türkmenistanyň Medeniýet ministrligi, Daşary işler ministrligi we Balkan welaýat häkimligi tarapyndan geçirilýän halkara festiwalyň milli syýahatçylyk zolagyndaky «Awaza» akwaparkynda guralan açylyş dabarasyna hökümet agzalary, halkara guramalaryň, ugurdaş ministrlikleriň ýolbaşçylary we wekilleri, Eýrandan, Hindistandan, Özbegistandan, Täjigistandan, şeýle-de ýurdumyzdan medeniýet we sungat işgärleri, alymlar, habar beriş serişdeleriniň wekilleri, Diýarymyzyň ýokary okuw mekdepleriniň professor-mugallymlary hem-de talyplary ýygnandylar. Bezemen sahnada ýaýbaňlandyrylan dabarada ilki bilen, hormatly Prezidentimiziň halkara festiwala gatnaşyjylara iberen Gutlagynyň okalmagy forumyň özboluşly badalgasyna öwrüldi. Arkadagly Gahryman Serdarymyzyň nygtaýşy ýaly, bu halkara forum ýurdumyz bilen dünýä döwletleriniň arasyndaky medeni köprüleri has-da pugtalandyrar. Dostlukly halklaryň tans we folklor sungatynda gazanylan üstünlikleri birek-birege ýakyndan tanyşdyrmaga ýardam eder. Şeýle-de parahatçylyga, dost-doganlyga söýgi döretmekde festiwal uly ähmiýete eýe bolar.

Soňra ajaýyp sahnada bilelikdäki konsert ýaýbaňlandyryldy. Tomaşaçylar dünýäniň dürli ýurtlaryndan gelen sungat wekilleriniň köpöwüşginli çykyşlaryny uly gyzyklanma bilen garşyladylar. Milli aýdymlar ýerine ýetirilip, halkymyzyň gadymdan gelýän sungat däpleri şöhlelendirildi. Dabaranyň dowamynda ýurdumyzdan wekilçilik edýän medeniýet we sungat ussatlarynyň tomaşaçylara hödürlän täsirli çykyşlary türkmen halkynyň müňýyllyklaryň dowamynda milli däp-dessurlaryny, halk döredijiligini, özboluşly folklor we tans sungatyny asyrlardan-asyrlara geçirip, kämilleşdirip gelendigini ýene bir ýola ähli aýdyňlygy bilen görkezdi. Dabarada ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilen küştdepdi tansynyň ýerine ýetirilmegi hemmelerde uly ruhy joşgun döretdi.

Asyrlaryň jümmüşinden gözbaş alyp gaýdýan belent heňli mukamlaryň üsti bilen dünýä halklarynyň dost-doganlyk gatnaşyklaryny pugtalandyrýan, parahat, abadan durmuşa söýgini joşdurýan şeýle çäräniň geçirilmegi üçin ähli şert-mümkinçilikleri döredýän Arkadagly Gahryman Serdarymyza alkyş sözleri belentden ýaňlanýan «Awaza — dostluk mekany» atly halkara tans we folklor festiwaly şunuň ýaly täsirli çäreleri bilen dowam edýär.

Her ýylyň 3-nji iýunynda giňden bellenilip geçilýän Bütindünýä welosiped güni Halkara parahatçylyk we ynanyşmak ýylynda hem ýokary ruhubelentlige beslendi. Parahatçylygy, dost-doganlygy dabaralandyrýan, dünýäniň ähli halklaryny sagdynlyga, sport bilen meşgullanmaklyga çagyrýan bu senäniň şanyna welaýatymyzda geçirilen çäreler hem ilimiziň agzybirligini, ýurdumyzyň abadançylygyny alamatlandyrdy.

         Halkara baýram mynasybetli Balkanabat şäherindäki «Türkmeniň ak öýi» binasynyň öňündäki meýdançada ýaýbaňlandyrylan aýdym-sazly dabara sagdynlygyň, ruhubelentligiň, sportuň mekany bolan eziz Watanymyza, ajaýyp zamanamyza, ýurdumyzda durmuşa geçirilýän beýik işlere, şol sanda sporty ösdürmeklige, köpçülikleýin bedenterbiýäni, sagdyn durmuş ýörelgesini jemgyýetimizde has-da rowaçlandyrmaklyga gönükdirilen işlere bagtyýar raýatlarymyzyň buýsanjynyň egsilmezdiginiň özboluşly güwäsine öwrüldi. Baýramçylyk keşbine beslenen meýdançada ýaňlanan aýdym-sazlarda, tanslarda hut şol ajaýyplyklaryň waspy belentden ýetirildi. Halkymyzy sagdyn, eşretli, bagtyýar durmuşda ýaşadýan, ýurdumyzyň, türkmen sportunyň şan-şöhratyny dünýäde has-da belende götermekde taýsyz tagallalary edýän Gahryman Arkadagymyza hem-de Arkadagly Gahryman Serdarymyza alkyşdyr hoşallyk sözleriniň şol aýdym-sazlaryň içinden eriş-argaç bolup geçendigini nygtamak aýratyn ýakymlydyr. Bu ýerde türgenleriň ýerine ýetiren görkezme çykyşlarynyň, sportda gazanylan üstünlikleri şöhlelendirýän serginiň hem köpleriň ünsüni özünde jemländigini bellemek gerek.

         Bütindünýä welosiped gününiň esasy çäresi köpçülikleýin welosipedli ýöriş boldy. Edara-kärhanalaryň, guramalaryň wekilleri, talyp ýaşlar, türgenler baýramçylyk güni ir säherden ýörişiň başlanýan ýerine — welaýat merkezindäki «Türkmeniň ak öýi» binasynyň ýanyna ýygnandylar. Hemmeleriň ýüzlerinde şatlyk, kalplarynda buýsanç alamatlary bar. Ine-de, dürli reňkli şarlaryň al-asmana uçurylmagy bilen köpçülikleýin welosipedli ýörişe badalga berilýär. Şäheriň lowurdap duran aýna ýaly tekiz şaýollarydyr köçeleri bilen ýola düşen welosipedçileriň ruhubelentligini, aýdylyşy ýaly, taryp etmäge söz gerek. Diýarymyzda welosiped sportunyň uly meşhurlyga eýe bolandygynyň aýdyň güwäsine öwrülen ýörişiň geçýän ýerlerinde ýaýbaňlandyrylan aýdym-sazly çykyşlar, sport maşklary baýramçylygyň many-mazmunyny has-da baýlaşdyran pursatlary özünde jemledi.

         Bütindünýä welosiped gününe bagyşlanan medeni-sport çäreler, köpçülikleýin welosipedli ýörişler welaýatymyzyň ähli etrap-şäherlerinde ýokary derejede geçirildi.