Milli bahar baýramy — Halkara Nowruz güni mynasybetli Balkanabat şäherindäki «Türkmeniň ak öýi» binasynyň öňündäki ajaýyp meýdançada uludan tutulan baýramçylyk dabarasy welaýatyň medeniýet, saglygy goraýyş we bilim ulgamlarynyň işgärleriniň, ýaşuly nesliň wekilleriniň, talyp ýaşlaryň gatnaşmagynda baýramçylyk ýörişi bilen başlandy.

Welaýat we Balkanabat şäher häkimlikleriniň, welaýat medeniýet müdirliginiň, Türkmenistanyň Zenanlar birleşiginiň welaýat bölüminiň bilelikde guran dabarasynda hormatly Prezidentimiziň baýramçylyk mynasybetli Gutlagyndan ruhlanan welaýatyň ýaşaýjylary çykyş edip,  Döwlet Baştutanymyza berk jan saglyk, uzak  ömür, il-ýurt bähbitli,  dünýä ähmiýetli beýik işlerinde baky rowaçlyklar arzuw etdiler.

Baýramçylyk dabarasy welaýatymyzyň medeniýet we sungat ussatlarynyň  aýdym-sazly çykyşlary bilen dowam etdi. Onda türkmen tebigatynyň, bahar paslynyň waspy beýan edildi. Tanymal bagşy-sazandalar, estrada aýdymçylary, tans toparlary çykyş edip, dabara ýygnananlara ruhy lezzet paýladylar. Ýaňlanan aýdym-sazlarda, tans we folklor toparlarynyň joşgunly çykyşlarynda ildeşlerimiziň Gahryman Arkadagymyza, Arkadagly Gahryman Serdarymyza egsilmez söýgi-buýsanjy öz beýanyny tapdy.

           Baýramçylyk dabarasynyň geçýän ýerinde guralan sergilerde Milli bahar baýramyna degişli däp-dessurlar ussatlyk bilen janlandyryldy. Milli senetkärlik, halyçylyk, zergärçilik hem-de sungatyň beýleki görnüşleri boýunça ýerleşdirilen işler örän täsirli, ýatda galyjy boldy. Dürli oýunlara meşgullanýan çagalaryň şadyýan gülki sesleri baýramçylyk çäresiniň şatlyk-şowhunyny has-da arşa göterdi.

          Ýaş suratkeşler ýazyň ajaýyp görnüşlerini öz eserlerinde şöhlelendirdiler. Giň meýdança görk berýän ak öýleriň hatary küren obany ýada saldy. Bu ýerde milli oýunlar, türgenleriň sportuň dürli görnüşleri boýunça görkezme çykyşlary-da ýaýbaňlandyryldy.  

Welaýatymyzyň çar künjeginde Milli bahar baýramy — Halkara Nowruz güni mynasybetli şatlyk-şowhunly dabaralar biri-birine ulaşdy. Magtymguly etrabynyň «Akderek» ýaýlasynda geçirilen dabaraly çäre hem şolaryň biri boldy.

Ýaşyl begrese beslenen ýaýladaky dabara baýramçylyk ýörişi bilen badalga aldy. Il sylagly ýaşulular, kümüş saçly eneler, gül görkli gelin-gyzlar, bagtyýar ýaşlar, körpeler baýramçylyk dabarasynyň geçirilýän ýerine aýdym-sazyň belent owazynyň astynda geldiler. Ýörişe elleri Nowruzyň esasy tagamy bolan semenili zenanlaryň aýratyn görk berendigini bellemek gerek. Hatar gurap oturan ak öýleriň öňünde guralan zergärçilik, amaly-haşam sungatynyň önümleriniň, gelin-gyzlarymyzyň el işleriniň sergisini ýörişe gatnaşyjylar uly höwes bilen synladylar.

Soňra bu ýerde sungat ussatlarynyň çykyşlary ýaýbaňlandy. Folklor toparlarynyň joşgunly çykyşlarynda halkymyzyň Nowruz baýramy bilen baglanyşykly hem-de toý däp-dessurlary, yrym-ynançlary öz beýanyny tapdy. Bagşy-sazandalaryň, estrada aýdymçylarynyň ýerine ýetiren aýdym-sazlarynda, gazallarynda, tans toparlarynyň döwrebap tanslarynda ajaýyp zamanamyz we onuň ösüşleri, Milli Liderimiziň we hormatly Prezidentimiziň dünýä nusgalyk işleriniň, Nowruzyň, bahar paslynyň waspy belentden ýetirildi.

         Baýramçylyk çäresi soňra «Ok atan» jülgesinde dowam edip, bu ýerde hem şatlyk-şowhun al-asmana göterildi. Welaýat döwlet drama teatrynyň artistleriniň beýik akyldar şahyrymyz Magtymguly Pyragynyň durmuşyndan görkezen sahna oýunlary, folklor toparlarynyň milli däp-dessurlarymyzdan gözbaş alýan çykyşlary, belentden ýaňlanan aýdym-sazlar, joşgunly tanslar çärä gatnaşanlaryň göwünlerini galkyndyrdy. Dabaralaryň dowamynda ýurdumyzy toý-baýramlaryň mekanyna öwren Milli Liderimize we hormatly Prezidentimize alkyş sözleri öwran-öwran aýdyldy.

22-nji martda geçirilen ählihalk bag ekmek dabarasyna welaýatymyzyň şäherleriniň, etrap merkezleriniň, obalarynyň we şäherçeleriniň ýaşaýjylary ýokary watançylyk hyjuwy bilen gatnaşdylar. Bag nahallaryny oturtmak üçin saýlanyp alnan ýerler, sözüň doly manysynda, baýramçylyk keşbine beslendi. Welaýatymyzda bu sogaply işe bagyşlanan esasy çäre Balkanabat şäherindäki welaýat köpugurly söwda bazarynyň golaýyndaky giňişlikde guraldy. Ýaz ýagşyna durlanan ak säherde baýramçylyk lybasyna beslenen meýdançada guralan  dabarada çykyş edenler halkymyzyň bagtyýarlygy, Watanymyzyň has-da kuwwatlanmagy, Diýarymyzyň bagy-bossanlyga öwrülmegi babatda edýän taýsyz tagallalary üçin Gahryman Arkadagymyza hem-de Arkadagly Gahryman Serdarymyza  tüýs ýürekden  alkyş  sözlerini aýtdylar.

Welaýatymyzyň medeniýet we sungat ussatlarynyň döwrebap aýdym-sazlary, folklor hem-de tans toparlarynyň joşgunly çykyşlary, giňden döwre guralyp ýerine ýetirilen küştdepdi tansy bag nahallaryny oturtmak üçin ýygnanan adamlara ruhy lezzet paýlady. Ilkinji bag nahallaryny oturtmaklygyň ýaşuly nesliň wekillerine, köp çagaly enelere hem-de ýaş çatynjalara ynanylmagy çuň many-mazmuna eýe bolup, çärä gatnaşyjylaryň ruhubelentliklerini has-da  belende göterdi.

          Zähmet baýramçylygynyň dowamynda gözel künjekde oturdylan bag nahallary täze ýaşyl zolagy emele getirdi hem-de welaýat köpugurly söwda bazarynyň töwereginiň gözelligine gözellik goşdy. Welaýat merkezindäki seýilgählerde, köçeleriň ugurlarynda, önümçilik maksatly hem-de medeni-durmuş ähmiýetli ymaratlaryň daş-töwereklerinde hem hakyky zähmet baýramçylygy möwç urdy. Çäräniň geçýän ýerlerinde milli oýunlar, türgenleriň sportuň dürli görnüşleri boýunça görkezme çykyşlary giňden ýaýbaňlandyryldy.       

Ählihalk bag ekmek dabaralarynda welaýatymyzda dürli bag nahallarynyň 36 müňe golaý düýbi oturdyldy, şolaryň 10 müň 723-si miweli baglaryň nahallarydyr. 

Türkmenistanyň Medeniýet ministrliginiň, Türkmenistanyň Telewideniýe, radiogepleşikler we kinematografiýa baradaky döwlet komitetiniň, Türkmen döwlet neşirýat gullugynyň hem-de Balkan welaýat häkimliginiň bilelikde guramaklarynda welaýatymyzda geçirilen döredijilik duşuşyklary ýokary ruhubelentlige beslendi.

«Arkadagly Serdaryň dünýä uzan ak ýoly — Halkara parahatçylyk we ynanyşmak ýyly!» atly şygar bilen Türkmenbaşy etrabynyň Belek şäherçesiniň medeniýet öýünde, Balkanabat şäherindäki welaýat kitaphanasynda, Gyzylarbat etrabynyň Janahyr şäherçe medeniýet öýünde bolan döredijilik duşuşyklaryna «Biznes reklama» gazetiniň bölüm redaktory, Türkmenistanyň Hormatly il ýaşulusy, ýazyjy Gurbannazar Orazgulyýew, Türkmenistanyň Medeniýet ministrliginiň döredijilik işgärleri bölüminiň başlygynyň orunbasary, Türkmenistanyň at gazanan medeniýet işgäri Akmyrat Rejebow, Arkadag şäheriniň Aman Gulmämmedow adyndaky döwlet drama teatrynyň ýokary derejeli drama artisti, Türkmenistanyň at gazanan artisti Ýagmyr Gurbannazarow, Aşgabat şäher häkimliginiň «Aşgabat» döredijilik toparynyň ýokary derejeli artisti, Türkmenistanyň at gazanan artisti Ilşat Annamämmedow we ýerli ýazyjy-şahyrlar gatnaşdylar. Olar duz-çörek bilen we aýdym-sazyň belent owazy astynda garşylandylar. Guralan dürli sergiler duşuşyklara gatnaşyjylarda ýakymly täsirleri galdyrdy.

Halkara parahatçylyk we ynanyşmak ýylynda Milli Liderimiziň we hormatly Prezidentimiziň parasatly ýolbaşçylygynda durmuşa geçirilýän beýik işleriň netijesinde halkymyzyň ýaşaýyş-durmuş şertleri barha gowulanýar. Ata Watanymyzyň her bir güni buýsançly wakalara beslenýär.

Döredijilik duşuşyklarynyň dowamynda edilen çykyşlarda şular dogrusynda giňişleýin gürrüň edildi. Şahyrlar ýurdumyzyň ösüş-özgerişlerini özleriniň täze ýazan goşgularynyň üsti bilen wasp etdiler. Garaşsyz, hemişelik Bitarap Türkmenistan döwletimiziň has-da gülläp ösmegi, dost-doganlyk gatnaşyklarynyň barha pugtalandyrylmagy, halkymyzyň bolelin, bagtyýar durmuşda ýaşamagy üçin taýsyz tagallalary edýän Gahryman Arkadagymyza we Arkadagly Gahryman Serdarymyza tüýs ýürekden aýdylan alkyşlar döredijilik duşuşyklarynda edilen çykyşlaryň özenini düzdi. 

Halkara parahatçylyk we ynanyşmak ýylynyň şanly wakalarynyň üstüni ýetiren Halkara zenanlar gününiň baýramçylyk çäreleri welaýatymyzda hem biri-birine ulaşdy. Welaýat häkimliginiň edara binasynyň mejlisler zalynda geçirilen, sekiz we şondan köp çagany dünýä inderen we mynasyp terbiýeläp ýetişdiren eneleri hormatlamak dabarasy şol baýramçylyk çäreleriniň möhüm bölegine öwrüldi.

Dabarada mährem enelerimiz, gelin-gyzlarymyz barada döwlet derejesinde edilýän aladalar üçin Gahryman Arkadagymyza hem-de Arkadagly Gahryman Serdarymyza tüýs ýürekden hoşallyk sözleri aýdyldy. Hormatly Prezidentimiziň Permanyna laýyklykda, Türkmenistanyň «Ene mähri» diýen hormatly ady dakylan eneler tüýs ýürekden gutlandy. Köp çagaly enelere Arkadagly Gahryman Serdarymyzyň adyndan gymmatbahaly sowgatlaryň gowşurylmagy dabaranyň tolgundyryjy pursatlarynyň biri boldy. «Ene mähri» diýen hormatly ada eýe bolan eneler her bir maşgalanyň abadançylygy babatda döredilýän şertler, mynasyp nesilleri terbiýelemekdäki goldaw-hemaýatlar üçin Milli Liderimize we hormatly Prezidentimize alkyşlaryny beýan etdiler. Welaýatyň sungat ussatlarynyň joşgunly aýdym-sazlary bolsa şeýle alkyş sözleriniň üstüni ýetirdi.

 Köp çagaly enelere Bereket etrabynyň Galkynyş şäherçesinden döwrebap ýaşaýyş jaýynyň açarynyň gowşurylyş dabarasy hem şatlyk-şowhuna beslendi. Bu ýerde bezemen sahnada şirin aýdym-sazlar joşgunly ýaňlanyp, milli tanslar bilen sazlaşykly utgaşdy. Halkymyza mahsus toý dessurlary ýerine ýetirildi. Buýsanç duýgularyna beslenen gutlag çykyşlaryna uly orun berildi. Çykyş edenler ýurdumyzda eneligi we çagalygy goramakda, köp çagaly maşgalalara durmuş taýdan goldaw bermekde uly işleriň amala aşyrylýandygyny aýratyn nygtadylar. Köp çagaly enelere täze ýaşaýyş jaýynyň açarynyň gowşurylmagyny muňa anyk subutnamalaryň biri hökmünde mysal getirdiler. Köp çagaly maşgalalaryň ýaşaýyş-durmuş şertlerini yzygiderli gowulandyrmak barada döwletimiz tarapyndan edilýän aladalar üçin Gahryman Arkadagymyza hem-de Arkadagly Gahryman Serdarymyza çäksiz alkyş aýtdylar. Ýürekden çykýan şeýle alkyş sözleri täze ýaşaýyş jaýynyň açaryny ýüzlerine sylan köp çagaly eneleriň hem dilleriniň senasy boldy.